မြန်မာနိုင်ငံမှာ ပြန်လည်ကာ အခြေချနေထိုင်နေပြီဖြစ်တဲ့ သူမကတော့ တိုက်ဆိုင်မှုရှိလျှင်ဇာတ်ကားကြီးနဲ့ပရိသတ်အများ သတိထားမိခဲ့တဲ့ လိုင်လာခမ်းပဲဖြစ်ပါတယ်။ သူမဟာ အခုဆိုရင် မြန်မာပြည်မှာပဲနေထိုင်နေပြီဖြစ်ပြီး ဒုတိယကားကြီးအနေနဲ့ရာဇဝင်ရိုင်းသူများ ဇာတ်ကားကိုလဲ ရိုက်ကူးထားပါသေးတယ်။ 

ဒါ့အပြင်စီးပွားရေးအနေနဲ့လဲ Rhythm & Style Int’ Academy သင်တန်းကျောင်းကိုလဲ ဖွင့်လှစ်ထားသလို တစ်ဖက်ကလဲ အနုပညာလှုပ်ရှားမှုတွေကို ပုံမှန်လုပ်ဆောင်သွားမှာဖြစ်တယ်လို့ပြောလာပါတယ်။ အဆိုပါ သင်တန်းကျောင်းနဲ့ပတ်သက်ပြီး ပြည့်စုံစွာပြောပြလာသလို လက်ရှိသူမကြိုးစားဖြစ်နေတဲ့ သူမရဲ့အနုပညာအကြောင်းလေးကိုလဲ ပွင့်လင်းစွာပြောပြလာတဲ့အခါ :

 

>> အခုလက်ရှိ အနုပညာလှုပ်ရှားမှု အနေနဲ့ ဘာတွေလုပ်ဖြစ်နေလဲ။

 

ကျွန်မရဲ့ဒုတိယကားလေးဖြစ်တဲ့ ရာဇဝင်ရိုင်းသူများကို မျှော်နေတယ်။ အခုသူ့အတွက် ပရိုမိုးရှင်းတွေလုပ်တော့မယ်လို့ပြောပါတယ်။ နောက်တစ်ခုက ဦးမျိုးနဲ့ပဲ နောက်ထပ် ဇာတ်လမ်းတစ်ခုကိုတိုင်ပင်နေပါပြီ။ ဒီနှစ်ကုန်လောက်ကို အကောင်အထည်ဖော်ဖြစ်ပါမယ်။

 

>> ရာဇဝင်ရိုင်းသူများထဲမှာရော ဘယ်လိုပုံစံလေးဖြစ်မလဲ။

 

တိုက်ဆိုင်မှုရှိလျှင်နဲ့ လုံးဝ Total Opposite ဖြစ်သွားပြီ။ တိုက်ဆိုင်မှုရှိလျှင်မှာတုန်းက သူများအိမ်ထောင်ကို ဖျက်ဆီးတဲ့မိန်းကလေး၊ ရာဇဝင်ရိုင်းသူများမှာကျတော့ ကိုယ့်အိမ်ထောင်ကိုမပြုကွဲအောင် လိုက်ပြီးထိန်းသိမ်းနေရတဲ့ မိန်းမဖြစ်သွားတယ်ပေါ့။ အဲ့ဒီကာရိုက်တာလေးကိုသရုပ်ဆောင်ထားပါတယ်။

 

>> ရိုက်တဲ့ နှစ်ကားစလုံးက ကိုပြေတီဦးနဲ့ပဲနော်။

 

ဟုတ်ပါတယ်။ နောက်တစ်ကားကတော့ ကိုပြေတီဦးနဲ့မရိုက်ချင်တော့ဘူး။ ဒါပေမဲ့အဲ့ဒါကလဲ ဦးမျိုးအပေါ်မူတည်တာပေါ့နော်။ ဦးမျိုးကိုမေးတော့မေးထားတယ်။ ဒီတစ်ခေါက်ဘယ်သူနဲ့လဲပေါ့။

 

>> ကားကြီးတွေပဲလား။ ဗီဒီယိုအနေနဲ့ကျတော့ရော ဘယ်လိုရှိလဲ။

 

