ဟိုတီဗီကြော်ညာထဲကလို “ဟွန်း.. အရွက်ကြော်ကြီးလား..?” ဆိုပြီး ဟင်းသီးဟင်းရွက်ချက်ကျွေးတဲ့အခါ မစားချင်ဘူးဆိုပြီး မျက်နှာ မသာမယာနဲ့ ဂျီကျတတ်တဲ့ ကလေးတွေ အိမ်မှာရှိနေပါသလား..?

 

ဟင်းသီးဟင်းရွက်နဲ့ သစ်သီးတွေကိုတော့ မကြိုက်ပဲ အာလူးကြော်၊ ဝက်အူချောင်းကြော် စတဲ့ ဆီကြော်မုန့်တွေကိုတော့ ဘယ်နှစ်ထုတ်ဖောက်ဖောက် ကုန်အောင်စားတတ်တယ်ဆိုရင် မိဘတွေအနေနဲ့ သတိထားဖို့လိုပါပြီ။

ဆီကြော်မုန့်တွေဟာ လျှာအရသာအလွန်တွေ့ပြီး စားပြီးရင်း စားချင်တဲ့ သွားရေစာ အစားအစာတွေဖြစ်ပါတယ်။ ဒီလို အစားအသောက်တွေဟာ လူ့ခန္ဓာကိုယ်အတွက် တစ်ကယ်လိုအပ်တဲ့ အဟာရတွေကို မဖြစ်စေပဲ ရေရှည်မှာ ကျန်းမာရေးအတွက် အန္တရာယ်အလွန်ရှိပါတယ်။ 

 

အင်္ဂလန်နိုင်ငံ ဘရစ်စတိုလ် က အသက် ၁၉ နှစ်အရွယ် လူငယ်တစ်ဦးဟာ အဟာရဖြစ်စေတဲ့ ဟင်းသီးဟင်းရွက် သစ်သီးတွေကို မကြိုက်ပဲ အာလူးကြော်၊ ဝက်အူချောင်းကြော်၊ အသားညှပ်မုန့် စတာတွေကို ဆယ်စုနှစ်တစ်ခုကျော် နေ့စဉ် စားသောက်ခဲ့တာကြောင့် ဗီတာမင်ချို့တဲ့ပြီး သူ့ရဲ့မျက်စိ နှစ်ဖက်လုံး ကွယ်သွားခဲ့ရပါတယ်။

 

သူဟာ အသီးအရွက်တွေ လုံးဝမစားခဲ့တဲ့အတွက် ခန္ဓာကိုယ်မှာ လိုအပ်တဲ့ ဗီတာမင် B12 ၊ ကော့ပါးနဲ့ ဗီတာမင်ဒီတို့ အလုံအလောက်မရခဲ့ပါဘူး။ နည်းပညာကောလိပ်တက်နေတဲ့ လူငယ်ဟာ ၃ နှစ်အတွင်း သူ့ရဲ့အမြင်အာရုံ တစ်ဖြည်းဖြည်းချို့ယွင်းလာတဲ့အတွက် ကျောင်းထွက်ခဲ့ရပါတယ်။ နောက်ဆုံးမှာတော့ အမြင်အာရုံလုံးဝ ဆုံးရှုံးသွားခဲ့ပါတယ်။