လိင်တူချစ်ကြိုက်မှု သဘာဝဟာ လူသားတွေမှာသာမကပဲ သတ္တဝါတွေဖြစ်တဲ့ ပင်ဂွင်းငှက်တွေမှာလည်း ရှိတယ်လို့ ပြောရင် ယုံနိုင်ပါ့မလား မသိဘူး။ ဒါပေမယ့် တစ်ကယ်ရှိပါတယ်။ ဂျာမဏီနိုင်ငံ ဘာလင်မြို့က တိရိစ္ဆာန်ဥယျာဉ်မှာရှိတဲ့ ‘စကစ်ပါ’ နဲ့ ‘ပင်း’ ဆိုတဲ့ ပင်ဂွင်းငှက် အဖိုနှစ်ကောင်ဟာ လိင်တူချစ်သူ ပင်ဂွင်းငှက်စုံတွဲဖြစ်ပါတယ်။

 

 

 

 

CNN ရဲ့ သတင်းအရ အခြားပင်ဂွင်းငှက်မကြီးတစ်ကောင်က ဥ ဥခဲ့ပြီး  ဥကို ဝပ်မပေးနိုင်တာကြောင့် တိရိစ္ဆာန်ရုံဝန်ထမ်းတွေက ဒီဥကို ‘စကစ်ပါ’ နဲ့ ‘ပင်း’ တို့ စုံတွဲကို ပေးဖို့ ဆုံးဖြတ်ခဲ့ပါတယ်။ အခုဆိုရင် ‘စကစ်ပါ’ နဲ့ ‘ပင်း’ တို့ဟာ ပင်ဂွင်းဥအစစ်ကို သားပေါက်လေးဖြစ်လာအောင် ဝပ်ပေးနေကြပါပြီ။

 

ဒါပေမယ့် အကောင်ပေါက်မယ်မပေါက်ဖူးဆိုတာ မသေချာသေးဘူးလို့ ဝန်ထမ်းတွေက ဆိုပါတယ်၊ ဥကနေ အကောင်ပေါက်ဖို့ဆိုရင် ၅၅ ရက်ကြာအောင် ဂရုတစိုက်နဲ့ သေသေချာချာ ဝပ်ပေးရမှာဖြစ်ပါတယ်။ အကယ်၍ အကောင်ပေါက်လာခဲ့ရင်တော့ ဒီတိရိစ္ဆာန်ဥယျာဉ်အတွက် ပင်ဂွင်းငှက်ထီးနှစ်ကောင်က စောင့်ရှောက်လို့ မွေးလာတဲ့ ပထမဦးဆုံး ပင်ဂွင်းကလေးလေး ဖြစ်လာမယ်လို့ဆိုပါတယ်။

 

 

‘စကစ်ပါ’ နဲ့ ‘ပင်း’ တို့ဟာ ဂျာမဏီနိုင်ငံ ဟမ်းဘာ့ဂျ် ကနေ ပြီးခဲ့တဲ့ ဧပြီလကမှ ရောက်လာခဲ့ကြတာဖြစ်ပါတယ်။ ရောက်လာလာခြင်းမှာပင် သူတို့နှစ်ယောက်ရဲ့ ဆက်ဆံရေးဟာ လိင်တူချစ်သူတွေ ဖြစ်တာကို သိသာထင်ရှားစွာတွေ့ရတယ်လို့ ဝန်ထမ်းဖြစ်တဲ့ ‘ဂျာဂါ’ က ဆိုပါတယ်။