ဗီဒီယိုကိုလဲအရမ်းရိုက်ချင်ပါတယ်။ အရမ်းလဲစိတ်ဝင်စားတယ်။ ဒါပေမဲ့ပေါ့ပျက်ပျက် ဗီဒီယိုတွေဖြစ်သွားမှာလဲကြောက်တယ်။ အဲ့ဒါကြောင့် ဦးမျိုးတို့လို၊ ကိုဝိုင်းတို့လိုအရမ်းဝါရင့်ပြီးတော်တဲ့ ဒါရိုက်တာတွေက စည်းကမ်းတကျ၊ စနစ်တကျနဲ့ဆယ်ရက်လောက်အချိန်ပေးပြီးရိုက်မယ်ဆိုတဲ့ ဗီဒီယိုမျိုးဆိုရင်တော့ ကျွန်မရိုက်ချင်တယ်။ ဟိုလိုနှစ်ရက်၊ သုံးရက်နဲ့အပြီးရိုက်တဲ့ ဗီဒီယိုမျိုးဆိုရင်တော့ ကိုယ်ကလက်မခံချင်ဘူး။ အဲ့ဒီဟာလေးကြောင့် မရိုက်ဖြစ်သေးတာပါ။ တချို့ဗီဒီယိုတွေကျတော့လဲ ရိုက်ထားတာ တော်တော်လေးစနစ်ကျတယ်။ အဆင့်မြင့်လာတာတွေ့ရတယ်လေ။ အဲ့ဒီလိုမျိုးဆိုရင်တော့ ကျွန်မရိုက်ဖြစ်မှာပါ။

 

>> Rhythm & Style In’t Academy သင်တန်းကျောင်းလေး စဖွင့်ဖြစ်ခဲ့ပုံလေးကိုလဲပြောပြပေးပါဦး။

 

စလုပ်ဖြစ်တာကတဲ့ စိတ်ကူးလေးကတော့ ရိုးရှင်းပါတယ်။ ညီမလေးရယ် မမ ဆယ်ကျော်သက်အရွယ် ကိုယ်မြန်မာပြည်မှာရှိခဲ့တဲ့ အချိန်တုန်းက ကျောင်းတွေဘာတွေ ပိတ်တယ်ဆိုရင် အကသင်တန်းတွေအရမ်းတက်ချင်တယ်။ ကိုယ့်မှာပိုက်ဆံတတ်နိုင်တာတောင်မှ ဘယ်နေရာမှာ သွားတက်ရမှန်းမသိဘူး။ အဲ့ဒီအချိန်တုန်းက အနုပညာနဲ့ပတ်သက်တာ ၊ Styling နဲ့ပတ်သက်တာဆိုရင် အရမ်းနည်းနေသေးတယ်လေ။ အဲ့ဒီအခါကျတော့ အခုလက်ရှိအချိန်မှာ ဘယ်နိုင်ငံမဆို ညီမလေးသွားလို့ရှိရင် ရန်ကုန်ကနေ ဘန်ကောက်လောက်သွားရင်တောင်မှ မိန်းကလေးအားလုံးက အရမ်းစတိုင်ကျ၊ စမတ်ကျပြီး လှပနေတယ်။ ကိုယ့်နိုင်ငံလာလိုက်ရင် ကိုယ့်နိုင်ငံကမိန်းကလေးတွေက ပိုက်ဆံတတ်နိုင်ရင်တောင်မှ ခုချိန်ထိအဝတ်အစားဝတ်တာတို့ဘာတို့မှာလိုသေးတယ်။ အဲ့ဒါတွေအများကြီးစဉ်းစားမိတယ်။ ပြီးတော့ ဘောလိဝုဒ်နဲ့လဲကိုယ်ကဒီအချိန်မှာ အဆက်အသွယ်ရှိတယ်ဆိုတော့ အဲ့ဒီက အတတ်ပညာရှင်တွေနဲ့လဲအဆက်အသွယ်ရှိနေတော့ အားလုံးကိုခြုံပြီးကျောင်းလေးတစ်ကျောင်းဖွင့်မယ်ဆိုပြီးဖွင့်ခဲ့တယ်။ အဲ့ဒီတော့ လူငယ်တွေ အကတတ်ချင်ရင်အက၊ Style တတ်ချင်ရင် Style ၊ မိတ်ကပ်တတ်ချင်ရင်မိတ်ကပ်အားလုံးကိုတစ်နေရာထဲစုပေးထားမယ်ဆိုပြီး ဖွင့်ဖြစ်သွားတယ်။

