စားသောက်ဆိုင်ထဲမှာ ရင်ခွင်ပိုက်အရွယ် ကလေးလေးတစ်ယောက် ဆူညံအောင် လုပ်နေတာကို နားမခံနိုင်တော့တဲ့ ကိုယ်ဝန်ဆောင်သည် အမျိုးသမီးတစ်ဦးက ရေနွေးပူကို ပန်းကန်လုံးထဲထည့်ကာ ကလေးရှိရာနေရာကို သွာပြီး ရေးနွေးပူနဲ့ ပက်ခဲ့မှုတစ်ခု ဇွန်လ ၁၁ ရက်နေ့က ဖြစ်ပွားခဲ့ပါတယ်။

 

တရုတ်နိုင်ငံ ဟန်နန်ပြည်နယ်မှာရှိတဲ့ ရှန်းချန်မြို့က စားသောက်ဆိုင် တစ်ဆိုင်မှာ ဖြစ်ခဲ့တာပါ။ အသက် ၂၈ နှစ်အရွယ် ‘ရန်’ ဟုသာ သိရတဲ့အမျိုးသမီးဟာ သူမကိုယ်တိုင်လည်း ၇ လ သား ကိုယ်ဝန် လွယ်ထားရပြီး စားသောက်ဆိုင်မှာ စားသောက်နေစဉ် အနီးနားစားပွဲရှိ မိသားစုမှ ၁၁ လသမီးလေးက ဇွန်းကိုကိုင်ပြီး စားပွဲခုံကို ခေါက်နေခဲ့တာကြောင့် ဆူညံတဲ့အသံကို နားမခံနိုင်တော့ပဲ ဒေါသတကြီး တမင်ရည်ရွယ်ကာ ရေနွေးပူနဲ့ ပက်ခဲ့တာကို စီစီတီဗီရုပ်သံမှာ တွေ့ခဲ့ရပါတယ်။

 

အဖြစ်ပျက်မဖြစ်ပွားခင်က ‘ရန်’ ဟာ ဆူညံသံကို နားမခံနိုင်ကြောင်း ကလေးရဲ့မိခင်ဖြစ်သူကို သွားရန်တွေ့ခဲ့ပါတယ်။ အဲဒီနောက် သူ့အမျိုးသားက ဆိုင်ထဲက သွားကြရအောင်လို့ ဖြောင့်ဖျပြီး ဆိုင်ထဲကနေ ထွက်လာခဲ့ပြီးဖြစ်ပါတယ်။ ဒါပေမယ့် မကျေနပ်တဲ့စိတ်ကို ထိန်းမထားနိုင်တော့တဲ့ ‘ရန်’ က ၁၀ မိနစ်လောက်အကြာမှာ ဆိုင်ထဲကို ပြန်ဝင်လာပြီး ရေနွေးပူပူကို ပန်းကန်လုံးတစ်လုံးထဲ အပြည့်ဖြည့်ကာ ကလေးဆီ တည့်တည့်လျှောက်သွားပြီး ပက်လိုက်တာ ဖြစ်ပါတယ်။ အဲဒီနောက် ဆိုင်ထဲက ထွက်သွားခဲ့ပါတယ်။