Sulli သေဆုံးပြီးနောက် ရှိသမျှအလုပ်တွေအကုန် ရပ်နားထားရတဲ့ IU နဲ့ Taeyeon

16 Oct 2019 1,752 Views

နာမည်ကျော် kpop အဆိုတော်တွေ ဖြစ်ကြတဲ့ IU နဲ့ Taeyeon တို့ဟာ အောက်တိုဘာလထဲမှာ သီချင်းအသစ်ထွက်ဖို့ရှိပြီး Sulli သေဆုံး တဲ့သတင်းကြားပြီးနောက် သီချင်းအယ်လ်ဘမ် ပရိုမိုးရှင်းပြုလုပ်ဖို့ အသီးသီး ဖျက်သိမ်းလိုက်ကြပါတယ်။

Sulli နဲ့ Tae Yeon ဟာ SM Entertainment မှာ trainee(သင်တန်းသား) ဘဝကို အတူဖြတ်သန်းခဲ့ကြပြီး ညီအစ်မအရင်းလို ခင်မင်ခဲ့ကြသူတွေ ဖြစ်ပါတယ်။ Sulli ကိုယ့်ကိုယ်ကိုယ် အဆုံးစီရင်သွားတဲ့ သတင်းထွက်ပေါ်လာပြီးနောက် Taeyeon ဟာ သူမ သီချင်းအယ်လ်ဘမ် အသစ်ထွက်ရှိဖို့ ကိစ္စကို နောက်သို့ ရွေ့ဆိုင်းလိုက်ပါတယ်။

SM Entertainment ထုတ်ပြန်ကြေညာချက်

"အောက်တိုဘာ ၁၅ ရက်နေ့မှာ ထွက်ရှိလာရမယ့် Taeyeon ရဲ့ အယ်လ်ဘမ်အသစ် Taeyeon Vol.02 Purpose ထွက်ရှိလာဖို့ အကြောင်းအမျိုးမျိုးကြောင့် နောက်ဆုတ်လိုက်ရပါတယ်။ ကျွန်တော်တို့ ရက်အတိအကျ ပြန်လည်သတ်မှတ်ပြီး နောက်ထွက်လာမယ့် ရက်ကို ပရိတ်သတ်ကို အသိပေးပါမယ်။ အခြေအနေအရပ်ရပ်ကို ပရိတ်သတ် နားလည်ပေးနိုင်မယ်လို့ မျှော်လင့်မိပါတယ်။" ဆိုပြီး ကြေညာချက်ထုတ်ပြန်လာပါတယ်။

Taeyeon လို Sulli နဲ့ ညီအစ်မတွေလို ခင်မင်ရင်းနှီးတဲ့ နောက်တစ်ယောက်ကတော့ IU ပါ။ IU ဟာ ၂၀၁၂ တုန်းက Sulli အပေါ် ယောင်္ကျားသားတွေ ထားရှိတဲ့ အမြင်တွေကို သီချင်းရေးစပ်ပြီး ဆိုဖူးပါတယ်။ သီချင်းနာမည်ကတော့ Peach ပါ။ Sulli ကလည်း လတ်တလော tvN မှာ ထုတ်လွှင့်ပြီးသွားတဲ့ Hotel Del Luna ဇာတ်လမ်းတွဲမှာ ဧည့်သည်သရုပ်ဆောင်အနေနဲ့ ပါဝင်ပေးခဲ့ပါတယ်။

Sulli ရဲ့ အကြောင်းကို သီချင်း စပ်ဆိုရလောက်တဲ့ထိ သူတို့နှစ်ယောက် ခင်မင်ရင်းနှီးခဲ့ကြပါတယ်။ Sulli သေဆုံးသွားတဲ့ သတင်းထွက်ပေါ်လာပြီးနောက် IU ရဲ့ အေဂျင်စီ Kakao M ကအောက်ပါအတိုင်း ထုတ်ပြန်ကြေညာလာပါတယ်။

"IU ရဲ့ ပဉ္စမအကြိမ်မြောက် အယ်လ်ဘမ် Love Poem ကို အောက်တိုဘာလထဲ ထွက်ရှိဖို့ လျာထားပေမယ့် ဖြစ်ပေါ်လာတဲ့ အခြေအနေတွေကြောင့် လာမယ့် နိုဝင်ဘာ ၁ ရက်နေ့ကို ရွေ့ဆိုင်းလိုက်ရပါတယ်။ အကြာကြီးနေမှ တစ်ခါ ထွက်တဲ့ သူမရဲ့ အယ်ဘမ်ကို ပရိတ်သတ် စောင့်မျှော်နေမယ်ဆိုတာ နားလည်သဘောပေါက်ပါတယ်။ Sulli ဆုံးပါးသွားတာနဲ့ ပတ်သတ်ပြီး ကျွန်တော်တို့ရဲ့ စိတ်မကောင်းခြင်းများစွာကို အခုလို နည်းနဲ့ဖော်ပြရုံကလွဲပြီး မတတ်နိုင်ပါဘူး။ သူမကောင်းကောင်း အနားယူနိုင်ပါစေ။" ဆိုပြီး ကြေညာချက် ထုတ်ပြန်လာပါတယ်။

Sulli နဲ့ အရင်းနှီးဆုံး သူငယ်ချင်းတွေလို့ ပြောလို့ရမယ့် IU နဲ့ Taeyeon တို့ဟာ ပြီးခဲ့တဲ့ ၂၀၁၇ မှာ ကိုယ့်ကိုယ်ကိုယ် အဆုံးစီရင်သွားခဲ့တဲ့ Shinee အဖွဲ့ဝင် Jong Hyun နဲ့လည်း ခင်မင်ရင်းနှီးတဲ့ သူငယ်ချင်းတွေဖြစ်ကြပါတယ်။

Jong Hyun သေဆုံးပြီးနောက် ဝမ်းနည်းပူဆွေးခဲ့ကြသလို Sulli သေဆုံးသွားတော့လဲ ထပ်မံ ဝမ်းနည်းနေကြရမှာပါပဲ။ ပရိတ်သတ်တွေကတော့ နောက်ထပ် သူငယ်ချင်းတစ်ယောက် ထပ်မံဆုံးရှုံးလိုက်ရတဲ့ IU နဲ့ Taeyeon ကို စိုးရိမ်ပူပန်နေကြပါတယ်။

ref:koreaboo

(ပိုပိုလေး)