ကျောက်ကပ်ဟာ လူ့ရဲ့ခန္ဓာကိုယ်တွင်း အရေးအကြီးဆုံး ကလီဆာအစိတ်အပိုင်းတွေထဲက တစ်ခုဖြစ်ပါတယ်။ ကျောက်ကပ်ရဲ့အလုပ်လုပ်ပုံ မမှန်တော့ဘူး၊ ပျက်ဆီးစပြုလာပြီဆိုရင် အဲဒီလူရဲ့ကျန်းမာရေးက နေ့ချင်းညချင်းကို သိသိသာသာ ရုတ်လျှော့သွားစေနိုင်ပါတယ်။

 

ကျောက်ကပ်ရဲ့ လုပ်ဆောင်ချက်က သွေးထဲက အဆိပ်အတောက်နဲ့ အညစ်အကြေးတွေကို စကာသဖွယ် စစ်ထုတ်ပေးပြီး ဆီးအဖြစ်အသွင်ပြောင်းလဲကာ ခန္ဓာကိုယ်ပြင်ပကို စွန့်ထုတ်ပေးတာ ဖြစ်ပါတယ်။ ကျောက်ကပ်ဝေဒနာ ခံစားရပြီဆိုရင် ကုသမှုခံယူရာမှာလည်း ငရဲကျနေသလို ပြင်းထန်စွာနာကျင်တာကြောင့် ရောဂါ ဖြစ်ချင်တဲ့ ရောဂါလက္ခဏာရဲ့ အရိပ်ယောင်တွေကို သိထားခြင်းဖြင့် ကြိုတင်ကာကွယ်မှုတွေပြုလုပ်နိုင်ပါတယ်။ 

 

ကျောက်ကပ်အလုပ်မလုပ်နိုင်တော့တဲ့အချိန်မှာ ခန္ဓာကိုယ်တွင်းမှာ စုလာတဲ့ အဆိပ်တွေကို ပုံမှန်ကုသမှုခံယူပြီး မထုတ်ပေးနိုင်ဘူးဆိုရင် ၆ လအတွင်း အသက် ဆုံးရှုံးနိုင်ပါတယ်။ ဒါကြောင့်မို့ ကျောက်ကပ် ပုံမမှန်ခြင်းရဲ့ ရှေ့ပြေးလက္ခဏာ (၁၀)ရပ်ကို ဖော်ပြပေးလိုက်ပါတယ်.

 

ရောဂါလက္ခဏာများ

 

၁။ ခဏခဏ ဆီးသွားချင်ပြီး တစ်ကယ်သွားတဲ့အခါ နည်းနည်းလေးသာ သွားခြင်း

ဒီလိုအခြေအနေမျိုးဟာ အတွင်းကလီစာရဲ့ စစ်ထုတ်ပေးတဲ့ လုပ်ငန်းယိုယွင်းလာတာကြောင့် ဖြစ်ပါတယ်။ အဲဒီအတွက် ခန္ဓာကိုယ်တွင်းမှ မစစ်ထုတ်နိုင်တဲ့ အရည်တွေကျန်နေပါတယ်။ အဲဒီအရည်တွေဟာ မကြာခဏဆိုသလို ဆီးသွားချင်စိတ်ဖြစ်ပြီး အရေးပေါ် အိမ်သာပြေးရတတ်ပါတယ်။ တစ်ကယ်ဆီးစွန့်တဲ့အခါမှာတော့ အနည်းငယ်သာ စွန့်ပါတယ်။

 

၂။ မျက်ဝန်းတစ်ဝိုက် ညိုမဲလာခြင်း

 

သွေးထဲမှာ သှိလှောင်သိမ်းဆည်းထားရမယ့် ပရိုတင်းဓါတ်တွေကို ကျောက်ကပ်က အလုပ်လုပ်ပုံ မမှန်ကန်တော့တာကြောင့် စွန့်ထုတ်လိုက်တဲ့အတွက် ပွန်းပဲ့ဒဏ်ရာသဖွယ် မျက်ဝန်းနားတစ်ဝိုက် အညိုအမဲတွေ ဖြစ်ပေါ်လာရခြင်း ဖြစ်ပါတယ်။

 

၃။ ခြေချင်းဝတ်နဲ့ ခြေထောက်တွေ ညိုမည်းလာခြင်း

အဆိုပါနေရာတွေမှာ ညိုမည်းနေပြီး လက်ချောင်းနဲ့ ကြာရှည်ဖိထားတဲ့အခါ နဂိုအသားအရည်ပုံစံ ခဏလေး ပြန်ပေါ်လာတတ်ပါတယ်။ ခြေထောက်ရဲ့ ဖောရောင်နေတဲ့ နေရာတွေကို လက်နဲ့ ခဏဖိထားပြီး ပြန်မတဲ့အခါ လက်ရာအတိုင်း ကျန်နေခဲ့ခြင်း။ ဒါတွေဟာ လိုအပ်တဲ့ ပရိုတိန်းနဲ့ ဆိုဒီယမ်တို့ဟာ ကျောက်ကပ်ပုံမှန် အလုပ်မလုပ်တာကြောင့် လိုသလောက်မရတဲ့အတွက် ဖြစ်ပါတယ်။

