အွန်လိုင်းကနေ အလှပြင်ပစ္စည်းဝယ်ယူတတ်သူတွေ သတိထား
27 Nov 2019 2,258 Views
ယနေ့ခေတ်မှာ ထိုင်ရာကနေမထပဲ အွန်လိုင်းပေါ်ကနေ ဈေးဝယ်ရတာလောက် သက်သာလွယ်ကူတဲ့ အလုပ် ရှိတော့မယ်မထင်ပါ။ အချိန်ကုန် လူပင်ပန်း သက်သာရုံသာမက အထူးလျှော့ဈေးတွေလည်း ရတတ်တာမို့ အွန်လိုင်းပေါ်ကနေ တစ်ခါဈေးဝယ်ဖူးရင် နောက်ထပ်နောက်ထပ် ဝယ်ဖို့ ဝန်လေးနေတော့မှာ မဟုတ်ပါဘူး။
အွန်လိုင်းပေါ်မှာ ဈေးဝယ်ရတာ ကောင်းကျိုးရှိသလို ဆိုးကျိုးတွေလည်း ရှိပါတယ်။ ပြထားတာကတစ်မျိုး ကိုယ်ဝယ်လိုက်ပြီး ရောက်လာတဲ့အခါ တစ်မျိုးဖြစ်နေတတ်ပါတယ်။ အဝတ်အစားတွေဆိုရင် အတုအစစ်၊ အဆင်ပြေ မပြေဆိုတာကို ချက်ခြင်းသိနိုင်ပေမယ့် အလှပြင်ပစ္စည်းတွေ၊ အသားအရေထိန်းသိမ်းရေးပစ္စည်းတွေကျတော့ အတုလား အစစ်လားဆိုတာ ချက်ခြင်း မသိနိုင်ပါဘူး။ သုံးစွဲပြီးတော့မှ သိလာရတဲ့အခါ ငွေကြေးဆုံးရှုံးမှုသာမက အသားအရေတွေကိုပါ ထိခိုက်ပျက်ဆီးရတဲ့ ကြီးမားတဲ့ ဆိုးကျိုးတွေ ရသွားနိုင်ပါတယ်။
ဒါကြောင့်မို့ ကိုယ့်ရဲ့ အသားအရေပေါ်မှာ သုံးမယ့် အလှပြင်ပစ္စည်းတွေကို အွန်လိုင်းကနေ ဝယ်မယ်ဆိုရင် အထူး(အထူး)သတိထားဖို့လိုပါတယ်။ စိတ်ချရနဲ့ အမှတ်တံဆိပ်ကုမ္ပဏီတွေက ရောင်းချနေတာလား၊ ဒါမှမဟုတ် ဘာမှအာမခံချက်မပေးနိုင်တဲ့ သူတွေက ရောင်းချနေတာလားဆိုတာကို လေ့လာဆန်းစစ်ပြီးမှ ဝယ်ယူဖို့ စဉ်းစားဆုံးဖြတ်သင့်ပါတယ်။
လတ်တလောမှာတော့ အွန်လိုင်းပေါ်မှ အလှပြင်ပစ္စည်းတွေ ဝယ်ယူခဲ့ပြီး ပစ္စည်းအတုတွေကြောင့် မျက်နှာအသားအရေတွေ မီးလောင်ကျွမ်းသလို ပျက်ဆီးကွာကျခဲ့တဲ့ Fun Sin Wen ဆိုသူ အမျိုးသမီးက သူ့ရဲ့ အဖြစ်ပျက်နဲ့ယှဉ်ပြီး သတိပေးပြောကြားလိုက်ပါတယ်။
သူမဟာ ဘယ်ကနေထုတ်လုပ်မှန်းမသိတဲ့ အသားအရေထိန်းသိမ်းရေးခရင်မ်ကို အွန်လိုင်းပေါ်မှာ ကြောငြာကောင်းပြီး စျေးသက်သာတာကြောင့် ဝယ်လိမ်းခဲ့ရာမှာ မျက်နှာက လောင်ကျွမ်းခဲ့ပြီးနောက် အသားတွေခြောက်ကပ်ကွာကျလာတဲ့ထိ ဖြစ်နေရကြောင်း ရေးသားထားပါတယ်။
သူမရဲ့ ဓါတ်ပုံနဲ့အတူ အလှပြင်ပစ္စည်းတွေ အတုပြုလုပ်နေတဲ့ အလုပ်သမားတွေရဲ့ ဓါတ်ပုံအချို့ကိုလည်း ဝေမျှထားပါတယ်။ ဒါကြောင့်မို့ အသားအရေပေါ်မှာ သုံးမယ့်ပစ္စည်းတွေကို ဝယ်တဲ့အခါမှာ ပိုက်ဆံသက်သာတာကို မကြည့်ဖို့နဲ့ ယုံကြည်စိတ်ချရတဲ့ အမှတ်တံဆိပ်တွေကိုသာ သုံးစွဲကြဖို့ သူမက လက်တွေ့ခံစားနေရပြီးမှ ဝေမျှပြောကြားခဲ့တာဖြစ်ပါတယ်။
