နေ့တိုင်းအနိုင်ကျင့်ခံရလို့ သေပါရစေလို့ တောင်းဆိုနေတဲ့ လူပု ကလေးလေး (ရုပ်သံ)
21 Feb 2020 2,735 Views
သြစတေးလျနိုင်ငံက အသက် ၉ နှစ်အရွယ် Quaden အမည်ရတဲ့ ကလေးလေးဟာ လူပုလေးတစ်ဦး ဖြစ်နေတာကြောင့် ကျောင်းမှာ နေ့စဉ်နေ့တိုင်း အနိုင်ကျင့်ဗိုလ်ကျခံနေရကို ခံနိုင်ရည်မရှိတော့တဲ့အဆုံး “ကျွန်တော်ကို သတ်လိုက်ပါ၊ ကျွန်တော် သေပါရစေလို့” သူ့ရဲ့မိခင်ကို ဝမ်းနည်းပက်လက် ငိုကြွေးပြီး တောင်းဆိုနေတဲ့ ရုပ်သံဟာ ပျံ့နှံ့သွားခဲ့ပါတယ်။ ရုပ်သံမှာ မိခင်ဖြစ်သူက အရွယ်နဲ့မမျှအောင် စိတ်ခံစားမှုတွေရနေတဲ့ သားအတွက် လူတွေကို ဘာကြောင့် အခုလို ဆက်ဆံနေရတာလဲလို့ ဝမ်းနည်းစွာနဲ့ မေးခွန်းထုတ်လိုက်ပါတယ်။
ရုပ်သံမှာ ကလေးပြောခဲ့တဲ့ စကားတွေက အလွန်ကြေကွဲစရာကောင်းပါတယ်။ ကိုယ့်နှလုံးသားကို ကိုယ်ဓါးနဲ့ ပြန်ထိုးမယ်။ အတန်းထဲမှာ အားလုံးက သူ့ကိုလှောင်ပြောင်စရာအဖြစ်ပဲ မြင်ကြတယ်၊ အခုချက်ခြင်း သေချင်တယ်။ မှန်ကိုခေါင်းတဲ့ပြေးဆောင့်ပြီး သတ်သေမယ်။ တစ်ယောက်ယောက်က ငါ့ကို ဓားနဲ့ထိုးသတ်ပါတော့ လို့ ပြောတာကို တွေ့ခဲ့ရပါတယ်။
ဒီရုပ်သံကို မိခင်က အွန်လိုင်းပေါ်တင်ခဲ့ပြီး သူ့သားလေးဟာ ကျောင်းမှာ ပျော်ပျော်ရွှင်ရွှင်နဲ့ ပညာသင်ကြားရမယ့်အစား တစ်နေ့တစ်မျိုး မရိုးနိုင်တဲ့ ဝိုင်းဝန်းအနိုင်ကျင့်မှုတွေကိုသာ ခံစားနေရကြောင်း၊ နာမည်ပြောင်တွေ တစ်မျိုးပြီးတစ်မျိုးနဲ့ လှောင်ပြောင် ခေါ်နေကြကြောင်း၊ ကျွန်မ လူတွေကို သိစေချင်ပါတယ်၊ ဒီအဖြစ်ပျက်ဟာ ကျွန်မတို့မိသားစုတွေက် ဘယ်လောက်တောင် နာကျင်ခံစားရလဲဆိုတာ။ မိဘတွေအနေနဲ့ ဒီလိုမျိုးတွေမဖြစ်အောင် ကိုယ့်ကလေးတွေကို သေချာလေး သင်ကြားပေးစေလိုပါတယ်။ ဒါဟာ အနိုင်ကျင့် ဗိုလ်ကျခံရခြင်းကြောင့် ရရှိလာတဲ့ အကျိုးဆက်တွေပါလို့ ပြောကြားခဲ့ပါတယ်။
ဒီရုပ်သံပျံ့နှံ့ခဲ့ပြီးနောက်မှာ စာနာသနားတတ်တဲ့လူတွေက “We Stand with Quaden” လှုပ်ရှားမှုတွေ ပြုလုပ်လာခဲ့ပါတယ်။ ဒီသတင်းကြောင့် အမေရိကန်နိုင်ငံက လူပုလေးလည်းဖြစ်တဲ့ နာမည်ကြီးလူရွှင်တော် Brad William က GoFundMe page မှာ Quaden ကို Disney land ပို့ပေးဖို့ ရံပုံငွေရှာဖွေခဲ့ရာ အခုဆိုရင် အမေရိကန်ဒေါ်လာ ၁၅၀,၀၀၀ နေပြီဖြစ်ပါတယ်။
ဒါ့အပြင် William က Quaden ကို သိစေချင်ပါတယ် အနိုင်ကျင့်ခံရမှုဆိုတာ သည်းခံစရာမဟုတ်ဘူးဆိုတာ၊ ပြီးတော့ အခုလိုထူးခြားတဲ့ လူတစ်ယောက်အတွက် ပျော်ရွှင်မှုတွေနဲ့ ထိုက်တန်တယ်ဆိုတာကို သိစေချင်ပါတယ် လို့ ဆိုပါတယ်။
သူတို့သားအမိနှစ်ယောက်စလုံးကို အမေရိကားကိုခေါ်ပြီး အကောင်းဆုံး ဟိုတယ်မှာထားမယ် ပြီးရင် Disney Land ကို လိုက်ပို့ပေးမယ်။ ဒီလိုလုပ်ပေးရတာဟာ Quaden တစ်ယောက်ထဲအတွက် မဟုတ်ပါဘူး၊ အနိုင်ကျင့်ခံခဲ့ရတဲ့ လူတွေအားလုံးကိုယ်စား ဖြစ်ပါတယ်လို့ ဆိုပါတယ်။
လူပုအဖြစ် မွေးဖွားလာတာဟာ ရှက်စရာ၊ လှောင်ပြောင်စရာမဟုတ်ပါဘူး။ မျိုးဗီဇတစ်ခုကြောင့် အခုလို မွေးဖွားလာကြတာဖြစ်ပြီး လူပုလေးတွေထဲမှာ ကမ္ဘာကျော်တွေ အများကြီးရှိပါတယ်။ အနီးစပ်ဆုံးပြောရရင် Game Of Throne ရုပ်သံဇာတ်လမ်းတွဲထဲက တိုင်ရန်လန်နက်စတာ အဖြစ် သရုပ်ဆောင်ခဲ့တဲ့ Peter Dinklage ဟာ ဟောလိဝုဒ်မှာ အောင်မြင်နေတဲ့ အမေရိကန်ရုပ်ရှင်သရုပ်ဆောင် တစ်ဦးဖြစ်ပါတယ်။
