၁ နှစ်သမီးလေးအား ပြန်ပေးစွဲရာမှ လူသတ်မှုဖြစ်ပွား
20 Nov 2019 1,868 Views
နိုဝင်ဘာလ ၁၈ ရက်နေ့က စစ်ကိုင်းတိုင်းဒေသကြီး ဘုတလင်မြို့နယ် မြို့ဟောင်းကုန်းရပ်ကွက်တွင် လူငယ်နှစ်ဦးက အသက် ၁ နှစ်အရွယ်သမီးလေးအား ပြန်ပေးစွဲရာမှ ကလေးကို သတ်ဖြတ်မှုဖြစ်ပွားခဲ့ ကြောင်း သိရသည်။
ဖြစ်စဉ်မှာ ဒူးယားကျေးရွာအုပ်စု မြို့ဟောင်းကုန်းရပ်ကွက်ရှိ ဒေါ်သင်းသင်းအေး ၏ နေအိမ်တွင် ရေလုပ်ငန်း လုပ်ကိုင်ရန် ဘုတလင်မြို့မှ လာရောက်နေထိုင်သူ အသက် ၂၀ နှင့် ၁၆ နှစ်အရွယ် မောင်ရဲရင့်သူ နှင့် မောင်ရဲရင့်မျိုး ညီအစ်ကိုနှစ်ဦးက အသက် ၁ နှစ်နှင့် ၇ လ အရွယ် သမီးလေးနဲ့ အိမ်ရှေ့တွင် ကစားနေခိုက် မိခင်ဖြစ်သူ အိပ်ပျော်သွားခဲ့သည်။
အိပ်ယာမှနိုး၍ကြည့်လိုက်စဉ် မည်သူမှမရှိတော့ကြောင်း၊ အားသွင်းထားသော သူမ၏ ဟာဝေးအမျိုးအစား လက်ကိုင်ဖုန်းပါ ပျောက်ဆုံးနေကြောင်း သိရသည်။ ထို့နောက် လိုက်လံရှာဖွေခဲ့ရာ ကလေးငယ်နဲ့ လူငယ်နှစ်ဦးအား ဘူတာသို့လိုက်ပို့ပေးခဲ့ရကြောင်း တက္ကစီသမားတစ်ဦးက ပြောပြခဲ့သဖြင့် လိုက်လံရှာဖွေခဲ့သော်လည်း မတွေ့ခဲ့ချေ။
ညနေ ၆ နာရီအချိန်ခန့်တွင် ဒေါ်သင်းသင်းအေး ၏ ခင်ပွန်းဖြစ်သူအား အဆိုပါလူငယ်နှစ်ဦးက ဖုန်းဆက်ပြီး သမီးလေးအား ငွေ ၅ သိန်းဖြင့် လာရွေးရန် ပြောဆိုခဲ့ပြီး လာမရွေးပါက အဆိုးမဆိုနဲ့ဟု ခြိမ်းခြောက်ပြောဆိုခဲ့ကြောင်း သိရသည်။
ရဲတပ်ဖွဲ့ဝင်များက အဆိုပါလူငယ်နှစ်ဦးအား ထိုနေ့ည ၁၀ နာရီအချိန်ခန့်တွင် အဝေးပေးကားဂိတ်မှာ ဖမ်းဆီးရမိခဲ့ပြီး ကလေးမှာ ပျောက်ဆုံးနေကြောင်း သိရသည်။ လူငယ်နှစ်ဦးအား စစ်ဆေးချက်အရ ကလေးမှာ ငိုလွန်းသဖြင့် အစ်ကိုဖြစ်သူက ကလေး၏ ပါးစပ်နဲ့ နှာခေါင်းအား ပိတ်ထားရာမှ အသံမထွက်တော့သဖြင့် သေဆုံးသွားပြီဟု ယူဆပြီး ချောင်းတောက်ကျေးရွာအနီး ရေး-ထားဝယ် မီးရထားလမ်း အနောက်ဘက်ကရှိ ရေမြောင်းအတွင်း ပစ်ချခဲ့ကြောင်း ထွက်ဆိုခဲ့သည်။
ကလေး၏ အလောင်းအား ပြန်လည် ရှာဖွေဆယ်ယူခဲ့ပြီး လူငယ်နှစ်ဦးအား ဥပဒေအရ ဆက်လက်အရေးယူဆောင်ရွက်လျှက်ရှိကြောင်း Win Naing Thet ဖေ့စ်ဘွခ်အကောင့်မှ သိရှိရသည်။
