တစ်နာရီအတွင်းမှာပင် ကြိုတင်လက်မှတ်များရောင်းကုန်တဲ့ထိဖြစ်သွားတဲ့ Now & Ever ရုပ်ရှင်
24 Oct 2019 1,924 Views
ပရိသတ်တွေက ချစ်စနိုးနဲ့ ခီမောင်နှံလို့ခေါ်ကြတဲ့ သရုပ်ဆောင်ဇဏ်ခီနဲ့ ဒါရိုက်တာခရစ်တီးနားခီတို့ ဇနီးမောင်နှံနှစ်ယောက်ကတော့ မြန်မာ့အနုပညာလောကထဲကို ဝင်ရောက်လာတာသိပ်မကြာသေးပေမယ့် ပရိသတ်တွေရဲ့အခိုင်အမာလက်ခံအားပေးခြင်းကို ခံခဲ့ရသူတွေပါ။ အရိုးဆွေးနေတဲ့ မြန်မာ့ရုပ်ရှင်လောကကနေဖောက်ထွက်ပြီး အနှစ်သာရပြည့်၀တဲ့ ရုပ်ရှင်ကား ၂ ကားထဲနဲ့ ပရိသတ်ရဲ့အချစ်တွေအကုန်သိမ်းပိုက်သွားသူတွေဖြစ်ပြီး အောင်မြင်တဲ့လမ်းကြောင်းပေါ်ကို အချိန်ခဏလေးအတွင်း ရောက်ရှိခဲ့သူတွေဖြစ်ပါတယ်။
>>Read More ကိုနှိပ်ပြီး ဆက်လက်ဖတ်ရှုပါ<<
သူတို့ဖန်တီးခဲ့တဲ့ ရုပ်ရှင်တွေဖြစ်တဲ့ “ဥပါယ်တံမျဉ်” နဲ့ “မုဒြာရဲ့ခေါ်သံ” ရုပ်ရှင်ဇာတ်ကားဟာ မြန်မာနိုင်ငံတွင်းမှာပဲ ဝက်ဝက်ကွဲအောင်မြင်ကျော်ကြားခဲ့ရုံသာမက နိုင်ငံတစ်ကာက ချီးမြှင့်တဲ့ရုပ်ရှင်ဆုတွေကိုပါ ရရှိခဲ့တာဖြစ်ပါတယ်။ အခုလက်ရှိမှာတော့ ဒါရိုက်တာခရစ်တီးနားခီရဲ့ သုံးကားမြောက်ဖန်တီးမှုလက်ရာဖြစ်တဲ့ Now & Ever (ထာ၀ရနှောင်ကြိုး) ရုပ်ရှင်ကားကြီးကို အောက်တိုဘာ (၃၁) ရက်နေ့တွင် ရုံစတင်ပြသတော့မှာဖြစ်ပါတယ်။
မင်းသားဇာဏ်ခီနဲ့ မင်းသမီးလေးပိုင်ဖြိုးသုတို့က အတွဲညီညီသရုပ်ဆောင်ထားပြီး ရိုမန့်တစ်ဆန်တဲ့ အချစ်ဇာတ်လမ်းရုပ်ရှင်တစ်ခုဖြစ်ပါတယ်။ ထိုကားဟာ ရုပ်ရှင် Trailer စတင်ထွက်ရှိချိန်မှာပင် ပရိသတ်စိတ်ဝင်စားမှုအများဆုံးရရှိခဲ့တဲ့ ဇာတ်ကားတစ်ကားလဲဖြစ်ပါတယ်။ ဒီကနေ့မှာတော့ Now & Ever ရုပ်ရှင်အတွက် ကြိုတင်ရုံလက်မှတ်များကို စတင်ရောင်းချခဲ့ပါတယ်။
Trailer ထွက်ကတည်းက လူစိတ်ဝင်စားမှုအများဆုံးရရှိခဲ့တဲ့ ထိုရုပ်ရှင်ကားဟာ လက်မှတ်စတင်ရောင်းချပြီး တစ်နာရီအတွင်းမှာပင် တစ်ချို့ရုံကြီးများမှာ ကြိုတင်ရုံလက်မှတ်များကုန်သွားသည်ထိ ပရိသတ်တွေက အားပေးကြမ်းခဲ့ကြပါတယ်။ ထိုအကြောင်းကိုတော့ ဒါရိုက်တာခရစ်တီးနားခီက “ကြိုတင်လက်မှတ် ရောင်းတာ တနာရီအတွင်း တချို့ရုံတွေလက်မှတ် sold out ဖြစ်အောင် အားပေးကြမ်းတဲ့အချစ်တို့ရေ...အာဘွား တသိန်းပါနော်” ဆိုပြီး သူမရဲ့ဖေ့စ်ဘွတ်မှာ ဝမ်းသာစွာရေးတင်ထားတာကို တွေ့မြင်ရပါတယ်။
ရိုးအီနေတဲ့ အချစ်ဇာတ်လမ်းတွေထဲက ဖောက်ထွက်ပြီး ဘယ်လိုရိုမန့်တစ်ဆန်ပြမလဲဆိုတာသိချင်ရင်တော့ Now & Ever ရုပ်ရှင်ကို မပြတ်မကွက်သွားရောက်ကြည့်ရှုသင့်တယ်နော်။ ဒါရိုက်တာခရစ်တီးနားခီရဲ့ လက်ရာဖြစ်တာကြောင့် ရုပ်ရှင်ကားကောင်းတစ်ခုဖြစ်မှာကတော့ အထူးပြောနေစရာကိုလိုတော့မယ် မထင်ပါနော်….
(ပိုပိုလေး)
