အင်တာနက်မှာ သွားပုပ်လေလွှင့်ပြောဆိုသူတွေကို တရားစွဲထားတဲ့ ဆောင်းဟယ်ကျို

16 Oct 2019 1,412 Views

ဇာတ်လမ်းတွဲကြိုက်နှစ်သက်သူ မြန်မာပရိတ်သတ်တွေရဲ့ အသည်းဦးလို့ တင်စားရတဲ့ သရုပ်ဆောင် ဆောင်းဟယ်ကျိုက လူမှုကွန်ယက်မှာ သူမအကြောင်းနဲ့ ပတ်သတ်ပြီး မဟုတ်မမှန် သွားပုပ်လေလွှင့် ရေးသားသူနှစ်ဦးကို တရားစွဲဆိုထားပါတယ်။

ဆောင်းဟယ်ကျို အမှုဖွင့်ထားတဲ့ Bundang ရဲစခန်းမှ အောက်ပါအတိုင်း‌ ကြေညာချက်ထုတ်ပြန်လာပါတယ်။

"တရားခံ A ကတော့ ဆောင်းဟယ်ကျို ဆောင်းဂျွန်ကီနဲ့ ကွာရှင်းတာဟာ တရုတ်ပြည်မှာ ရှိတဲ့ စပွန်ဆာကြောင့် ဆိုပြီး မဟုတ်မမှန် ရေးသားပြောဆိုခဲ့တာကြောင့် အမှုဖွင့်ခံခဲ့ရတာပါ။ တရားခံ B ကတော့ ဆောင်းဟယ်ကျို အသုံးပြုနေတဲ့ လူမှုကွန်ယက် အင်စတာဂရမ် ပို့စ်တွေမှာ အမုန်းစကားလို့ မှတ်ယူရလောက်တဲ့ စာသားတွေ ရေးသားနေတာကြောင့် အမှုဖွင့်ခံခဲ့ရတာပဲဖြစ်ပါတယ်။"

တောင်ကိုးရီးယား မီဒီယာတွေမှာဖော်ပြချက်အရ ဆောင်းဟယ်ကျို အေဂျင်စီဟာ အင်တာနက်မှာ ဆောင်းဟယ်ကျိုအကြောင်း အမုန်းစကားရေးသားသူ ၁၅ ဦးကို တရားစွဲဆိုထားကြောင်းသိရပါတယ်။ အဆိုပါ ၁၅ ဦးထဲကမှ ၂ ဦးကိုသာ ရှာဖွေတွေ့ရှိနိုင်ခဲ့ပြီး ကျန် ၁၃ ဦးကတော့ သူတို့ရဲ့ အကောင့်တွေကို deactivate လုပ်သွားတာကြောင့် တရားစွဲဆိုခံရခြင်းမှ လွတ်သွားတယ်လို့ သိရှိရပါတယ်။

တောင်ကိုးရီးယားမှာ အနုပညာရှင်တွေကို အင်တာနက်ကနေတစ်ဆင့် အမုန်းစကားပြောဆိုသူတွေများပြားလာတာကြောင့် ကိုယ့်ကိုယ်ကိုယ် သတ်သေတဲ့ ကိစ္စရပ်မျိုးတွေ ရှိလာပါတယ်။ ဆောင်းဟယ်ကျိုအနေနဲ့ အမုန်းစကားနဲ့ ဝေဖန်ပြောဆိုသူတွေရန်က အခုလို ကာကွယ်ထားတာဟာ လုပ်ကိုလုပ်သင့်တဲ့ကိစ္စရပ်တစ်ခုလို့ စာရေးသူအနေနဲ့ ထင်မှတ်မိပါတယ်။