ပရိတ်သတ်တွေကို ကောင်းကောင်းရှင်သန်ပေးပါ ဆိုပြီး တောင်းဆိုလိုက်တဲ့ IU

26 Nov 2019 1,550 Views

ပရိတ်သတ်အချစ်တော် အဆိုတော်၊ သရုပ်ဆောင် IU ဟာ နိုဝင်ဘာ ၂၄ ရက်နေ့မှာ သူမရဲ့ တစ်ကိုယ်တော် ဖျော်ဖြေပွဲ Love Poem Concert ကို ပရိတ်သတ်နဲ့အတူ ကျင်းပပြုလုပ်နေခဲ့တာပဲဖြစ်ပါတယ်။

24 ရက်နေ့ဟာ အဆိုတော်၊ သရုပ်ဆောင် ဂူဟားရား သေဆုံးသွားတဲ့နေ့ဖြစ်ပါတယ်။ IU က တစ်ကိုယ်တော် ဖျော်ဖြေပွဲရဲ့ နောက်ဆုံးတင်ဆက်မှုအနေနဲ့ Dear Name သီချင်း မဖျော်ဖြေခင်မှာ ပရိတ်သတ်ကို အားပေးနှစ်သိမ့်တဲ့ စကားတချို့ပြောခဲ့ပါတယ်။

“ဒီလို အခြေအနေမျိုးမှာ ကျွန်မဒီနေရာမှာ ရပ်ပြီး သီချင်းဆိုနေရမယ်လို့ ထင်ကိုမထင်ခဲ့ဘူး။ ကျွန်မကောင်းကောင်း ဆိုနိုင်လိမ့်မယ်မထင်ဘူး ဒါပေမဲ့ ဒါက နောက်တစ်ခါ ပြန်ဆိုတာမို့ ကိစ္စတော့သိပ်မရှိပါဘူး။ ကျွန်မ သိပ်ပြီး မဆိုနိုင်တာမျိုးဖြစ်ခဲ့ရင် ကျေးဇူးပြုပြီး အတူတူလိုက်ဆိုပေးကြပါ”

“ဒီသီချင်းကို ရေးခဲ့တုန်းက ဒီလို ခံစားချက်မျိုးတွေရှိခဲ့တဲ့အချိန်ပေါ့ ဒါကြောင့် ဒီအခြေအနေကြီးကို ကျွန်မကိုယ်တိုင် ကျော်ဖြတ်ဖူးပြီးပြီမို့ ကျွန်မကောင်းကောင်းနားလည်တယ်၊ ဒါပေမဲ့ ပရိတ်သတ်တွေကို ကျွန်မစိုးရိမ်ပူပန်နေမိတယ်၊ ကောင်းကောင်း ရှင်သန်နေပေးပါနော် ချစ်တယ်…….အားလုံးပဲ ဆက်ပြီးအားတင်းထားကြပါ”

“ကျွန်မ ရှင်တို့ကိုချစ်တယ် ဒီလို အခြေအနေမျိုးမှာ တစ်ယောက်ကိုတစ်ယောက် ပိုချစ်ပေးရမှာ လောကကြီးက ဒီလိုမျိုးအရမ်းရက်စက်တဲ့နေရာကြီး ဖြစ်နေပေမယ့်လည်း လူတွေက တစ်ယောက်ကိုတစ်ယောက် ချစ်ချစ်ခင်ခင် နေထိုင်သွားရင် ပျော်စရာကောင်းလာမှာပါ။ ” ဆိုပြီး ပြောသွားပါတယ်။

IU ဟာ ပြီးခဲ့တဲ့ အောက်တိုဘာတုန်းက မိမိကိုယ်ကိုယ် အဆုံးစီရင်သွားခဲ့တဲ့ Sulli နဲ့ အခင်မင်အရင်းနှီးဆုံး သူငယ်ချင်းတွေ ဖြစ်ခဲ့သလို အခုလတ်တလော ဆုံးပါးသွားပြီဖြစ်တဲ့ Goo Ha Ra နဲ့လည်း ခင်မင်ခဲ့သူတစ်ဦးဖြစ်ပါတယ်။ သူငယ်ချင်းနှစ်ယောက်လုံး လောလောလတ်လတ် ဆုံးရှုံးထားရတဲ့ IU ကို ပရိတ်သတ်တွေ စိုးရိမ်ပူပန်နေကြပါတယ်။

IU တစ်ယောက် သူပြောသလို ကောင်းကောင်းရှင်သန်ပြီး မိသားစု၊ သူငယ်ချင်း၊ ပရိတ်သတ်တွေနဲ့အတူ ပျော်ပျော်ရွှင်ရွှင် အသက်ထက်ဆုံးနေထိုင်သွားနိုင်ပါစေလို့ ဒီနေရာကနေပဲ ဆုတောင်းမေတ္တာပို့သလိုက်ပါတယ်။

Ref:koreaboo

(ပိုပိုလေး)