ဆံပင်နက်မှောင် သန်စွမ်းဖို့ အကောင်းဆုံးက ဆန်ဆေးရေ
25 Nov 2019 1,941 Views
“ယောကျ်ားတို့ဘုန်း လက်ရုံး၊ မိန်းမတို့ဘုန်း ဆံထုံး” ဆိုတဲ့ မြန်မာစကားပုံလေးအတိုင်း အမျိုးသမီးတွေအတွက်တော့ နက်မှောင်သန်စွမ်းပြီး ဖြောင့်စင်းတဲ့ ဆံပင်တွေပိုင်ဆိုင်ထားတာက မိန်းကလေးတစ်ယောက်ရဲ့ ဘုန်းကျက်သရေကို ပိုတိုးစေပါတယ်။
ဆံပင်တို၊ ဆံပင်ကောက်လေးတွေ ဘယ်လောက်ပင် ခေတ်စားနေပါစေ ဆံပင်အရှည်လေးနဲ့ မြန်မာဆန်ဆန် လှနေတဲ့ အမျိုးသမီးတွေကိုတော့ လူတိုင်းက နှစ်ခါပြန် ငေးကြည့်ရတတ်ပါတယ်။
ဆေးဆိုးလွန်းလို့ ဆံပင်တွေပျက်ဆီးတာ၊ ဆံပင်ကျွတ်တာ၊ ဆံပင်မသန်တာတွေအားလုံးကို သဘာဝအတိုင်း ငွေကြေးအကုန်ကျသက်သာစွာနဲ့ ပြန်လည် ကုစားနိုင်မယ့် နည်းလမ်းလေး တစ်ခုကို ဖော်ပြပေးလိုက်ပါတယ်။
မြန်မာ့ဆေးနည်းအရ ဆန်ဆေးရေဟာ တစ်ကယ်ဆေးဘက်ဝင်ပါတယ်၊ ဆီးအောင့်နေတဲ့အခါ သုံးခါမြောက်ဆေးထားတဲ့ ဆန်ဆေးရေကို မသွန်ပစ်ပဲခံထားပြီး သောက်ပေးပါက ခဏအတွင်း ဆီးအောင့်ဝေဒနာ ပျောက်ကင်းပါတယ်။
ဆန်ဆေးရေဟာ ဆံပင်တွေကို နက်မှောင်သန်စွမ်းစေတယ်ဆိုတာကိုတော့ သိတဲ့သူနည်းပါးပါတယ်။ ဆံတွေတွေ နဂိုအတိုင်း နက်မှောင်သန်စွမ်းလာစေဖို့ အောက်ပါနည်းအတိုင်း လုပ်ဆောင်နိုင်ပါတယ်။
လိုအပ်သောပစ္စည်းများ
- ဆန် လက်ဖက်ရည်ပန်းကန် ၁ လုံး
- အဖုံးပါ ဖန်ပုလင်းအလွတ် သန့်သန့် တစ်လုံး
- ရေဖြန်း(စပရေး) တစ်ဗူး
နည်းလမ်း
၁။ ဆန်ကို ခွက်တစ်လုံးတွင် ထည့်ပြီး ပထမ တစ်ရေ အညစ်အကြေးတွေ ပြောင်အောင်ဆေးကြောပါ။
အကယ်၍ အလွန်ညစ်နေသော ဆန်ဖြစ်ပါက နှစ်ရေခန့် ဆေးကြောပြီး ထိုရေများကို သွန်ပစ်ပါ။
၂။ ရေနှစ်ဖန်ခွက် ထည့်ပြီး ဆန်များကို လက်ဖြင့် နာနာညှစ်ပြီး ဆေးပါ။
၃။ ထိုရေကို ဖန်ပုလင်းလွတ်ထဲသို့ သိမ်းပါ။ ထို့နောက် ဆန်စေ့များပါ ဖန်ပုလင်းထဲသို့ ထည့်ပါ။
၄။ ပုလင်းကို အဖုံးလုံအောင်ပိတ်ပြီး အချဉ်ပေါက်စေရန် ၂၄ နာရီကြာ ထားပါ။
၅။ ၂၄ နာရီစိမ်ထားပြီးသော ဆန်ဆေးရေကို အရေသက်ချည်း သက်သက် ရေဖြန်းဗူးထဲ ပြောင်းထည့်ပါ။
၆။ ဆံပင်၏ အရင်းနားကို ရေဖြန်းဗူးနဲ့ နှံ့အောင်ဖြန်းပြီး ၃ မိနစ်ကနေ ၅ မိနစ်လောက်ထိ ဦးရေပြားထဲရောက်အောင် နှိပ်နယ်ပေးပါ။
၇။ ထို့နောက် မိနစ် ၂၀ နာရီဝက်ခန့် အခြောက်ခံထားလိုက်ပါ။
၈။ ထိုနောက် ခေါင်းကို ရိုးရိုးရေနဲ့ ပုံမှန်အတိုင်း ပြန်လျှော်ပါ။
ဒီနည်းအတိုင်း တစ်ပတ်လျှင် တစ်ကြိမ်ပြုလုပ်ပေးရုံနဲ့ နက်မှောင်သန်စွမ်းသော ဆံကေသာကို အချိန်တိုအတွင်း ပြန်လည်ပိုင်ဆိုင်ရမှာဖြစ်ပါတယ်။
