ရန်ကုန်-မန္တလေး အမြန်လမ်း မိုင်တိုင် ၄/၂ တွင် ဇန်နဝါရီ ၂၁ ရက် နံနက်ပိုင်းက ပုဂံမှ ဘုရားဖူး ပြန်လာသော HiAce ယာဉ်တိမ်းမှောက်မီးလောင်မှုကြောင့် လူ ၈ ဦး မီးလောင်သေဆုံးခဲ့သည့် အဆိုပါယာဉ် မီးလောင်မှုတွင် ယာဉ်မောင်းတစ်ဦးသာ အသက်ရှင်သည်ဟု ရဲတပ်ဖွဲ့က ထုတ်ပြန်ခဲ့သော်လည်း ဒုတိယမြောက် အသက်ရှင်ကျန်ရစ်သူ ရှိကြောင်း သုံးသပ်ပြောဆို ရေးသာမှုများ ထွက်ပေါ်လျက် ရှိသည်။ 

 

၁၀ ဦးမြောက် ကားပေါ်မှ ဆင်းလာသူဟု ဓာတ်ပုံနှင့် ဖော်ပြခံခဲ့ရသော KBZ ဘဏ်ဝန်ထမ်း ကိုခွန်ရန်နောင်ဦးကို The Voice က သီးသန့်တွေ့ဆုံ၍ သူတွေ့ကြုံခဲ့ရသည့် ကားမီးလောင်မှုအခြေအနေ၊ အကူအညီ ပေးခဲ့ရမှုများကို တွေ့ဆုံမေးမြန်းခဲ့သည်များမှ ကောက်နုတ်ဖော်ပြပါသည်။

 

Voice : အမြန်လမ်းမှာ အန်စာတုံးကား မီးလောင်မှုနဲ့ ပတ်သက်ပြီး အစ်ကိုကြုံတွေ့ခဲ့တာ ပြန်ပြောပြပေးပါ။

 

KYNO : ရန်ကုန်ကနေ ကျွန်တော်တို့ ဇာတိမြို့ ဒိုက်ဦးကို အဲဒီမနက်က ဟာရီယာ စစ်စိမ်းရောင်ကားနဲ့ ပြန်လာတယ်၊ ကားပေါ်မှာ အဖေရယ်၊ အမေရယ် ကျွန်တော်ရယ် သုံးယောက်ထဲပါပြီး ကားကို အဖေက မောင်းတယ်။ အမြန်လမ်း လေးမိုင်နှစ်ဖာလုံမှာ ကားတစ်စီး မီးခိုးတွေ အူထွက်နေတဲ့ကားကို လူနှစ်ယောက်က မှန်တွေ ခဲနဲ့ထုခွဲနေတာ တွေ့ခဲ့တယ်၊ ကျန်တစ်ယောက်က မီးသတ်ဆေးဘူးနဲ့ မီးငြှိမ်းနေတာ တွေ့လို့ ကားရပ်ပြီး ဘာကူညီရမလဲဆိုပြီး ကျွန်တော်က လမ်းပေါ်ဆင်းလာခဲ့တာပါ။

 

Voice : မီးလောင်နေတဲ့ကားကို အစ်ကိုပါ ဝိုင်းကူငြှိမ်းပေးခဲ့လား။

 

KYNO : ကျွန်တော် လမ်းလယ်ကျွန်းပေါ် ရောက်ချိန် မီးလောင်နေတဲ့ ကားထဲက ပေါက်ကွဲသံတွေ ကြားနေရပြီ၊ မီးငြှိမ်းနေတဲ့ လူတွေလည်း ကားနဲ့ဝေးရာပြေးရင်း ကျွန်တော့်အနား ရောက်လာတာ၊ ကားထဲက လွတ်လာတဲ့လူကို ဘေးနားက လူတစ်ယောက်က လှမ်းပြောတယ်၊ မီးလောင်တဲ့ ကားထဲမှာ လူတွေ ပါသွားတယ် ညီလေး၊ မင်းအိမ်ကို လှမ်းအကြောင်းကြားလိုက်ဦး ပြောတော့ ကားထဲက အသက်ရှင် လွတ်လာသူက ကျွန်တော့်ဖုန်း မီးထဲပါသွားပြီ ပြောတယ်၊ ဒါနဲ့ ကျွန်တော်ရဲ့ Samsung လက်ကိုင်ဖုန်းကို အဲ့ဒီလူဆီ ထုတ်ပေးလိုက်ပြီး အစ်ကို ဆက်ချင်ဆက်လို့ ပြောလိုက်တယ်။

 

Voice : မီးလောင်တဲ့ ကားထဲက အသက်ရှင်လွတ်လာသူ ကိုအောင်ခန့်က အစ်ကို့ဖုန်းနဲ့ ဘယ်ကိုဆက်သွယ်ခဲ့လဲ၊ ပြောပြပေးပါ။

 