 

၄။ အနီရောင်သန်းတဲ့ ဆီးသွားခြင်း

ဆီးထဲကို သွေးယိုစိမ့်မှု ရှိတဲ့အတွက် ဒီလို ဆီမျိုး သွားနေတာဖြစ်ပါတယ်။ ဒါဟာလည်း ကျောက်ကပ် ပျက်ဆီးစပြုနေတဲ့ လက္ခဏာရပ်တစ်ခုပါ။

 

၅။ ဆီးညစ်ခြင်း၊ အမြုတ်များခြင်း 

 

ကျောက်ကပ် ပုံမှန်အလုပ်မလုပ်တဲ့အတွက် ပရိုတိန်းဓါတ်တွေ ဆီထဲပါလာပြီး အခုလို ဖြစ်တာ ဖြစ်ပါတယ်။

 

၆။ အသားအရေခြောက်ပြီး ယားယံခြင်း

ကျောက်ကပ်က မင်နရယ်လ်၊ ရေ နဲ့ အဟာရဓါတ်တို့ကို သွေးထဲမှာ အချိုးညီမျှမှုရှိအောင် မလုပ်ပေးနိုင်တော့တဲ့အတွက် အသားအရည်ကို ထိခိုက်သက်ရောက်တာဖြစ်ပါတယ်။

 

 

၇။ ကြွက်သားများ အလွယ်တစ်ကူ နာကျင်ခြင်း

 

ကျောက်ကပ် အလုပ်မလုပ်နိုင်တာကြောင့် ကယ်လ်စီယံနဲ့ ဖော့စ်ဖါးရပ်စ် ရှိသင့်တာထက် လျှော့နည်းလာတာကြောင့် ဖြစ်ပါတယ်။

 

၈။ အမြဲအားနည်းသလိုခံစားရခြင်း၊ အကြောင်းမရှိပဲနုံးချိနေခြင်း

 

သွေးထဲမှာ အဆိပ်များလာပြီး ခန္ဓာကိုယ်ကို သတိပေးတဲ့အဆင့်ကို ရောက်လာတာကြောင့်ဖြစ်ပါတယ်။ ကျောက်ကပ် အလုပ်မလုပ်နိုင်တဲ့အတွက် သွေးနီဥတွေ လျော့နည်းလာပြီး သွေးအားနည်းခြင်းကို ဖြစ်စေပါတယ်။

 

၉။ အိပ်မပျော်ခြင်း

 

ကျောက်ကပ်ပုံမှန်အလုပ်မလုပ်နိုင်တာကြောင့် ခန္ဓာကိုယ်ထဲမှာ အဆိပ်တွေရှိနေပြီး အိပ်ပျော်စေနိုင်တဲ့ လုပ်ဆောင်ချက်ကို အနှောက်အယှက်ဖြစ်စေပါတယ်။

 

၁၀။ အစားအသောက်ပျက်ခြင်း

 

ခန္ဓာကိုယ်ထဲမှာ ကျောက်ကပ်က စွန့်ထုတ်ပေးရမယ့် အဆိပ်တွေ မစွန့်နိုင်တာကြောင့် များလာလေလေ အစာစားချင်စိတ်ကို ခန္ဓာကိုယ်က ငြင်းဆန်လေလေဖြစ်ပြီး စားချင်သောက်ချင်စိတ် ကုန်ခမ်းလာပါတယ်။

 

ကျောက်ကပ်ရောဂါဖြစ်နိုင်ချေ အန္တရာယ်မြင့်မားတဲ့ အခြားအချက်တွေကတော့ အောက်ပါအတိုင်းဖြစ်ပါတယ်။

သွေးတိုးရှိသူများ၊ ဆီးချိုဝေဒနာခံစားနေရသူများ၊ မိသားစုမှာ ကျောက်ကပ်ရောဂါ ရာဇဝင်ရှိခြင်း နဲ့ အသက် ၆၀ ကျော် အသက်အရွယ်ကြီးရင့်လာသူတွေမှာ ကျောက်ကပ်ပျက်ဆီးမှု ဖြစ်နိုင်ချေ သာမန်ထက်ပိုပြီး  မြင့်မားပါတယ်။

 

ဒါကြောင့်မို့ အနည်းဆုံး တစ်နှစ်တစ်ကြိမ်ခန့် ကျောက်ကပ်ကို ဆေးရုံဆေးခန်းတွေမှာ ပုံမှန်သွားရောက် စစ်ဆေးသင့်ပါတယ်။ အထက်ဖော်ပြပါ အချက် (၁၀)ချက်ထဲက တစ်ချက်ချက်နဲ့ ငြိနေပြီဆိုရင်တော့ ဆရာဝန်နဲ့ အမြန်ဆုံး သွားပြဖို့ တိုက်တွန်းအပ်ပါတယ်။

 

(ပိုပိုလေး)