အသက် ၁၂ နှစ်အရွယ် “Xu Bingyang” ဆိုတဲ့ ကျောင်းသားလေးဟာ လမ်းမလျှောက်နိုင်တဲ့ ဒုက္ခိတသူငယ်ချင်း “Zhang Ze” ကို ကျောင်းတက်နိုင်အောင် နေ့စဉ်ကုန်းပိုးပြီး အကြိုအပို့လုပ်ပေးခဲ့သူပါ။ ဒါတင်မကသေးပါဘူး ထမင်းစားဆင်းချိန်ဆိုရင်လည်း အနားမှာ အကူညီပေးသလို မတူတဲ့ ဘာသာရပ်တွေ သင်ဖို့ အခန်းပြောင်းပြီး တက်ရတဲ့အခါမှာလည်း ချီပိုးပြီး ရွေ့ပြောင်းပေးခဲ့တဲ့အတွက် “Zhang Ze” ရဲ့ ပညာသင်ကြားရေးဟာ အခက်အခဲ မရှိခဲ့ပါဘူး။

 

“Zhang Ze” ဟာ အသက် ၄ နှစ်အရွယ်ကစလို့ ဖြစ်လေ့ဖြစ်ထနည်းတဲ့ ကြွက်သားတွေ လှုပ်ရှားမှုမမှန်တဲ့ ရောဂါဖြစ်ခဲ့ပါတယ်။ အဲဒီနောက်မှာတော့ သူ့ရဲ့ခြေထောက်ကြွက်သားတွေကို ထိန်းချုပ်နိုင်စွမ်းမရှိတော့တဲ့အတွက် အကူညီမပါပဲ တစ်ယောက်ထဲ လမ်းလျှောက်လို့ မရတော့ပါဘူး။

စင်ဟွာသတင်းမှာ ဖော်ပြချက်အရ “Xu Bingyang” ဟာ “Zhang Ze” ထက် အရပ်မြင့်ပြီး ပိုသန်မာတာကြောင့် ကျောပိုးရတာ သူ့အတွက်အခက်အခဲမရှိဘူးလို့ ဆိုပါတယ်၊ ဒါ့အပြင် သူအခုလို ကူညီရတာကို ပျော်ပါတယ်လို့ ပြောခဲ့ပါတယ်။

 

“ကျွန်တော်ကိုယ်အလေးချိန်က ၄၀ ကီလို ကျော်လောက်ရှိတယ် သူက ၂၅ ကီလိုလောက်ပဲရှိတော့ သူ့ကို ကျောပိုးပြီး သွားရတာ အဆင်ပြေပါတယ်” လို့ ဆိုပါတယ်။

 

လတ်တလောမှာတော့ “Zhang Ze” က “Xu” လို သူငယ်ချင်းမျိုး ရဖို့ ဘယ်မှာမှ ရှာလို့ရမှာ မဟုတ်ဘူးလို့ ဆိုပါတယ်။ “Xu က ကျွန်တော့်ရဲ့ အချစ်ဆုံးသူငယ်ချင်းပါ နေ့တိုင်း ကျောင်းအတူတူသွား၊ စာတူတူကျက်၊ စကားတွေပြောပြီး အတူတူ ကစားပေးတယ်၊ အခုလို ကျွန်တော့်ကို နေ့တိုင်းစောင့်ရှောက်ပေးလို့ သူ့ကို ကျေးဇူးတင်ပါတယ်” လို့ “Zhang Ze” က ပြောပါတယ်။

 

တစ်ကယ်တော့ သူတို့နှစ်ယောက်ရဲ့ အဖြစ်က သိပ်မလွယ်လှပါဘူး။ နီးနီးလေး ဆိုပေမယ့် ကျောင်းခန်းထဲကနေ အိမ်သာသွားဖို့ ၃ မိနစ်လောက် အချိန်ယူကြရပါတယ်။ “Xu Bingyang” က “Zhang Ze” ကို လက်နဲ့ မ ချီပီးမှ တစ်ရွေ့ရွေ့သွားကြရပါတယ်။ လှေကားထစ်တွေ တက်ရတဲ့အချိန်မှာ ကျောပိုးပြီးသွားရပါတယ်။