ရန်ကုန်လေဆိပ် လူသတ်ကောင် ဦးကြည်လင်းကို စေခိုင်းသူသည် ဘုရားခိုးဂိုဏ်းဝင် ဦးအောင်ဝင်းဇော် ဖြစ်နိုင်ကြောင်း ထုတ်ဖော်ပြောကြားခဲ့သူ ဦးအောင်စိုးက ထိုသို့ ဖွင့်ချပြောဆိုပြီး နောက်ပိုင်း သူ၏ ဆိုင်သို့ လာရောက်ဆံပင်ညှပ်၊ အလှပြင်သူဦးရေ သိသိသာသာ နည်းပါးသွားကာ စီးပွားရေး ထိခိုက်မှု ရှိလာကြောင်း ပြောသည်။

 

ယခင်အချိန်များက တစ်ရက်လျှင် ပျမ်းမျှကျပ် နှစ်သောင်းကျော် ဝင်ငွေရရှိလာခဲ့ရာမှ ယခုရက်ပိုင်းအတွင်း ယခင်ဝင်ငွေ၏ တစ်ဝက်ပင် မရရှိတော့ကြောင်း၊ ထိုသို့ဖြစ်ရခြင်းမှာ ထိုသို့ ထုတ်ဖော်ပြောကြားပြီး နောက်ပိုင်း ပုံမှန်ဖောက်သည်များကပင် သူ၏ ဆိုင်တွင် တစ်ခုခု ဖြစ်လာနိုင်မည်ကို စိုးရိမ်ထိတ်လန့်ကာ မလာရောက်ကြခြင်းကြောင့် ဖြစ်နိုင်ကြောင်း ဦးအောင်စိုးက ခန့်မှန်းသည်။

 

“ဒါကတော့ ကျွန်တော်တို့ လူမျိုးတွေရဲ့ အနေအထားပဲလို့ ကျွန်တော်တော့ ယူဆတယ်။ ထောင်ကျနေတုန်းကလည်း ထောင်ထဲမှာ ထောင်အရာရှိတွေကို အကျဉ်းသား အခွင့်အရေးရဖို့ တစ်ခုခု ကျွန်တော်က ထတောင်းဆိုတာနဲ့ အရင်က တပူးပူးနေခဲ့တဲ့ သူတွေက ခွာနေကြရော။ အခုလည်း ဒီလိုပဲထင်တယ်။ ကျွန်တော့်သတင်း ထွက်လာပြီးနောက်ပိုင်း ကျွန်တော့်ဆိုင်မှာ တစ်ခုခုများ ဖြစ်လာတော့မလား၊ ဖြစ်ချိန်မှာ သူတို့ရှိနေရင် ဘယ်လိုလုပ်မလဲဆိုတဲ့ စိုးရိမ်စိတ်တွေနဲ့ ပုံမှန်လာနေကျ ဖောက်သည်တွေတောင် မလာကြတော့ဘူး။ ကျွန်တော့်ဝင်ငွေ ထိခိုက်တာပေါ့” ဟု ၎င်းက ပြောသည်။

 

ဦးအောင်စိုးသည် ထောင်မှ လွတ်ငြိမ်းချမ်းသာခွင့်ဖြင့် ၂ဝ၁၄ ခုနှစ်တွင် ပြန်လွတ်လာပြီး နောက်ပိုင်း ကမာရွတ်မြို့နယ်တွင် ဆံသဆိုင် ဖွင့်လှစ်လုပ်ကိုင်ခဲ့ရာမှ ၂ဝ၁၆ ခုနှစ် မေလတွင် အင်းစိန်မြို့နယ်၊ ဖော့ကန်ရပ်ကွက်သို့ တစ်လ နှစ်သိန်းဖြင့် နေရာငှားရမ်းကာ ပြောင်းရွှေ့ဖွင့်လှစ်ခဲ့ကြောင်း၊ ယခုနှစ် ဇန်နဝါရီလမှ နောက်ထပ် ခြောက်လအထိ ထပ်မံငှားရမ်းဖွင့်လှစ်ထားကြောင်း သိရသည်။