 

>> ဖွင့်တာကရော ဘယ်လောက်ကြာသွားပြီလဲ။

 

အခုဖွင့်တာဆို တစ်လလောက်ပဲရှိသေးတယ်။ သြဂုတ် ၁ ရက်နေ့ကမှစဖွင့်တာပါ။

 

>> ဒီကျောင်းမှာရော အဓိကဘာတွေရမလဲ။

 

အစ်မအာရုံစိုက်ထားတာကတော့ ဘောလိဝုဒ် Dance ပေါ့။ ဘောလီးဝုဒ် Dance မှာမှ နှစ်မျိုးရှိပါတယ်။ တစ်မျိုးက ဘောလီးဝုဒ်အကကြီးပဲသီးသန့်နဲ့နောက်တစ်ခုက ဝိတ်ချတဲ့အကပေါ့။ ဘောလီးဝုဒ်အကဆိုတာ ကုလားအကကိုပြောတာမဟုတ်ဘူး။ အကပေါင်းစုံကို ခြုံပြီး ဘောလီးဝုဒ်အကလို့ခေါ်တာပါ။ အင်တာနေရှင်နယ်အကပေါ့။ ကကွက်တွေကိုလဲအသေးစိတ်တင်ပေးတယ်။ ဒုတိယတစ်ခုက Styling ပေါ့။ Styling မှာတော့ အစ်မကိုယ်တိုင်သင်ပေးတယ်။ အဲ့ဒီထဲမှာ အစ်မက အဝတ်အစားဝတ်ရုံတင်မဟုတ်ပဲ Self Language ထပ်ထည့်တယ်။ ဘယ်နေရာသွားရင်ဘယ်လိုနေရမယ်။ ဘယ်လိုထိုင်ရမယ်။ အင်တာဗျူးဖြေရင်ဘယ်လိုဖြေရမယ်။ အရှေ့လူကိုယ့်ကိုမြင်တာနဲ့ သဘောကျအောင်မြင်တာနဲ့ကျေနပ်အောင်ဘယ်လိုနေထိုင်ရမလဲဆိုတာတို့၊ နောက် တချို့စင်ပေါ်တက်ရင်ကြောက်တတ်တဲ့သူတွေအတွက် အဲ့ဒါတွေအကုန်လုံးကိုအသေးစိတ်သင်ပေးတယ်။ အဲ့ဒါတွေက Body Language ထဲမှာထည့်ထားတယ်။ နောက်အဝတ်အစားကို ဘယ်လိုတွဲဖတ်ဝတ်ဆင်ရမလဲဆိုတာတွေပါမယ်။ အဲ့ဒါက Styling ပိုင်းပေါ့။ နောက်ဟိုတယ်တွေသွားတဲ့အခါ စားတဲ့သောက်တဲ့နေရာမှာ စမတ်ကျနေအောင်စားတတ်အောင် ဘယ်ခရင်း၊ ဘယ်ဇွန်းကိုဘယ်လိုကိုင်ရမလဲပေါ့။ တကယ်ဆိုအများကြီးရှိတယ်။ ညီမလေးကိုယ်ကသာဘာမှ အရေးမကြီးဘူးလို့ထင်နေတာ တကယ်နိုင်ငံခြားသားတွေနဲ့သွားလာစားသောက်တဲ့အခါ စမတ်ကျနေအောင်ပေါ့။ အသေးစိတ်သင်ပေးတယ်။ အဲ့ဒါတွေက Styling မှာပါတယ်။ ပြီးရင် အိုက်တင်ပေါ့။ အိုက်တင်ကတော့ နိုင်ငံခြားကဆရာကတစ်ပတ်လာသင်တယ်။ မမကတစ်ပတ်သင်တယ်။ တစ်ယောက်တစ်လှည့်စီပေါ့။ ပြီးရင် မိတ်ကပ်ပေါ့။ အဲ့ဒါကိုအဓိကထားထားတယ်။ မိတ်ကပ်ကိုအိန္ဒိယကလာတဲ့ဆရာမကိုခေါ်ထားတယ်။ အသေးစိတ်သင်ပေးတယ်။ မမကအဲ့ဒါကိုနှစ်ပတ်Course ပေါ့။ နှစ်ပတ် Course က Certificate မရဘူး။ တစ်လ Course ကရတယ်။ နယ်ကလူတွေဖြစ်တဲ့အတွက် နှစ်ရက် Course လုပ်ပေးပါလို့တောင်းဆိုလို့ နှစ်ရက် Course ပါထပ်ထည့်ထားတယ်။

