ဧရာဝတီတိုင်းဒေသကြီး ပုသိမ်မြို့ ကမ်းနားလမ်း ရှုခင်းသာရင်ပြင်တွင် ဖေဖော်ဝါရီလ ၁ ရက်နေ့က ကျင်းပမည့် မန္တလေးမြို့ (မစိုးရိမ်တိုက်သစ်) ဆရာတော် ဘဒ္ဒန္တ ဝိစိတ္တာဘိဝံသ (ဦးဝီရသူ) ၏ တရားပွဲကို နိုင်ငံအတွင်း လက်ရှိဖြစ်ပေါ်နေသော လုံခြုံရေး အခြေအနေများကြောင့် ဒေသတွင်း တရားဥပဒေစိုးမိုးရေး၊ တည်ငြိမ်အေးချမ်းရေးအတွက် ခွင့်ပြုချက် မပေးနိုင်ကြောင်းကို လာရောက်တင်ပြသည့် ပုဂ္ဂိုလ်များထံ မေတ္တာရပ်ခံ တားမြစ်အကြောင်းကြားခဲ့ကြောင်း ဧရာဝတီတိုင်းဒေသကြီး အစိုးရအဖွဲ့ရုံးထံမှ သိရှိရသည်။

 

အဆိုပါ ဆရာတော်က ထေရဝါဒ ဗုဒ္ဓဘာသာ တရားတော်နှင့် မညီညွှတ်သော လူမျိုးရေးဆိုင်ရာ အမုန်းပွား ပဋိပက္ခ ဖြစ်စေသည်များကို ဟောပြောနေသည်ကို သိရကြောင်း၊ ဆရာတော်၏ ဟောပြောမှုများကြောင့် လူမှုကွန်ရက် စာမျက်နှာပေါ်တွင် အပြန်အလှန် ပြောဆိုရေးသားမှုများအရ ဆရာတော်အပေါ် ဝေဖန်ရေးသားမှုများ ရှိနေကြောင်း၊ ဦးကိုနီ လုပ်ကြံခံရမှုအပေါ် အခြေခံ၍ မလိုလားအပ်သော အခြေအနေများ မဖြစ်ပေါ်စေရေးအတွက် တားမြစ်ရခြင်း ဖြစ်ကြောင်း ဧရာဝတီတိုင်းဒေသကြီး အစိုးရအဖွဲ့မှ တာဝန်ရှိသူတစ်ဦးက ပြောကြားသည်။

 

“တရားပွဲကို စိစစ်လိုက်တော့ ဆရာတော် (ဦးဝီရသူ) ပါနေတာ တွေ့ရတယ်၊ တရားပွဲက မြို့ရဲ့အချက်အခြာကျတဲ့ နေရာမှာလည်း ဖြစ်နေတယ၊် လုံခြုံရေးအရ အတော်ကို အရေးကြီးပါတယ်၊ ဒါကြောင့် သက်ဆိုင်ရေး နယ်လုံဝန်ကြီးနဲ့ စည်ပင်ဝန်ကြီးရဲ့ မှတ်ချက်တွေအရ တိုင်းဒေသကြီး အစိုးရအဖွဲ့က အစည်းအဝေး ဆုံးဖြတ်ချက်နဲ့ လုပ်ဆောင်ရတာပါ” ဟု ဧရာဝတီတိုင်းဒေသကြီး စည်ပင်သာယာရေးဝန်ကြီး ဦးကျော်မြင့်က ပြောကြားသည်။

 

ပုသိမ်မြို့နယ် အထွေထွေအုပ်ချုပ်ရေး ဦးစီးဌာနက ဇန်နဝါရီလ ၃၁ ရက်တွင် ဆရာတော် ဦးဝီရသူ၏ တရားဟောခွင့်မရဟု အကြောင်းကြားခဲ့ကြောင်း၊ ဧရာဝတီတိုင်းဒေသကြီးအတွင်း တရားဟောခွင့် မရရှိသည့် ဆရာတော် ၄ ပါးတွင် ဆရာတော် ဦးဝီရသူ မပါသဖြင့် တရားဟောမည့် ဆရာတော်တွင် ထည့်သွင်းတင်ပြခဲ့ကြောင်း၊ လုံခြုံရေး အခြေအနေအရ ခွင့်မပြုခြင်းဟု သိရှိရ သဖြင့် ပြင်ဆင်ထားသော မုခ်ဦးများကို ဖျက်သိမ်းခဲ့ရကြောင်း တရားပွဲ ကျင်းပရေး လျှောက်ထားသူ ပုသိမ်မြို့ ဧရာဝတီ အမျိုးသားရေးကွန်ရက်မှ ဦးဇော်ဝေက ရှင်းပြသည်။

 

ဧရာဝတီ အမျိုးသားရေးကွန်ရက် ရှုခင်းသာရင်ပြင်တွင် နိဗ္ဗာန်ရောက်ကြောင်း တရားများ ဟောပြောရန် ဇန်နဝါရီလ ၃၁ ရက်တွင် ရွှေမစိုးရိမ်ကျောင်း ဆရာတော် (ပုသိမ်) ဘဒ္ဒန္တဝိဓယ သာသနာ့ ဓဇဓမ္မရိယနှင့် ဖေဖော်ဝါရီ ၁ ရက်တွင် မန္တလေးမြို့ (မစိုးရိမ်တိုက်သစ်) ဘဒ္ဒန္တပိစိတ္တာဘိဝံသ (ဦးဝီရသူ) တို့ တရားဟောကြားခွင့် ရရှိရေးအတွက် သက်ဆိုင်ရာ အုပ်ချုပ်ရေးအဖွဲ့ထံ တင်ပြခဲ့ကြောင်း ယင်းအရာဝတီ အမျိုးသားရေးကွန်ရက် အဖွဲ့ထံမှ သိရှိရသည်။ အဆိုပါ တရားပွဲ ဟောပြောခွင့် မပြုသည့် ကိစ္စနှင့် ပတ်သက်၍ ဆရာတော် ဦးဝီရသူကို ဖုန်းဖြင့် ဆက်သွယ်မေးမြန်းရာ ပြန်လည်ဖြေကြားခြင်း မရှိပေ။

 

 

Credit:TheVoice