ကိုရီးယားဇာတ်လမ်းတွဲ စွဲနေတဲ့ ဇနီးကို အိမ်ပေါ်ကနေ ကန်ချ
20 Nov 2019 2,233 Views
လူတိုင်းမှာ စွဲလန်းမှုတစ်ခု ကိုယ်စီရှိကြတာပါပဲ။ အစားအသောက်မြင်ရင် မနေနိုင်အောင် စွဲလန်းသူ၊ မူးယစ်ဆေးစွဲ၊ အရက်စွဲ၊ ဂိမ်းစွဲ စသည်ဖြင့် စွဲလန်းနေကြတာပါပဲ။ အဲဒီအထဲမှာ အမျိုးသမီးတွေရဲ့ နောက်ဆုံးပေါ် စွဲလန်းတဲ့ ရောဂါကတော့ ကိုရီးယား ဒရာမာစီးရီး၊ ကိုရီးယားသီချင်းတွေ စွဲလန်းတဲ့ ကီုရီးယားရောဂါ ဖြစ်ပါတယ်။ ဒီရောဂါက အသက်အရွယ် ငယ်ငယ်ကြီးကြီး အရွယ်မရွေး စွဲလန်းနေကြတဲ့ ခေတ်ပေါ်ရောဂါ ဖြစ်ပါတယ်။
လက်တလောမှာတော့ ကိုရီးယားရုပ်သံဇာတ်လမ်းတွဲတွေ အစွဲလန်းကြီးစွဲလန်းလွန်းလို့ ခင်ပွန်းသည်က ဒဏ်မခံနိုင်တော့တဲ့အဆုံး အိမ်ပေါ်ကနေ ကန်ချခံလိုက်ရတဲ့ အမျိုးသမီးတစ်ဦးက သူမရဲ့အဖြစ်ကို ရင်းနှီးတဲ့ မိတ်ဆွေတွေနဲ့ အွန်လိုင်းပေါ်မှာ တိုးတိုးကျိတ်ကျိတ် ရင်ဖွင့်တိုင်ပင်ရင်း တစ်ယောက်ယောက်က ဖွလိုက်ရာကနေ အားလုံးသိကုန်တဲ့ ရှက်စရာအဖြစ်ပျက်တစ်ခု ဖြစ်သွားခဲ့ပါတယ်။
ဒါပေမယ့်လည်း အခုလို အားလုံးသိကုန်ရာကနေ ဒီလိုပြဿနာမျိုးကို သူမတစ်ယောက်ထဲ ကြုံနေရတာ မဟုတ်ဘူးဆိုတာကို ပြန်သိလိုက်ရတာက အဆိုးထဲက အကောင်းဖြစ်သွားခဲ့ပါတယ်။
မလေးရှားနိုင်ငံက ဖေ့စ်ဘွခ်သုံးစွဲသူ Kisah Rumah Tangga က သူမရဲ့ အဖြစ်ပျက်ကို အခုလို ပြောပြခဲ့ပါတယ်။ သူတို့လင်မယားဟာ အိမ်ထောင်သက် ၆ နှစ်ကြာပြီဖြစ်ပြီး ကလေး တစ်ယောက် ရှိပါတယ်။ ခင်ပွန်းဖြစ်သူက အလွန်အေးဆေးသူဖြစ်ပြီး အလုပ်ကြိုးစားသူလည်းဖြစ်ပါတယ်။ ဒါ့အပြင် အိမ်ထောကင်မှုကိစ္စတွေကိုလည်း လုပ်တတ်သူပါ။ သူမကတော့ ကိုရီးယားနဲ့ ပက်သက်တာမှန်သမျှ မလွတ်တမ်းအားပေးတဲ့ အခိုင်အမာပရိသတ်ဖြစ်ပါတယ်။ ဒီလိုနဲ့နေလာခဲ့ကြပြီး လွန်ခဲ့တဲ့ နှစ်ရက်လောက် ကိုရီးယားဇာတ်လမ်းတွဲတစ်ခု ကြည့်နေစဉ် ခပ်အေးအေးနေတတ်တဲ့ သူမရဲ့ခင်ပွန်းဟာ တစ်ခါမှ မမြင်ဖူးတဲ့ ပုံစံနဲ့ ဒေါသအိုးပေါက်ကွဲပြီး အဝတ်အစားတွေ တီဗီရီမုတ်တွေ အကုန်လွှင့်ပစ်ပေါက်ခွဲပြီး သူမကိုပါ အိမ်ပေါ်ကနေဆင်းသွားဆိုပြီး ကန်ချခဲ့ပါတယ်။ ခင်ပွန်းဖြစ်သူရဲ့ သည်းခံနိုင်ရည်က ဂိတ်ဆုံးသွားခဲ့တာပါ၊ သူ့ကို ဂရုမစိုက်ပဲ ကိုရီးယားကားတွေကျတော့ မနက် ၂ နာရီ ၃ နာရီထိ ကြည့်နေကြောင်း၊ အိမ်အလုပ်တွေလည်း ပစ်ထားတဲ့အတွက် သူချည်းပဲလုပ်နေရကြောင်း ငပျင်းမဖြစ်နေပြီးဆိုတာ သိရဲ့လားလို့ ဒေါသနဲ့ ပြောဆိုခဲ့ပါတယ်။
လက်ရှိမှာတော့ အိမ်ပေါ်ကနေ နှင်ချလိုက်ပြီး ကိုရီးယားဇာတ်လမ်းတွဲနဲ့ ငါ့ကို ဘယ်ဟာရွေးမလဲ နင်ဆုံးဖြတ်လို့ ရာဇသံပေးလိုက်ပါတယ်။ အိမ်ပေါ်ကနေ ဆင်းပြီး အမေအိမ်ပြန်တက်သွားတဲ့ သူမက အဖြစ်ပျက်အားလုံး အမေကို ရှင်းပြလိုက်တဲ့အခါ သူ့အမေက ဘာမပြောညာမပြောနဲ့ ပါးကို ဖြန်းကနဲမြည်အောင် ရိုက်တယ်လို့ ရှင်းပြထားပါတယ်။
ပို့စ်ရဲ့ အဆုံးသတ်မှာတော့ သူမအနေနဲ့ အလုပ်ကြိုးစားပြီး တည်ငြိမ်အေးဆေးတဲ့ ယောကျ်ားကိုလည်း မပစ်နိုင်ဘူး၊ ကိုရီးယားကားတွေကိုလည်း မကြည့်ရ မနေနိုင်ဘူးလို့ ရေးထားပြီး ဘာဆက်လုပ်ရမလဲလို့ အကြံဥာဏ်တောင်းထားပါတယ်။
သူ့ရဲ့ ပိုစ့်အောက်မှာတော့ သူ့လိုပဲ ကိုရီးယားဇာတ်လမ်းတွဲ စွဲနေကြတဲ့ အမျိုးသမီးတွေ ရောက်လာပြီး မျိုးစုံမန့်သွားကြပါတယ်။
“ကျွန်မလည်း ကိုရီးယားကားတွေကြိုက်ပါတယ်၊ တစ်ဖက်ကလည်း အလုပ်လုပ်ပေါ့၊ အလုပ်မလုပ်ပဲ ဇာတ်လမ်းတွဲတွေချည်း ထိုင်ကြည့်နေတာကတော့ လွန်တာပေါ့” လို့ ပြောသွားတဲ့သူတွေရှိသလို
“ယောက်ျားကို ဂရုမစိုက်နိုင်လောက်အောင် ဘာလို့ အဲ့လောက်ထိကြည့်နေရတာလဲ၊ သူများတွေလည်း ကိုရီးယားကာတွေ ကြိုက်တတ်ပါတယ် ဒါပေမယ့် အိမ်အလုပ်တော့ ပြီးအောင်လုပ်သင့်တာပေါ့။ အိမ်အလုပ်တွေ လုပ်တတ်တဲ့ ယောက်ျားရထားတာ နင်ကံကောင်းပါတယ်၊ ကိုရီးယားကားတွေကို ပိတ်ရက်မှာပဲ ကြည့်ပေါ့” လို့ အကြံပြုထားတာကို တွေ့ရပါတယ်။
စာဖတ်သူတွေထဲမှာရော ကိုရီးယားဇာတ်လမ်းတွဲတွေ စွဲနေလို့ အခုလိုပြဿနာမျိုးနဲ့ ရင်ဆိုင်ရတဲ့သူတွေရှိလာ..? ဘယ်လို ဖြေရှင်းရမလဲဆိုတာ အကြံပေးခဲ့ပါဦးနော်..။