 

>> ဈေးနှုန်းကရော ဘယ်လိုသတ်မှတ်ထားလဲ။

 

အားလုံးကိုအဆင်ပြေအောင်လုပ်ထားပေးပါတယ်။ မမဈေးနှုန်းတွေက တစ်သိန်းကနေနှစ်သိန်းကြားထဲမှာပဲရှိပါတယ်။

 

>> အနုပညာနဲ့အခုလုပ်နေတဲ့စီးပွားရေးဆို ဘယ်ဖက်ကို ဦးစားပေးလုပ်ဖြစ်မလဲ။

 

မိန်းကလေးတစ်ယောက်အတွက် အနုပညာဆိုတာ အချိန်အကန့်အသတ်ရှိတယ်။ အစ်မကတော့ အမေခန်းတို့အဒေါ်ခန်းတို့ရိုက်ဖို့က အစီအစဉ်မရှိဘူး။ အဲ့ဒါကြောင့်ကိုယ့်အချိန်အကန့်အသတ်တစ်ခုလောက်ထိပဲ ဒီအနုပညာကိုလုပ်မယ်ဆိုတော့ နောက်ပိုင်းကျရင်တော့ စီးပွားရေးကပဲ လူတစ်ယောက်အတွက်အဓိကဖြစ်တယ်။ အခုချိန်မှာတော့ ပြိုင်လုပ်မယ်။ ဒါပေမဲ့တစ်ဖြည်းဖြည်းနဲ့တော့စီးပွားရေးကိုဦးစားပေးလုပ်သွားမယ်။ ပရိသတ်တွေမပြောခင်မှာကိုယ့်ဟာကိုယ်အသာလေးလစ်သွားတာပဲကောင်းပါတယ်။

 

>> အခုဆို မြန်မာနိုင်ငံမှာက ဖေ့စ်ဘွတ်လူမှုကွန်ယက်ဆိုတာ အရမ်းကိုခေတ်စားတယ်။ ကောင်းတာတွေရော ၊ ဆိုးတာတွေရောက တစ်နေ့မဟုတ်တစ်နေ့တက်နေတာဆိုတော့ မြန်မာနိုင်ငံကလူတွေသုံးကြတဲ့ လူမှုကွန်ယက်တစ်ခုအပေါ် အစ်မအမြင်လေးကိုလဲသိချင်ပါတယ်။

 