 

ဦးအောင်စိုးသည် ဦးကိုနီကို လုပ်ကြံမှု ကျူးလွန်သူ ဦးကြည်လင်းနှင့် ယခင်ဘုရားခိုးမှု အမှုတွဲတစ်ခုတည်း ဖြစ်သူ ဦးအောင်ဝင်းဇော်တို့ကို ၂ဝ၁ဝ ပြည့်နှစ်ဝန်းကျင်က မန္တလေး အိုဘိုထောင် အဆောင်အမှတ် (၃) ၌ တွေ့ဆုံခဲ့ဖူးသူဖြစ်ပြီး ရန်ကုန်လေဆိပ် သေနတ်သမား ဦးကြည်လင်း၏ ဓာတ်ပုံကို အင်တာနက်တွင် တွေ့တွေ့ချင်းပင် ဦးအောင်ဝင်းဇော်၏ လက်ချက် ဖြစ်နိုင်ကြောင်း Myanmar Now ကို ဆက်သွယ်ပြောကြားခဲ့သူ ဖြစ်သည်။

 

ဦးအောင်ဝင်းဇော်သည် ပြီးခဲ့သည့် နှစ်လယ်ပိုင်းက ၎င်းထံသို့လာပြီး လူမျိုးခြား ဘာသာခြား နိုင်ငံခြား သံတမန်တစ်ဦးကို နေ့ခင်းကြောင်တောင်၊ ရန်ကုန်မြို့လယ်ခေါင်တွင် ပစ်သတ်ရမည့် အလုပ်ကို ကျပ် သိန်း ၁,ဝဝဝ အထိ ပေးမည်ဟု ကမ်းလှမ်းခဲ့ဖူးကြောင်း၊ ဦးကြည်လင်းနှင့် ဦးအောင်ဝင်းဇော်တို့ နီးနီကပ်ကပ် ဆက်ဆံမှုရှိသူ ဖြစ်ကြောင်း ဦးအောင်စိုးက ပြောကြားခဲ့သည်။

 

ယခုကဲ့သို့ ဦးအောင်စိုး ထုတ်ဖော်ပြောကြားခဲ့မှု သတင်းများ ထွက်လာပြီးနောက်ပိုင်း ဦးအောင်စိုး၏ လုံခြုံရေးကို စိတ်ပူမိသော်လည်း စိုးရိမ်တကြီးတော့ မဖြစ်ကြောင်း ဦးအောင်စိုး၏ ဇနီးဖြစ်သူ ဒေါ်သန်းသန်းအေးက ပြောသည်။

 

“အခုတော့ လုံခြုံရေးကို စိုးရိမ်တာပေါ့။ ဒါပေမယ့် မကြောက်ပါဘူး။ ကံပဲပေါ့။ ဘယ်သူတစ်ဦးက ဘာဖြစ်မယ်ဆိုတာ ကြိုမှမသိတာ။ တခြားက ကိုယ့်ကို ဘယ်အချိန် လာလုပ်ကြံမယ် ဆိုတာလဲ ကြိုမှမသိတာ။ အဲ့ဒါကြီးကို တွေးပူပြီး အိပ်မပျော် စားမဝင် ဖြစ်နေရင် ကိုယ်ပဲရောဂါရမှာပေါ့။ ဒါပေမယ့် ဒီလိုအချိန်မှာ သူ့လုံခြုံရေးကို အာဏာပိုင်တွေ အနေနဲ့ ပေးသင့်တယ်လို့တော့ ယူဆတယ်” ဟု ဒေါ်သန်းသန်းအေးက ဆိုသည်။

 

ထို့အတူ ဦးအောင်စိုး၏ လုံခြုံရေးကို စိတ်ပူမိကြောင်း ရပ်ကွက်နေ ပြည်သူတချို့က သာမက၊ ၎င်းနှင့်ရင်းနှီးကျွမ်းဝင်သူ ဖော့ကန်ရပ်ကွက်ရှိ အမျိုးသားဒီမိုကရေစီအဖွဲ့ချုပ်၏ အမေ့အိမ် စာသင်ကျောင်းမှ တာဝန်ရှိသူများကပါ ပြောကြသည်။