KYNO : သူ့အမေဆီ ဖုန်းဆက်တာ၊ ကားထဲမှာ သူ့ကောင်မလေးလည်း ပါသွားပြီ၊ သင်္ဃန်းကျွန်းက ကောင်မလေးတွေနေတဲ့အိမ်ဆီ သွားပြီး အကြောင်းကြားပေးပါလို့ သူပြောနေတာ ကြားမိတယ်၊ မိသားစုနဲ့ စကားပြောနေတာမို့ ကျွန်တော်သူ့အနားမှာ မနေဘဲ ခပ်လှမ်းလှမ်းမှာ သွားရပ်နေခဲ့တယ်၊ အဲ့ဒီအချိန်မှာ အမြန်လမ်းပေါ်သွားနေတဲ့ ကားတွေက မီးလောင်တဲ့ကားကို ဓာတ်ပုံတွေ ဗီဒီယိုတွေ လှမ်းရိုက်နေတာတော့ သတိထားမိလိုက်တယ်။

 

Voice : ကိုအောင်ခန့်က သူ့အမေဆီ ဖုန်းဆက်ပြီးတော့ မီးလောင်တဲ့နေရာမှာ အစ်ကို ဆက်ရှိနေလား။

 

KYNO : ဟုတ်ကဲ့၊ ရှိနေပါတယ်၊ ဘာလို့ဆို ကိုအောင်ခန့်က သူ့ဖုန်းမရှိတော့လို့ သူ့အမေ ဖုန်းထပ်ဆက်လာရင် စကားပြောလို့ရအောင် နာရီဝက်လောက် ဒီမှာ နေပေးပါလို့ အကူအညီတောင်းခဲ့တယ်၊ ကျွန်တော် အမေ့ကိုပြောပြပြီး အခင်းဖြစ်နေရာမှာ တစ်နာရီလောက် ကျွန်တော်တို့တွေ နေပေးခဲ့တယ်၊ အဲဒီအချိန်မှာ ကိုအောင်ခန့်အမေဆီက ဖုန်းနှစ်ခါ ဆက်လာတယ်၊ ကိုအောင်ခန့်နဲ့ စကားပေးပြောခဲ့တယ်၊ မီးသတ်နဲ့ ရဲတွေ ရောက်လာပြီးနောက်ပိုင်း ကားမီးငြိမ်းသွားမှ ကျွန်တော်တို့ မိသားစု ဒိုက်ဦးဘက် ပြန်ခဲ့တာ၊ ၁၅ မိနစ်လောက်အကြာ လမ်းခုလတ်အရောက်မှာ ကိုအောင်ခန့် အမေဆီက ဖုန်းထပ်ဝင်လာသေးတယ်၊ ကျွန်တော်က ခရီးသွားတစ်ယောက်ပါ၊ ကိုအောင်ခန့်ဖုန်း မီးထဲပါသွားလို့ ကျွန်တော့်ဖုန်းပေး ဆက်ခဲ့တာပါ၊ အန်တီသား ကိုအောင်ခန့် ဘာမှမဖြစ်ဘူး၊ ကားထဲပါတဲ့ ရှစ်ယောက်တော့ မီးလောင်ပြီး ဆုံးသွားရှာတယ်လို့ ကျွန်တော်ပြန်ပြောပေးခဲ့တယ်။

 

Voice : လူ ၈ ယောက် ကားမီးလောင် သေသွားတဲ့ သတင်းနဲ့ ဓာတ်ပုံတွေ အွန်လိုင်းပေါ် ပျံ့ခဲ့တာရော အစ်ကိုသိလား။

 

KYNO : သိတယ်၊ ကားမီးလောင်ပြီး သုံးရက်လောက် အကြာမှာ ဖေ့စ်ဘွတ်စ်ပေါ်မှာ ဓာတ်ပုံနဲ့ ဗီဒီယိုဖိုင်တွေ တက်လာတယ်၊ ကျွန်တော့်ပုံ ပါလာကြောင်း အလုပ်အတူလုပ်နေတဲ့ သူငယ်ချင်းတွေ ပြောပြလို့ သိခဲ့တာ၊ ကျွန်တော်နဲ့ ကိုအောင်ခန့် နှစ်ယောက် စကားပြောနေတဲ့ပုံပါ တွေ့လိုက်ရတယ်၊ ဒါပေမဲ့ ဖေ့စ်ဘွတ်ခ်ပေါ်က သတင်းလေ၊ ပြီးသွားမှာပါဆိုပြီး ကျွန်တော့်ဘက်က ဘာကွန့်မန့်မှ ပြန်မရေးခဲ့ဘူး၊ ဒါပေမဲ့ အဖေနဲ့ အမေကိုတော့ လိုင်းပေါ်မှာ ကျွန်တော့်ပုံတွေ တက်နေကြောင်း အသိပေးခဲ့တယ်။ သိပ်မကြာဘူး ဂျာနယ်တစ်စောင်မှာ ကျွန်တော့်ဓာတ်ပုံနဲ့ မျက်နှာဖုံး သတင်းပါလာတယ်လို့ ညီမလေးက ပြောတယ်၊ သူငယ်ချင်းတွေကပါ ဖုန်းတွေ တောက်လျှောက်ဆက် မေးလာကြတယ်။

