ဦးနှောက်သွေးခဲရောဂါကြောင့် ပင်လုံဆေးရုံမှာ ဆေးကုသမှုခံယူနေရတဲ့ ဗေလု၀

13 Jan 2020 1,907 Views

လူရွှင်တော်အဖြစ် ပရိသတ်တွေကို ရယ်မောပျော်ရွှင်စေသူ၊ ဟာသသရုပ်ဆောင်အဖြစ် ပရိသတ်တွေရဲ့အမောတွေကို ပြေပျောက်စေသူ၊ စာရေးဆရာအဖြစ်လဲလုပ်ကိုင်သေးတဲ့ သရုပ်ဆောင်အကယ်ဒမီ ဗေလု၀ဟာဆိုရင် နှစ်ပေါင်းများစွာအနုပညာလောကထဲမှာ ကျင်လည်နေခဲ့သူဖြစ်ပြီး ပရိသတ်တွေအားပေးချစ်ခင်ရတဲ့ အနုပညာရှင်တစ်ယောက်ပါ။ သဘောမနောလဲ အင်မတန်ကောင်းတဲ့ ဦးဗေဟာဆိုရင် “လယ်သူမ” ဆိုတဲ့ ကျေးလက်ထမင်းဆိုင်ကိုဖွင့်လှစ်ထားပြီး ကားရိုက်နားတဲ့ရက်တွေမှာတော့ လာသမျှဧည့်သည်တွေကို သူကိုယ်တိုင် ဟင်းပွဲလျာတွေ တည်ခင်းဧည့်ခံကျွေးမွေးလေ့ရှိသူပါ။

>>Read More ကိုနှိပ်ပြီး ဆက်လက်ဖတ်ရှုပါ<<

အသက်အရွယ်တစ်ခုသို့ရောက်ရှိလာပြီဖြစ်တဲ့ ဦးဗေဟာ လက်ရှိမှာ ဦးနှောက်သွေးကြောပိတ်ရောဂါကြောင့် အရေးပေါ်ဆေးရုံတင်ထားရတယ်လို့ သိရပါတယ်။ ဦးဗေလု၀ရဲ့ကျန်းမာရေးသတင်းတက်လာချိန်မှာတော့ ပရိသတ်တွေက စိုးရိမ်ခဲ့ကြသလို ခင်မင်ရင်းနှီးသူ အနုပညာရှင်တစ်ချို့ကလဲ ဆေးရုံထိသွားရောက် သတင်းမေးမြန်းခဲ့ကြပါတယ်။

လေဖြန်းရောဂါကိုစတင်ခံစားရပြီးနောက် ယခုလိုမျိုး ဦးနှောက်သွေးခဲကာ ပင်လုံဆေးရုံကို အရေးပေါ်ဆေးရုံတင်ခဲ့ရတဲ့ ဦးဗေလု၀ရဲ့ လက်ရှိအခြေအနေကတော့ ကိုယ်လက်ပြန်လည်လှုပ်ရှားလာနိုင်သော်လည်း စကားတော့ ကောင်းကောင်းမပြောနိုင်သေးဘူးလို့ သိရပါတယ်။ ဒါ့အပြင် မင်းသားနေတိုးရဲ့နာမည်မှလွဲ၍ လူတွေကိုလဲ မမှတ်မိသေးဘူးလို့သိရပါတယ်။ ထိုအကြောင်းကိုတော့ ဦးဗေလု၀ရဲ့ အသိမိတ်ဆွေ စာရေးဆရာမိုးပွင့်မှ သူ့ရဲ့ဖေစ့်ဘွတ်မှာယခုလို ရေးသားထားတာဖြစ်ပါတယ်။

“ကိုဗေ စကားကောင်းကောင်း မပြောနိုင်သေးတာက လွဲရင်ခြေလက်အားလုံး လှုပ်ရှားနိုင်ပါတယ်။လူနာမည်တော့ သိပ်မမှတ်မိသေးပါ။ကျနော့်ကို မှတ်မိလား မေးတော့ ခေါင်းညိတ်ပြပြီး နေတိုး နေတိုးလို့ ပြန်ပြောပါတယ်။ဘယ်သူ့နာမည်ကို မေးမေး နေတိုးလို့ပဲ ဖြေပါတယ်။သူ့ဘာသာ အိမ်သာသွားနိုင်ပေမဲ့ လူတွဲပေးထားရပါတယ်။ တစ်ပတ်လောက် စောင့်ကြည့်ရမယ်လို့တော့ ဆေးရုံက ပြောပါတယ်။ ဆန်ပြုတ်သောက်နိုင်ပါတယ်။ လှဲအိပ်ချင်နေပါတယ်။ ဧည့်သည်တွေ လာလာမေးနေကြလို့ အနည်းငယ် ပင်ပန်းနေပုံရပါတယ်။ သူ့ပရိသတ်များမစိုးရိမ်ကြဖို့ သူ့ဇနီး မစုက ပြောပါတယ်” ဆိုပြီး ဦးဗေလု၀ရဲ့ လက်ရှိကျန်းမာရေးအခြေအနေကို သတင်းစကားပါးထားတာဖြစ်ပါတယ်။

ပရိသတ်ကြီးရေ… အသက်အရွယ်တစ်ခုရလာချိန်မှာ ကျန်းမာရေးမကောင်းဖြစ်လာတဲ့ဦးဗေတစ်ယောက် အမြန်ဆုံးပြန်လည်သက်သာလာစေဖို့ ဆုတောင်းစကားလေးတွေ ဆိုပေးသွားပါဦးနော်….

Photos_AKon Thi

(ပိုပိုလေး)