လိင်ပြောင်းသူတွေ စစ်မှုထမ်းခွင့် သမ္မတ Biden ပြန်လည်ခွင့်ပြုမည်

26 Jan 2021 2,024 Views

အမေရိကန် စစ်တပ်မှာ လိင်အင်္ဂါပြောင်းထားသူတွေ တာဝန်ထမ်းဆောင်ခွင့် တားမြစ်ထားတာကို ပယ်ဖျက်ဖို့ သမ္မတသစ် ဂျိုးဘိုင်ဒန်က တနင်္လာနေ့မှာ သမ္မတအမိန့်တရပ်ကို ထုတ်ပြန်လိုက်ပါတယ်။ ၂၀၁၆ မှာ သမ္မတ Barack Obama လက်ထက်က လိင်အင်္ဂါပြောင်းသူတွေ စစ်တပ်ထဲဝင်ခွင့် ပြုခဲ့သလို ကိုယ်ဖြစ်ချင်တဲ့ ကျား- မ အင်္ဂါ ပြောင်းဖို့ ဆေးကုသခွင့်လည်း ပြုထားတာ ဖြစ်ပါတယ်။

ဒါပေမယ့် သမ္မတ ဒေါ်နယ်ထရမ့်တက်လာချိန်မှာတော့ နဂိုလိင်ပြောင်းထားသူတွေကို ဆက်လက် တာဝန်ထမ်းဆောင်ခွင့် ပြုပေမယ့် နောက်ထပ်စစ်တပ်ထဲ ဝင်ချင်သူ ဆိုရင်တော့ လက်မခံပဲ တားမြစ်ခဲ့တာပါ။ လိင်ပြောင်းထားသူတွေ စစ်တပ်တာဝန်ထမ်းဆောင်ခွင့် မပြုပဲထားတဲ့ ခွဲခြားထားတာကို ဒီကနေ့ ပယ်ဖျက်လိုက်ကြောင်းနဲ့ အမေရိကန်နိုင်ငံမှာ စစ်တပ်ထဲ ဝင်ဖို့ အရည်ချင်း ရှိသူတိုင်း ပွင့်ပွင့်လင်းလင်း နဲ့ သိက္ခာရှိရှိ ဝင်ရောက်တာဝန်ထမ်းဆောင်နိုင် တော့မှာ ဖြစ်ကြောင်း သမ္မတဘိုင်ဒန်က တွစ်တာမှာ ရေးပါတယ်။

သမ္မတထရမ့်တုန်းကတော့ လိင်ပြောင်းသူတွေကို စစ်တပ်ထဲမှာ တာဝန်ထမ်းဆောင်စေ တာဟာ အနှောက်အယှက် ဖြစ်စေသလို စားရိတ်လည်း ကြီးစေတယ်လို့ ပြောပြီး ၂၀၁၇ မှာ မူဝါဒ အသစ်ချမှတ်ကြောင်း ကြေညာခဲ့တာပါ။ အခုလို သမ္မတဘိုင်ဒန်က မူဝါဒပြောင်းလဲလိုက်တာအတွက် ထောက်ခံကြောင်း ကာကွယ်ရေးဝန်ကြီးသစ်ဖြစ်တဲ့ အငြိမ်းစားကြည်းတပ် ဗိုလ်ချုပ်ကြီး Lloyd Austin က ပြောကြားခဲ့ပါတယ်။

အမေရိကန်စစ်တပ်မှာ တာဝန်ထမ်းဆောင်ဖို့ အရည်ချင်း ပြည့်မှီသူတိုင်း လွတ်လပ် ပွင့်လင်းစာ ထမ်းဆောင် ခွင့်ရှိစေမယ့် ဒီလုပ်ဆောင်ချက်ကို သူထောက်ခံကြောင်းနဲ့ ကာကွယ်ရေးဝန်ကြီးဌာန အနေနဲ့ ဒီကိစ္စအတွက် ချက်ချင်း အရေးယူ ဆောင်ရွက်မှာ ဖြစ်ကြောင်းလည်း သူက ကြေညာချက် ထုတ်ပြန်ပြောဆိုခဲ့တာပါ။

Source : VOA