တောင်ကိုရီးယားတွင် ကိုရိုနာဗိုင်းရပ်စ် လူနာများပြားလာပြီး ဆေးရုံများမဆံ့တော့
04 Mar 2020 1,686 Views
ကိုရိုနာဗိုင်းရပ်စ် Covid-19 ကြောင့် အကြီးအကျယ်ဒုက္ခရောက်နေသော အာရှနိုင်ငံများထဲမှာ တောင်ကိုရီးယား ပါဝင်လာပြီလို့ ဆိုရမှာဖြစ်ပြီး ကိုရိုနာဗိုင်းရပ်စ် ကူးစက်ခံရသော လူနာများ ပို၍ပို၍ များလာသဖြင့် ဆေးရုံတွင် လူများများ မဆံ့တော့သည့်အခြေအနေကို ဆိုက်ရောက်နေပြီဖြစ်သည်။
Today Online သတင်းအရ မတ်လ ၄ ရက် (ယနေ့) တစ်ရက်ထဲမှာပင် ၁၅၆ ယောက်ကျော်ကို ကူးစက်ခံလူနာစာရင်းမှာ ထပ်တိုးမှတ်တမ်းတင်ထားရကြောင်း သိရသည်။
လူနာများ တစ်ရက်ထက်တစ်ရက် တိုးလာသဖြင့် ဒယ်ဂူမြို့မှာရှိတဲ့ ဆေးရုံတွေမှာ နေရာအခက်အခဲတွေ ရင်ဆိုင်နေရပါတယ်။ လူနာကုတင်မဆံ့တော့တဲ့အတွက် ဆေးရုံတက်ဖို့ တန်းစီစောင့်နေတဲ့ လူနာပေါင်း ၂,၃၀၀ ကျော်ရှိကြောင်း သိရသည်။
တောင်ကိုရီးယားသမ္မတ မွန်းဂျေအင် က ဗိုင်းရပ်စ်ဖြစ်ပေါ်နေမှုကို စစ်ပွဲဖြစ်နေသည့် အခြေအနေဟု ကြေညာချက်ထုတ်ပြန်ခဲ့ပြီး နှာခေါင်းစည်းများ ပြတ်လပ်နေမှုအတွက်လည်း တောင်းပန်လိုက်ပါတယ်။ ဗိုင်းရပ်စ်ဖြစ်ပွားမှုကြောင့် ထိခိုက်နစ်နာနေရတဲ့ အသေးစားလုပ်ငန်းများကိုလည်း ထောက်ပံ့ပေးသွားမည်ဟု မတ်လ ၃ ရက်နေ့က ကတိပြုခဲ့ပါတယ်။
လက်ရှိမှာတော့ တောင်ကိုရီးယားနိုင်ငံမှာ ကိုရိုနာဗိုင်းရပ်စ် ကူးစက်ခံရမှုပေါင်း ၅,၃၂၈ ဦး ရှိနေပြီး ၃၂ ဦး သေဆုံးကာ လူပေါင်း ၂,၃၀၀ ဝန်းကျင် ဆေးရုံတက်ရန် တန်းစီစောင့်ဆိုင်းနေရကြောင်း သိရှိရသည်။
