ဒလိုင်းလားမားနှင့် အမေးအဖြေ ဆွေးနွေးခန်း ပြုလုပ်ခဲ့သည့် လေဒီဂါဂါကို တရုတ်ပရိသတ်များ ဒေါသထွက်

28 Jun 2016 1,322 Views

ကမ္ဘာကျော် Popဂီတ အဆိုတော် တစ်ဦးဖြစ်သည့် ဂါဂါသည် တရုတ်တွင် ပရိသတ် အခိုင်အမာ ရရှိထားသူ ဖြစ်သည်။ သို့သော် တိဘက် ဘာသာရေးခေါင်းဆောင် ဒလိုင်းလားမားနှင့် ပြီးခဲ့သည့် သီိတင်းပတ်ကုန်က တွေ့ဆုံဆွေးနွေးမှု အစီအစဉ်အရ သူမသည် တရုတ်နိုင်ငံတွင် ဖျော်ဖြေပွဲများ ကျင်းပခွင့်ရရန် မရေမရာ ဖြစ်လာခဲ့သည်။ တရုတ်အစိုးရသည် ဂါဂါကို ပြည်ဝင်ခွင့် ပိတ်ပင်မည့် အနုပညာရှင်များ စာရင်းတွင် ထည့်သွင်းရန် စီစဉ်နေပြီဟုလည်း သတင်းအချို့က ဖော်ပြခဲ့သည်။ ဒလိုင်းလားမားကို တရုတ်အစိုးရက တိဘက်ခွဲထွက်ရေး လှုပ်ရှားမှု ခေါင်းဆောင်အဖြစ် သတ်မှတ်ထားပြီး ဘုန်းတော်ကြီးမှာ ပြည်ပတွင် တိမ်းရှောင်နေရသည်။

ဂါဂါနှင့် ဆွေးနွေးမှုတွင် နိုဘယ်လ်ငြိမ်းချမ်းရေးဆုရှင် ဒလိုင်းလားမားက ၎င်းသည် တရုတ်အရေးနှင့် ပတ်သက်၍ အလယ်အလတ် နည်းလမ်းမျိုးဖြင့် ချဉ်းကပ်နေခြင်းဖြစ်ကြောင်း၊ တိဘက်ကို လွတ်လပ်စွာ ကိုယ်ပိုင်အုပ်ချုပ်ခွင့် ပေးရန်သာ ရည်မှန်းပြီး ခွဲထွက်ရန် တောင်းဆိုနေခြင်း မဟုတ်ကြောင်း မိန့်ကြားခဲ့သည်။ ဇွန် ၂၆ ရက်က ကမ္ဘာကျော် လူပုဂ္ဂိုလ်နှစ်ဦး တွေ့ဆုံမှုနှင့် ပတ်သက်၍ တရုတ် လူမှုကွန်ရက်ဝက်ဘ်ဆိုက် Weiboတွင် ဂါဂါအပေါ် အပြင်းအန် ဝေဖန်မှုများ ရှိခဲ့သည်။ ဂါဂါ၏ ပရိသတ်များ ကိုယ်တိုင်က ထိုကိစ္စကို ရှုတ်ချခဲ့ပြီး လူနည်းစု ပရိသတ် အချို့ကသာ ဆွေးနွေးမှုများသည် လက်ခံနိုင်လောက်သည့် အတိုင်းအတာမျိုးသာ ဖြစ်ကြောင်း ကာကွယ် ပြောဆိုခဲ့သည်။ ပရိသတ် အများစုက ဂါဂါသည် ရူးမိုက်သူ၊ စိတ်ကြီးဝင်သူ အစရှိသည့် မှတ်ချက်များ ပေးခဲ့သည်။

တစ်ဦးက “သူက တရုတ်ပရိသတ်တွေရဲ့ သဘောထားကို စိတ်ဝင်စားပုံ မရဘူး”ဟု ဆိုသည်။ ဒလိုင်းလားမားနှင့် ဆက်နွှယ်မှုသည် တရုတ်နိုင်ငံတွင် အတိမ်းအစောင်း မခံသည့် အခြေအနေတစ်ရပ်အဖြစ် ရှိနေဆဲဟု သိရသည်။ ပြီးခဲ့သည့် နှစ်ပိုင်းများအတွင်း အနောက်နိုင်ငံများမှ အနုပညာရှင် အချို့တို့သည် ထိုကိစ္စကြောင့် တရုတ်တွင် ဖျော်ဖြေမည့် အစီအစဉ်များကို ဖျက်သိမ်းခဲ့ရဖူးသည်။ ဧပြီလကလည်း Popအဆိုတော် ဆယ်လီနာဂိုမက်ဇ်သည် ဒလိုင်းလားမားနှင့် အတူတွဲရိုက်ထားသည့် ဓာတ်ပုံကို လူမှုကွန်ရက်ပေါ် မျှဝေမိသည့်နောက် တရုတ်တွင် ဖျော်ဖြေမည့် အစီအစဉ်ကို ဖျက်သိမ်းရန် အကြောင်းဖန်လာခဲ့သည်။ သူမသည် အစောပိုင်းက ဂွမ်ဇူးနှင့် ရှန်ဟိုင်းတို့တွင် ဩဂုတ်လအတွင်း သွားရောက်ဖျော်ဖြေရန် စီစဉ်ထားခြင်း ဖြစ်သည်။

Credit : http://www.7daydaily.com/