အမြင်ကတော့ ဖေ့စ်ဘွတ်ဆိုတာ အရမ်းကောင်းတဲ့အရပါ။ ဘယ်နိုင်ငံမှာဘာဖြစ်နေလဲ။ ပစ္စည်းဝယ်တာကအစ ရည်းစားထားတာအဆုံး ကောင်းတဲ့အရာတစ်ခုပါ။ ဒါပေမဲ့ ဒါကလဲ လူတွေအပေါ်မှာပဲမူတည်ပါတယ်။ ကောင်းတဲ့အရာတစ်ခုကိုဆိုးတဲ့အရာဖြစ်အောင်ပြောင်းလဲမယ်ဆိုရင် ကိုယ့်လက်ပေါ်မှာပဲရှိတယ်။ အခုအစ်မမြင်နေတာ လူတွေကဖေ့စ်ဘွတ်ပေါ်မှာ အပျော်သက်သက်၊ ပျော်စရာ၊ ပါးစရာ၊ တစ်ယောက်ကိုတစ်ယောက်ခင်မင်ဖို့၊ သူငယ်ချင်းများဖို့မသုံးကြပဲ တစ်ချို့ကျတော့ ဒိုင်ခံပြီး သူများသားသမီးတွေကိုပုပ်ခတ်ဖို့အတွက် သုံးကြတယ်။ အခုဆိုနီနီခင်ဇော်ကိစ္စနဲ့ပတ်သက်ပြီး အရမ်းဝမ်းနည်းတာပဲ။ ဒါသူများသားသမီး သူဟာမိန်းကလေးတစ်ယောက် သူ့ဘဝမှာဘယ်လိုပဲကျော်ဖြတ်လာကျော်ဖြတ်လာ ဘယ်သူနဲ့မှမဆိုင်တဲ့ ကိစ္စတစ်ခုပါ။ သူ့အနုပညာအလုပ်ကို သူကောင်းကောင်းလုပ်တယ်။ သူ့အနုပညာမှာ သူအကောင်းဆုံးဖြစ်နေတယ်။ သူဟာလူကောင်းတစ်ယောက်၊ လူယုတ်မာမဟုတ်ရင်တော်ပြီပေါ့။ သူဘယ်လိုဒုက္ခတွေကြုံခဲ့ရတယ်ဆိုတာ ကိုယ်က သွားမြင်ရတာမဟုတ်ဘူး။ ဘယ်လိုအကြောင်းအရာတွေကြောင့် ဒီလိုကိစ္စတွေကိုဖြတ်သန်းခဲ့ရလဲဆိုတာ ကိုယ်မသိဘူး။ ပျော်ပါးပြီးတော့ ဘယ်သူမှဒီကိစ္စကြီးကို မလုပ်ပါဘူး။ အပျော်သက်သက်တော့ အသက်ကြီးတဲ့သူကို ယူပြီး အသက်ငယ်ငယ်လေးမှာ ကိုယ့်ဘဝပျက်အောင်မလုပ်ဘူး။ ဒါသူ့မှာ တစ်ခုခုရှိခဲ့မှာပဲ။ အဲ့ဒါကိုအဲ့ဒီလောက်ကြီး ထိလှန်လှောပြီးတော့ ဘာဖြစ်လို့မပြောရတာလဲ။ ဘာညာဆိုတော့ ကျွန်မနည်းနည်းသိချင်တာက ဘာဖြစ်လို့ပြောရမှာလဲ။ ဘယ်သူ့ကိုပြောစရာ အကြောင်းရှိလဲ။ ကိုယ့်ထမင်း ကိုယ်စားနေတာလေ။ ကိုယ့်ဘဝရဲ့အရာ အားလုံးကိုလာပါ။ ငါပြောပြမယ်ဆိုပြီးပြောတဲ့သူရှိလား။ ဘာဖြစ်လို့မပြောပြတာလဲလို့မေးနေတဲ့သူတွေကရော သူတို့ဘဝရဲ့ဖြစ်သမျှအရာ အားလုံးကို ထပြီးလူတွေကိုပြောလား။ အဲ့ဒါကိုသိချင်တယ်နော်။ အဲ့ဒါကိုဖတ်မိတော့ အရမ်းစိတ်ဆိုးတယ်။ အရမ်းလဲဒေါသထွက်တယ်။ နီနီခင်ဇော်အတွက် စိတ်မကောင်းဘူး။ သနားမိတယ်။ သူများသားသမီးကို အဲ့ဒီလိုကြီးလိုက်ပြောနေရလားဆိုပြီး ဒေါသထွက်မိတယ်။ မင်းသားမင်းသမီးအကြောင်းကို သိချင်ကြတယ်ဆိုတာကို လက်ခံပါတယ်။ ဒါပေမဲ့ပြီးခဲ့တဲ့အရာတစ်ခုကိုလှန်ပြီးအရှက်ခွဲတာမျိုးကတော့ မကောင်းဘူးလို့ထင်ပါတယ်။ မိန်းမချင်းကိုယ်ချင်းစာရမှာပေါ့။ နောက်တစ်ခုကဘာသာရေး အလကားနေရင်း မဖြစ်ဖြစ်အောင်လိုက်ပြီး ကုလားဖန်ထိုးနေတာမျိုးကိုလဲဒေါသကထွက်တယ်။ ကွန့်မန့်တစ်ခုပေါက်ကရ တက်ပေးလိုက်ရင် အောက်ကလူတွေကဆဲမယ်။ ဘာတွေမှန်းကိုမသိဘူး။ အရမ်းကိုပျော်စရာကောင်းတဲ့ဟာကပျော်စရာမကောင်းတော့ပဲကြည့်လိုက်ရင် စိတ်အနှောက်အယှက်ဖြစ်စရာတွေပဲမြင်နေရတော့ ကိုယ့်ဟာကိုယ်တောင် နောက်ပိုင်းမှာမသုံးချင်တော့ဘူး။ သူများနိုင်ငံတွေမှာကအဲ့ဒီလိုမရှိဘူးကွာ။ ကိုယ့်နိုင်ငံမှာကအဲ့ဒီလိုရှိတော့ဝမ်းနည်းတယ်။ ဟိုမှာဆိုရင် မင်းသားမင်းသမီးကိုအများဆုံး အဲ့ဒီလိုမဝတ်သင့်ဘူး။ မစားသင့်ဘူး။ အဲ့ဒီလောက်ပဲ။ မှိုချိုးမျှစ်ချိုးပက်ပက်စက်စက်တွေက ဒီမှာအရမ်းများတယ်ဆိုတော့ မကောင်းဘူးပေါ့နော်။ ကိုယ့်ထမင်းကိုယ်စားပြီးငရဲထိုင်ဝယ်နေကြတယ်။ အဲ့ဒါကမဖြစ်သင့်ဘူးလို့ထင်ပါတယ်။

