မွေးကင်း စကလေးကို အရှင် လတ်လတ် မြေမြှုပ်ခဲ့တဲ့ မိခင်
29 Feb 2016 1,428 Views
ထိုင်းနိုင်ငံ ခွန်ခဲခရိုင်မှာ မွေးကင်းစကလေးကို ဓားနဲ့ ၁၄ ချက်ထိုးပြီး အရှင်လတ်လတ် မြေမြှုပ်ခဲ့တဲ့ မိခင်ကို ဖမ်းဆီးလိုက်ပါတယ်။
ကလေးကို မလိုချင်တာကြောင့် သတ်လိုက်တာလို့ အသက် ၄၂ နှစ်အရွယ် အမျိုးသမီး ဆုဒါသောင်ဒီက ၀န်ခံခဲ့ပြီး ကျူးလွန်ခဲ့တဲ့ ဖြစ်ရပ်ကို ဖေဖော်ဝါရီ ၂၇ ရက်က ပြန်လည် သရုပ်ပြခဲ့တယ်လို့ ထိုင်းဘန်ကောက်ပိုစ် သတင်းက ရေးပါတယ်။
သရုပ်ပြတဲ့အချိန် အမျိုးသမီးကို လုံခြုံရေး အစောင့်အကြပ် တင်းတင်းကြပ်ကြပ်ချထားပြီး လူတွေက သူကို ဆဲရေးတိုင်းထွာခဲ့ပါတယ်။ ခွန်ခဲခရိုင် နောင်ဆ၀မ်ရွာက စပါးခင်းမှာ အချက်ပေါင်းများစွာ ဓားထိုးခံရပြီး အရှင်လတ်လတ် မြေမြှုပ်ခံထားရတဲ့ ကလေးကို ဖေဖော်ဝါရီ ၂၃ ရက်မှာ မွေးမြူရေးလုပ်ငန်းရှင်က တွေ့ရှိပြီး ကယ်တင်ခဲ့တာဖြစ်ပါတယ်။
ကလေးကို ခွန်ခဲဆေးရုံ အထူးကုသဆောင်မှာ ကလေးကို ကုသပေးနေပြီး ဓားဒဏ်ရာ ၁၄ ချက်ရသလို ဒဏ်ရာထဲကို အညစ်အကြေးတွေ ၀င်ခဲ့ပေမယ့် အသက်မသေလို့ ဆေးရုံ ၀န်ထမ်းတွေက ကလေးကို အီဒင်း (ကမ္ဘာမြေရနံ့) လို့ အမည်ပေးထားပါတယ်။
ကလေးကို တွေ့ရှိခဲ့ပြီးတဲ့နောက် ကလေးမိခင်ကို စုံစမ်းစစ်ဆေးသူတွေက ရှာဖွေခဲ့ပြီး ဖေဖော်ဝါရီ ၂၆ ရက် ညနေမှာ ဆုဒါကို သံသယနဲ့ ဖမ်းဆီးခဲ့ပါတယ်။ အီဒင်းကို မြှုပ်ထားတဲ့နေရာမှာ အမျိုးသမီးနဲ့ လင်ယောက်ျားတဦးကို တွေ့ရတယ်လို့ မျက်မြင်သက်သေတွေက ဆိုပါတယ်။
ဆုဒါရဲ့ ရုပ်ပိုင်းဆိုင်ရာကို စစ်ဆေးခဲ့ရာမှာ လွန်ခဲ့တဲ့ ၅ ရက်က ကလေးမွေးဖွားခဲ့တာကို တွေ့ရှိခဲ့ရသလို နောက်ပိုင်းမှာ ဆုဒါက ၀န်ခံခဲ့တာ ဖြစ်ပါတယ်။ ဆုဒါနဲ့ခင်ပွန်းတို့ကို သစ်ပင်ခုတ်ဖို့ ငှားရမ်းရာမှာ အလုပ်လုပ်ရင်း ကလေးကို မွေးဖွားခဲ့တာဖြစ်သလို ကလေးကို ဓားနဲ့မထိုးခင် ချက်ကြိုးကို သစ်သားစနဲ့ ဖြတ်ခဲ့တယ်လို့ ဆိုပါတယ်။
ဒီနောက် ကလေးလည်ပင်းကို ပလတ်စတစ်အိတ်နဲ့ ချည်နှောင်ပြီး သေအောင်သတ်ခဲ့တာ ဖြစ်ပါတယ်။ နောက်မှာတော့ ကျင်းတူးပြီး မြေမြုပ်ကာ သစ်ရွက်ခြောက်တွေနဲ့ ဖုံးအုပ်ခဲ့တာ ဖြစ်ပါတယ်။ ဆုဒါကို သတ်ဖြတ်ရန်ကြိုးစားမှု၊ ရက်ရက်စက်စက် တိုက်ခိုက်မှုနဲ့ အသက် ၉ နှစ်အောက် ကလေးကို စွန်ပစ်မှုတွေနဲ့ စွဲဆိုထားပါတယ်။
ကလေးဟာ မြေကြီးထဲမှာ ဘယ်လောက်နေခဲ့ရသလဲဆိုတာ မသိခဲ့ရဘူးလို့ ဆိုသလို ထိုင်းရတ်သတင်းကတော့ ကလေးက သတိပြန်လည်လာပြီး ဆရာဝန်တွေက ကြပ်မတ်ကုသနေတယ်လို့ ဆိုပါတယ်။ သတင်းထွက်ပေါ်လာပြီးတဲ့နောက်မှာ ကလေးကို မွေးဖို့ တောင်းဆိုမှုတွေရှိသလို ကလေးအတွက် ကူညီထောက်ပံ့လှူဒါန်းမှုတွေ လက်ခံရရှိနေပါတယ်။