“ကျွန်မတို့ သူ့သတင်းကြားပြီး ကတည်းက သူ့အတွက် တော်တော်လေး စိတ်ပူမိတယ်။ သူက လူအေးပါ။ စိတ်ကောင်းစေတနာလည်း ရှိတဲ့သူ။ ငွေကြေးလည်း ပြည့်စုံတဲ့သူ မဟုတ်ဘူး။ သူ့ဆိုင်လေးကို ဒီမှာ ဆက်ဖွင့်ဖို့တောင်မှ သူ့ဆိုင်ကယ်လေးကို ပေါင်ပြီးတော့ စာချုပ်ထပ်ချုပ်ထားရတာ။ အခုလို သတင်းတွေကြောင့် သူ့ကို လာလုပ်ကြံမလားလို့ပေါ့။ ဒီလမ်းက ညဆို ၈ နာရီ ကျော်တာနဲ့ လူခြေတိတ်သွားပြီ။ အဲ့ဒါကြောင့် အခုဆို အိမ်ရှေ့မီးကိုတောင် တစ်ညလုံး ဖွင့်ထားလိုက်တယ်။ တစ်ခုခုဆို လင်းလင်းရှင်းရှင်း ဖြစ်နေအောင်” ဟု ဦးအောင်စိုးဆိုင် ရှေ့ဘက် မုန့်နှင့်အအေးဆိုင်ပိုင်ရှင် အမျိုးသမီးဖြစ်သူက ပြောသည်။

 

ဦးအောင်စိုးက သူ၏ လုံခြုံရေးအတွက် တာဝန်ရှိသူများဘက်က ယခုထိ တိုက်ရိုက်ပြောဆိုထားခြင်း မရှိသေးဟု ဖေဖော်ဝါရီ ၅ ရက်နေ့တွင် ပြောသည်။

“ကျွန်တော့်ကို ရဲတပ်ဖွဲ့က လုံခြုံရေး ယူပေးတယ် ဆိုတာမျိုး တိုက်ရိုက်လာပြောတာ မရှိသေးပါဘူး။ ဒါပေမယ့် ပတ်ဝန်းကျင်က လူတွေက အရပ်ဝတ်နဲ့ရဲတွေ သွားလာစောင့်ကြည့်ပေးနေတယ်လို့ ကျွန်တော့်ကို လာအသိပေးပါတယ်။ ကျွန်တော် အပြင်သွား အပြင်လာကိုလည်း လိုက်ပါပေးမပေး ကျွန်တော်မသိပါဘူး။ ကျွန်တော့်ကို လိုက်စောင့်ရှောက်ပေးပါတယ်လို့ လာမပြောထားတော့ ကျွန်တော်လည်း ဘယ်သွားမယ် ဘယ်လာမယ် ဆိုတာကို သူတို့ဆီ သတင်းပို့တာမျိုး မလုပ်ပါဘူး” ဟု ပြောသည်။

 

ဦးကိုနီကို လုပ်ကြံသူ ဦးကြည်လင်းကို ခိုင်းစေညွှန်ကြားသူသည် ဦးအောင်ဝင်းဇော် ဖြစ်နိုင်ကြောင်း Myanmar Now က သတင်းရေးသားပြီးနောက်ပိုင်း ဦးအောင်ဝင်းဇော်ကို လေဆိပ်လုပ်ကြံမှုပြီး နောက်တစ်နေ့တွင် ဘားအံမြို့၊ သံလွင်တံတား၌ ဖမ်းဆီးရမိခဲ့ကြောင်း ဖေဖော်ဝါရီ ၃ ရက်နေ့ ညနေပိုင်းတွင် သတင်းထုတ်ပြန်ခဲ့သည်။

 

Credit:TheVoice