 

>> အစ်မအိမ်ထောင်ရေးအကြောင်းလေးကိုလဲသိချင်ပါတယ်။

 

အစ်မတူရကီမှာပဲအိမ်ထောင်ပြုခဲ့တယ်။ မင်္ဂလာပွဲကိုလဲ ဟိုမှာပဲ အကြီးအကျယ်လုပ်ခဲ့တယ်။ ဒီကလူတွေတော့ သိပ်မသိလိုက်ကြဘူး။ ဒီမြန်မာနိုင်ငံမှာလဲ သိပ်မလုပ်ဖြစ်ဘူးဆိုတော့လေ။ ဒီမှာက မလုပ်ချင်လို့မလုပ်တာပါ။ အားလုံးရဲ့အကြည့်အောက်မှာ မွန်းကြပ်ပြီး မနေချင်ဘူး။ အဲ့ဒါကြောင့်ဟိုနိုင်ငံမှာပဲ လုပ်ခဲ့တယ်။ အိမ်ထောင်သက်ကတော့ တစ်နှစ်ခွဲရှိပါပြီ။ ဓာတ်ပုံတွေကိုတော့ လုံးဝမတင်သေးတာပါ။ အမျိုးသားက တူရကီနိုင်ငံသားပါ။ သူက Civil Engineer PHD ဘွဲ့ရထားတဲ့သူတစ်ယောက်ပါ။ သူ့နာမည်ကတော့ Mostafa ပါ။

 

>> တစ်နှစ်ခွဲရှိပြီဆိုတော့ ကလေးယူဖို့ရောအစီအစဉ်ရှိပြီလား။

 

မျိုးဆက်ကတော့ မသစ်နိုင်သေးပါဘူး ညီမရယ်။ အခုကအချိန်က အရမ်းကိုကမောက်ကမဖြစ်နေတာ သူကမလေးရှားမှာ PHD တက်နေတယ်။ နောက်ဟိုမှာလဲ စားသောက်ဆိုင်တစ်ခုဖွင့်ထားတယ်ဆိုတော့ သူကဟိုမှာထိန်း၊ ကျွန်မကဒီမှာထိန်းဆိုတော့ ဒီကြားထဲကနေ မျိုးဆက်ကတော့မသစ်နိုင်သေးပါဘူး။

 

>> ပရိသတ်ကြီးကိုရော ရာဇဝင်ရိုင်းသူများဇာတ်ကားကြီးနဲ့ပတ်သက်ပြီး ဘာများပြောချင်သေးလဲ။

 

အရမ်းဆိုးသွမ်းခဲ့တဲ့ အိန်ဂျယ်လာကိုတောင် ဒီလောက်ချစ်တဲ့ပရိသတ်ကြီးကို ပြောချင်တာတစ်ခုက အရမ်းအရမ်းကို မိန်းမကောင်းပီသတဲ့ ၊ အိမ်ရှင်မကောင်းပီသတဲ့ စင်သီယာကိုလဲအရမ်းချစ်ပါလို့ပြောချင်ပါတယ်။

 

ခင်ဆွေသက်

 

Credit: Trend Myanmar