ရန်ကုန် ရွှေပြည်သာမြို့နယ် ၈ ရပ်ကွက်မှာရှိတဲ့ ရွှေပြည်သာမိုတယ်ကို အောက်တိုဘာလ ၁ ရက်နေ့ ညသန်းခေါင်မတိုင်ခင်အချိန် လာရောက် ဆဲဆို ခြိမ်းခြောက်တယ်ဆိုပြီး ရွှေပြည်သာမြို့နယ် NLD ပြည်သူ့လွှတ်တော်ကိုယ်စားလှယ် ဦးဉာဏ်လင်းနဲ့ အပေါင်းပါနှစ်ဦးကို၊ ပုဒ်မ ၃ ခုနဲ့ မိုတယ်မန်နေဂျာက ရွှေပြည်သာမြို့မရဲစခန်းမှာ အမှုဖွင့်ထားပါတယ်။ 

 

လွှတ်တော်အမတ် ဦးဉာဏ်လင်းကတော့ ဒီမိုတယ်ဟာ ဥပဒေနဲ့ မညီတာတွေကို လုပ်ကိုင်နေတာကြောင့် ရပ်ကွက်က တိုင်ကြားထားလို့ ဝင်ရောက်စစ်ဆေးဖို့ အဲဒီမိုတယ်ကို သွားရောက်ခြင်းသာဖြစ်ကြောင်း သတင်းဌာနတွေကို ရှင်းပြခဲ့ပါတယ်။

“ကျနော် နဂိုကတည်းက ဒီကိုသွားတဲ့ ရည်ရွယ်ချက်ကိုက လေ့လာဖို့၊ တိုင်တဲ့တောတဲ့သူတွေ လုပ်သလို တကယ်ပဲ ပြစ်မှုတွေ ကျူးလွန်နေသလား၊ တံခါးပိတ်ပြီးတော့ နောက်ကွယ်မှာ မူးယစ်ဆေးဝါးမှုတွေ ဖြစ်နေသလား။ ခုနပြောသလို အမျိုးသမီးငယ်တွေကိုလည်း သူတို့ပြောသလို ဖျက်ဆီးနေတာလား။ ဒါလေးကို ကျနော် ကြည့်ဖို့သွားတာ။”

 

ဒါပေမယ့် ဦးဉာဏ်လင်းနဲ့အတူပါလာသူ ရပ်ကွက်အုပ်ချုပ်ရေးမှူးနဲ့ အခြားတဦးတို့ဟာ ရွှေပြည်သာမိုတယ်မှာ ကာရာအိုကေ သီချင်းဆိုဖို့ လာရောက်ခဲ့တာဖြစ်ပြီး၊ ကာရာအိုဆိုဖို့ ဝင်ခွင့်မပေးတဲ့အပေါ် မိုတယ်ဝန်ထမ်းတွေကို ဝိုင်းဝန်းဆဲဆို ခြိမ်းခြောက်ကြကြောင်း မိုတယ်မန်နေဂျာ မသင်းစံပယ်က မီဒီယာတွေကို ရှင်းပြပြီး CCTV ရုပ်သံမှတ်တမ်း အထောက်ထားတွေနဲ့ တင်ပြတိုင်ကြားခဲ့ခြင်း ဖြစ်ပါတယ်။

 

“အကိုတို့က ဘာကိစ္စရှိလို့ပါလဲမေးတော့ ကာရာအိုကေဆိုမယ်လို့ပြောတာနဲ့ ကာရာအိုကေမရဘူးအကို၊ ပိတ်ထားပါတယ်။ မရဘူး ငါတို့ကို တံခါးဖွင့်ပေး၊ ငါတို့ ဘယ်သူလဲသိလားလို့ သူတို့က ပြောပါတယ်။ နင်တို့က အထဲမှာ တံခါးတွေပိတ်ပြီး ဘာမဟုတ်တန်းတွေ လုပ်နေလဲလို့ ကျမကို အဲလိုမျိုး စွပ်စွဲပါတယ်။ အဲဒီအချိန်မှာ ဦးဉာဏ်လင်းဆိုတဲ့လူက ဖုန်းဆက်ပါတယ်။ ဘယ်သူ့ကို ဆက်မှန်းမသိပါဘူး။ အရပ်ပုပုနဲ့လူက ကျမကို ဆဲရေးတိုင်းထွာ ပြောဆိုပါတယ်။ ဦးဉာဏ်လင်း ဆိုတဲ့လူကလည်း ငါ ဘယ်သူလဲ နင်တို့သိလား သူ အဲ့အချိန်မှာ ဖုန်းခေါ်တယ်။ ဘယ်သူ့ကိုခေါ်လဲတော့ ကျမမသိဘူး။ ဖုန်းခေါ်တဲ့အချိန်မှာ ပြောပါတယ်။ ငါတို့ ရွှေပြည်သာမိုတယ်မှာ ရောက်နေတယ်။ လာခဲ့ အခု။ ငါတို့ ဒီဟိုတယ်ကို မြေလှန်ပစ်လိုက်မယ်။ သိန်း ၁၀၀ ပေးရင်တောင် မရဘူး။ မြေလှန်ပစ်လိုက်မယ်လို့ ကျမဟိုတယ်ကို လာခြိမ်းခြောက်ပါတယ်။” ဟု ခြိမ်းခြောက်ကြကြောင်း မိုတယ်မန်နေဂျာ မသင်းစံပယ်က မီဒီယာတွေကို ရှင်းပြပါတယ်။

 

လွှတ်တော်အမတ် ဦးဉာဏ်လင်းပေါ် စွဲဆိုထားတဲ့ အမှုနဲ့ပတ်သက်လို့ ရဲစခန်းက ဘယ်လို ကိုင်တွယ်ဖြေရှင်းမလဲ ဆိုတာကတော့ ရှင်းရှင်းလင်းလင်း မသိရသေးပါဘူး။ NLD ပါတီ ဗဟိုအလုပ်မှုဆောင်လည်းဖြစ် ပြောခွင့်ရလည်းဖြစ်တဲ့ ဦးဝင်းထိန်ကတော့ ဒီကိစ္စမှာ ပါတီက ဘာမှ ဝင်ရောက် စွက်ဖက်မှာ မဟုတ်ဘူးလို့ အောက်တိုဘာ ၄ ရက်နေ့က နေပြည်တော်မှာ သတင်းထောက်တွေကို ပြောကြားခဲ့ပါတယ်။

 

Credit:VOA