 

Voice : ဂျာနယ်မှာ အစ်ကို့ပုံနဲ့ သတင်းဖော်ပြခံရပြီး နောက်ပိုင်း အစ်ကိုတို့ဘက်က ဘာဆက်လုပ်ခဲ့လဲ။

 

KYNO : ညီမလေးက သူ့အကောင့်မှာ မီးလောင်တဲ့ ကားပေါ်က ဆင်းလာသူဟာ ကျွန်တော် မဟုတ်ဘူး၊ ဝင်ကူညီခဲ့တာလို့ ရေးပြီးတင်လိုက်တယ်၊ အများအမြင်မှာ ဒီကားမီးလောင်မှုမှာ ကျွန်တော်ပါ ပါဝင်ပတ်သက်နေသူလို့ ထင်မှတ်နေမှာ စိုးရိမ်လို့ပါ၊ အဖေက သတင်းဖော်ပြခဲ့တဲ့ ဂျာနယ်တိုက်ကို တောင်းပန်စာ ထည့်ခိုင်းမယ် ပြောတယ်၊ မထည့်ပေးရင် တရားစွဲမယ်တဲ့၊ ကျွန်တော်က ဘဏ်အလုပ် တစ်ဖက်နဲ့မို့ မအားလို့ ဒီကိစ္စတွေကို အဖေပဲ စီစဉ်သွားမှာပါ။

 

 

Voice : လူရှစ်ယောက် မီးလောင်ခဲ့တဲ့ ကားနားမှာ အသက်ရှင်လွတ်လာတဲ့ ယာဉ်မောင်း ကိုအောင်ခန့်နဲ့ အတူရှိနေတဲ့ အစ်ကို့ကိုရော သက်ဆိုင်ရာက ခေါ်မေးမြန်းတာမျိုး မရှိဘူးလား။

 

KYNO : ရှိတယ်၊ စနေနေ့ (ဖေဖော်ဝါရီလ ၁၁ ရက်) က ကျွန်တော့်ကို စီအိုင်ဒီက ခေါ်စစ်တယ်၊ ဖြစ်စဉ်အမှန်ကို ကျွန်တော် ထွက်ဆိုပေးခဲ့တယ်၊ သူတို့လည်း ကားမီးလောင်စအချိန်မှာ ကိုအောင်ခန့်နဲ့ အတူရှိနေတဲ့ ကားသမား ကိုဝင်းစိုးအောင်(ခ)ထန်းလျက်ရယ်၊ မီးသတ်ဆေးဘူးနဲ့ ဝင်ငြှိမ်းပေးခဲ့သူရယ်ကို ခေါ်စစ်ဆေးပြီးပြီလို့ ကျွန်တော့်ကို ပြောပြတယ်၊ ဒီအမှုကို တည်ဆောက်ပြီး တရားစွဲဆိုခဲ့ရင် တရားရုံးမှာ တစ်ရက်တော့ မျက်မြင်သက်သေအဖြစ် လာရောက်ထွက်ဆိုပေးဖို့ ကျွန်တော့်ကို အကူအညီ တောင်းထားတယ်

 

Voice : အခုဖြစ်ရပ်နဲ့ ပတ်သက်ပြီး အစ်ကို့ဘက်က ဘာများ ဖြည့်စွက်ပြောချင်သေးလဲ ခင်ဗျာ။

 

KYNO : ကားမီးလောင်နေတာ မြင်လို့ ဝင်ကူညီရအောင် ကျွန်တော်က သွားခဲ့တာပါ၊ ဒါကို ဖေ့စ်ဘွတ်ခ်နဲ့ ဂျာနယ်တွေမှာ ဓာတ်ပုံနဲ့တကွ တရားခံတစ်ယောက်လို ဖော်ပြခံရတယ်၊ ကားပေါ်က အသက်ရှင် လွတ်လာသူ အောင်ခန့်နဲ့ ကျွန်တော် ယခင်က မသိခဲ့သလို မြင်လည်း မမြင်ဖူးဘူး၊ မီးလောင်တဲ့နေ့မှ မြင်တွေ့ခဲ့တာ၊ သူ့မိသားစုဆီ ဆက်သွယ်လို့ရအောင် ကျွန်တော့်ဖုန်း ပေးဆက်ခဲ့တာပါ၊ ဖြစ်စဉ်အမှန်ကို သေချာမစုံစမ်းဘဲ ဒီလိုသတင်းဖော်ပြခံရမှုက ကျွန်တော့်အတွက်ရော ကျွန်တော့်မိသားစုပါ အရမ်းထိခိုက် နစ်နာရပါတယ်။

 

Voice : အခုလို ဖြေကြားပေးတာ ကျေးဇူးပါ။

 

Credit:TheVoice