ချစ်ခြင်းမေတ္တာနဲ့ ယှဉ်တွဲပြီး ရစ်ဖွဲ့လာတဲ့ သံယောဇဉ်ဆိုတာ ဖြတ်ရခက်ပါတယ်။ တိရိစ္ဆာန်ချစ်သူတွေဟာ သူတို့ရဲ့ အချစ်တော် ခွေးလေး၊ ကြောင်လေးတွေ သေဆုံးသွားတဲ့အခါ ဆွေမျိုးသားသမီးတွေ ဆုံးပါးသွားသလို တသ,သ နဲ့ နာနာကျင်ကျင်ခံစားရတတ်ပါတယ်။

 

ကိုယ်နဲ့ လက်ပွန်းတတီးနေလာတဲ့ သူတို့တွေကို အချိန်အတော်ကြာတဲ့ထိ မေ့ပျောက်ဖို့မလွယ်ပဲ တိုက်ဆိုင်မှုတွေရှိတိုင်း ခံစားမှုက အသစ်ဖြစ်လာတတ်ပါတယ်။ ဝမ်းနည်းစရာကောင်းတာက ကိုယ်က ဘယ်လောက်ပဲချစ်ချစ် ခွေးလေးတွေ ကြောင်လေးတွေရဲ့ သက်တမ်းဟာ ၁၄ နှစ်ဝန်းကျင်သာရှိတာမို့ သူတို့ကို ခွဲခွာနိုင်ဖို့ ကိုယ့်ဘက်က အဆင်သင့်ပြင်ဆင်ထားဖို့ လိုအပ်ပါတယ်။

 

တရုတ်နိုင်ငံက အသက် ၂၂ နှစ်အရွယ် စီးပွားရေးလုပ်ငန်းရှင်တစ်ယောက်ကတော့ သူ့ရဲ့အချစ်ရဆုံး ကြောင်လေး သေဆုံးသွားတဲ့အခါ “ကောင်းရာမွန်ရာ ရောက်ပါစေ ကလေးရေ” လို့ နောက်ဆုံးနှုတ်ဆက်စကား ပြောလိုက်ရုံနဲ့ မဖြေသိမ့်နိုင်ခဲ့ပါဘူး။

“ဟောင်ယု” လို့ အမည်ရတဲ့ လူငယ်ဟာ သူ့ရဲ့အချစ်တော် ဗြိတိသျှမျိုးနွယ် အမွေးတိုတိုနဲ့ “ဂါးလစ်” လို့ နံမည်ပေးထားတဲ့ကြောင်လေး သေသွားတဲ့အခါ အနီးနားမှာရှိတဲ့ ပန်းခြံတစ်ခုထဲမှာ ကောင်းကောင်းမွန်မွန် မြေမြုတ်သင်္ဂြိုလ်ခဲ့ပါတယ်။

 

အဲဒီနောက် အိမ်ပြန်လာခဲ့ပြီး ပူဆွေးနေတဲ့အချိန် တစ်ခါတုန်းက တရုတ်နိုင်ငံမှာ ခွေးကိုပုံတူမျိုးပွားပေးတယ်ဆိုတဲ့ သတင်းက ခေါင်းထဲမှာ ဖျပ်ကနဲပေါ်လာပြီး သတိရသွားပါတယ်။ ဒါနဲ့ ကြောင်လေးကို မြုတ်ခဲ့တဲ့နေရာကို ပြန်သွားပြီး ပြန်တူးကာ ကြောင်အသေကို အိမ်ပြန်သယ်ခဲ့ပြီး ပုံတူမျိုးပွားနိုင်အောင် ရေခဲသေတ္တာထဲမှာ ထည့်ထားလိုက်ပါတယ်။

 

သက်ရှိသတ္တဝါတွေကို ပုံတူမျိုးပွားတဲ့ နည်းပညာဟာ အခုချိန်ထိ ကမ္ဘာပေါ်မှာ အပြန်အလှန်ငြင်းခုန်မှုတွေရှိနေတဲ့ ဆေးသိပ္ပံနည်းပညာဖြစ်ပါတယ်။ တရုတ်နိုင်ငံရဲ့ ဥပဒေမှာလည်း ပုံတူမျိုးပွားခြင်းဟာ လူကျင့်ဝတ်နဲ့ မကိုက်ညီဘူးလို့ သတ်မှတ်ပြဌါန်းထားပေမယ့် အနည်းအကျဉ်းကိုတော့ လုပ်ပိုင်ခွင့်ရှိနေပါတယ်။

 

ဘေကျင်းအခြေစိုက် စီးပွားဖြစ်အိမ်မွေးတိရိစ္ဆာန် ပုံတူမျိုးပွားပေးတဲ့ကုမ္ပဏီ “စီနိုဂျင်” က တိရိစ္ဆာန်ချစ်သူတွေကို လေ့လာစစ်တမ်းကောက်ယူခဲ့ပြီးနောက် ပိုင်ရှင်တွေရဲ့ စိတ်ဆန္ဒကို ဖြည့်ဆည်းပေးနိုင်ဖို့ ပထမဦးဆုံး ပုံတူမျိုးပွားတဲ့ လုပ်ငန်းကို တည်ထောင်ခဲ့တာဖြစ်ပါတယ်။ 

 

ကုမ္ပဏီအနေနဲ့ ခွေးကောင်ရေ ၄၀ ကျော်ကို ပုံတူမျိုးပွားပေခဲ့ပြီးဖြစ်ပါတယ်။ တစ်ကောင်ကို အမေရိကန်ဒေါ်လာ ၅၃,၀၈၉ (ကျပ်သိန်း ၈၀၀ ကျော်) ကျသင့်ပါတယ်။

 

“ဟောင်ယု” က သူ့ရဲ့ကြောင်လေး “ဂါးလစ်” ကို “စီနိုဂျင်”ကုမ္ပဏီကို ယူသွားခဲ့ပါတယ်။ ၇ လခန့်ကြာပြီးနောက်မှာတော့ “ဂါးလစ်” ပုံစံတူ ကြောင်လေးကို အောင်မြင်စွာပုံတူပွားနိုင်ခဲ့ပြီး တရုတ်နိုင်ငံမှာ ပထမဦးဆုံး ပုံတူပွားတဲ့ ကြောင်လေး ဖြစ်လာပါတယ်။ အဲဒီအတွက် အမေရိကန်ဒေါ်လာ ၃၅,၁၆၅ (ကျပ်သိန်း ၅၄၀ ကျော်) ကုန်ကျခဲ့ပါတယ်။

တိရိစ္ဆာန်ချစ်သူတွေလည်း ကိုယ့်ရဲ့အချစ်တော် ခွေးလေး၊ ကြောင်လေးတွေ သေသွားတဲ့အခါ ပူဆွေးသောက ဖြစ်ရတာတွေကို ကလုန်း(ပုံတူပွား)နည်းပညာနဲ့ အစားထိုးဖြေသိမ့်နိုင်ပါပြီ၊ ပိုက်ဆံများများ ရှိဖို့ပဲ လိုတာပါနော်..။

 

အခုလို ပုံတူပွားတာဟာ လုပ်သင့်လား..? မလုပ်သင့်ဘူးလား..? ဆိုတာကို ကွန်မန့်မှာ ဝေဖန်ထောက်ပြပေးကြပါဦး။