Country ညမှာ မူးလာ ဘာကြောင့်ငိုရသလဲ?

22 Nov 2019 1,853 Views

တစ်နိုင်ငံလုံး စောင့်မျှော်ကြည့်ရှုနေကြတဲ့ Myanmar Idol (Top 8) ရဲ့ ဖျော်ဖြေတင်ဆက်မှုကြီးဟာဆိုရင် ပြီးခဲ့တဲ့ နိုဝင်ဘာ ၂၁ ရက်နေ့မှာ မြင်တွေ့ခဲ့ရပြီးဖြစ်ပါတယ်။ Top 8 ပြိုင်ပွဲဝင်တွေဖြစ်ကြတဲ့ Benjamin Sum ၊စောခရစ်မူးလာ၊ နော်စေးစေးထူး၊ အက်စတာဒေါ့ချင်းသ်ဆုံ၊ အေးမြဖြူ၊ ယောကီး၊ တန်ခွန်ကျော် နဲ့ ထက်အဉ္ဇလီ တို့က တစ်ယောက် တစ်မျိုးစီ မတူညီတဲ့ country စတိုင် သီဆိုဖျော်ဖြေမှုတွေကို တင်ဆက်သွားခဲ့ပြီးဖြစ်ပါတယ်။

စောခရစ်မူးလာဟာ ဒီအပတ်မှာ တေးသံရှင် ရင်ဂိုရဲ့ ‘အတောင်ပံပါရင် မင်းဆီကို’ သီချင်းနဲ့ ဖျော်ဖြေတင်ဆက်သွားခဲ့ပါတယ်။ မူးလာဟာ မူရင်း သီချင်း သီဆိုသူ ‘ရင်ဂို’ ရဲ့ပုံစံပျောက်သွားမှာ စိုးတာရယ်၊ မူလ သီချင်းရဲ့ အနှစ်သာရ ပျောက်သွားမှာရယ်ကို စိုးရိမ်ပြီး သီဆိုဖျော်ဖြေပြီးနောက်မှာ အမျိုးအမည်မသိတဲ့ ခံစားချက်တွေ ရောထွေးသွားကာ စတိတ်စင်ပေါ်မှာ မျက်ရည်ကျသွားခဲ့ပါတယ်။

သီဆိုဖျော်ဖြေပြီးတဲ့အချိန် မျက်ရည်တွေကျနေတဲ့ မူးလာကို MC ဖြစ်တဲ့ ကိုကျော်ထက်အောင်က ပခုံးဖက်အားပေးခဲ့ပြီး ‘စိုးရိမ်မှုတေွ အားလုံး ဖြေဖျောက်သွားပြီးနောက်မှာ မျက်ရည်ကျသွားတာလား’ ဆိုပြီး ဒိုင်လူကြီးတွေထဲ တစ်ဦးအပါအဝင်ဖြစ်တဲ့ ဖြူဖြူကျော်သိန်းက မေးမြန်းတဲ့ အခါမှာ မူးလာက ‘ဟုတ်တယ်’ ဆိုပြီး ခေါင်းညိတ် ဖြေကြားသွားပါတယ်။ “မူးလာ ဘာလို့ငိုတာလဲ တကယ်တော့ ငိုရလောက်အောင်လည်း ကောင်းပါတယ်” ဆိုပြီး ဖြူဖြူက မူးလာကို မှတ်ချက်ပေးသွားပါတယ်။ “သီချင်းကို ပျက်စီးသွားမှာတွေ စိုးရိမ်နေခဲ့တယ်လို့ ပြောလိုက်တာကြားလိုက်ရတော့ မမအရင်ဆုံး အားပေးချင်တာက မူးလာက ဒီသီချင်းကို ကိုယ့်ပုံစံအတိုင်း ဆိုသွားနိုင်တယ်” ဆိုပြီး ပြောပြသွားပါတယ်။

ဒိုင်တွေထဲက ဝါအရင့်ဆုံး အသက်အကြီးဆုံး ဒိုင်လူကြီးတစ်ဦးဖြစ်တဲ့ ဦးလတ်က “ဒီညမှာ မင်းဟာ ယောင်္ကျားဖြစ်တယ်ဆိုတာ ဦးသိလိုက်ပြီ ယောင်္ကျား မျက်ရည်ကို မြင်လိုက်ရတယ်” ဆိုပြီး ပြောပြသွားပါတယ်။

ဒိုင်လူကြီးတွေထဲက ဝါရင့်အမျိုးသမီး အဆိုတော် မတင်ဇာမော်က Country ညမှာ မူးလာ ငိုတာနဲ့ ပတ်သတ်ပြီး “ဒီသီချင်းကို မူးလာရဲ့ ပုံစံအတိုင်း အကောင်းဆုံး ဖျော်ဖြေသွားနိုင်တယ် မူးလာရဲ့ အစ်မတစ်ယောက်အနေနဲ့ ဒီညမှာ မူးလာ ငိုသွားတာကို အစ်မ တကယ် စိတ်မကောင်းဘူး” ဆိုပြီး သူမ ခံစားချက်ကို ပြောပြရင်း မှတ်ချက်ပေးသွားခဲ့ပါတယ်။

မူးလာဟာ အမြဲလိုလို စနောက်နေတတ်ပြီး ပျော်ပျော်နေတတ်သူ တစ်ဦးဖြစ်ပါတယ်။ ဒါပေမဲ့ ပြီးခဲ့တဲ့ ညမှာတော့ ပျော်ပျော်နေတတ်တဲ့ မူးလာ မျက်ရည်ကျခဲ့တာကြောင့် မူးလာရဲ့ ပရိတ်သတ် ‘မူလီလေး’ တွေ စိတ်မကောင်းဖြစ်ခဲ့ရပါတယ်။ ဒိုင်တွေအနေနဲ့လည်း စိတ်မကောင်းဖြစ်နေတဲ့ မူးလာကို အားပေးစကား အသီးသီးပြောသွားခဲ့တာကြောင့် မူးလာတစ်ယောက် ခွန်အားအပြည့်နဲ့ Myanmar Idol ရဲ့ ခြေလှမ်းနောက်တစ်ဆင့်ကို တက်လှမ်းနိုင်လိမ့်မယ်လို့ မျှော်လင့်စောင့်စားရင်း…………..

Ref:Channel 9

(ပိုပိုလေး)