အွန်လိုင်း You Tube ပေါ်မှာ တင်ထားတဲ့ “ကိုယ်တိုင် ကလေးဘယ်လိုမီးဖွားရမလဲ” ဆိုတဲ့ ပညာပေးရုပ်သံကိုကြည့်ရှုပြီး အကူညီမပါပဲ ကိုယ့်ဟာကိုယ် တစ်ယောက်ထဲ ကလေးကျိတ်မွေးရန်ကြိုးစားခဲ့သည့် အမျိုးသမီး သေဆုံးခဲ့မှု မတ်လ ၁၁ ရက်နေ့က ဖြစ်ပွားခဲ့သည်။

 

အိန္ဒိယနိုင်ငံက အမျိုးသမီးတစ်ဦးဟာ အိမ်ထောင်မပြုရသေးပဲ ကိုယ်ဝန်ရှိနေခဲ့သည့်အတွက် ပတ်ဝန်းကျင်၏ ကဲ့ရဲ့ရှုံ့ချမှုကို ခံရမည်စိုးရိမ်းပြီး ကလေးကို ကိုယ်တိုင် တစ်ယောက်ထဲ ကျိတ်မွေးစဉ် သေဆုံးခဲ့ရခြင်းဖြစ်သည်။

 

အမျိုးသမီးနဲ့အတူ မွေးကင်းစ သားယောက်ျားလေးလည်း သေဆုံးနေတာကို သူမငှားရမ်းနေခဲ့တဲ့ အတ္ထာပရာဒက်ရှ်ပြည်နယ်မြောက်ပိုင်းက ဂိုရက်ပြာမြို့ရှိ အခန်းတစ်ခန်းမှာ တွေ့ခဲ့ရတာဖြစ်ပါတယ်။ အမျိုးသမီးရဲ့ အမည်ကိုတော့ ထုတ်ဖော်ပြောကြားခဲ့ခြင်းမရှိပါဘူး။

အမျိုးသမီးသေဆုံးမှုကို တနင်္လာနေ့နံနက်က အိမ်နားနီးချင်းဖြစ်သူက သူ့ရဲ့အခန်းရှေ့ကို သွေးတွေစီးလာတာ တွေ့ပြီးနောက် အိမ်ရှင်ကို အကြောင်းကြားလိုက်ရာကနေ သိရှိခဲ့တာဖြစ်ကြောင်း ရဲမှတ်တမ်းမှာ ဖော်ပြထားပါတယ်။

 

အိမ်ရှင်ဖြစ်သူ ရောက်လာပြီး တံခါးကို ဖျက်ပြီးဝင်ခဲ့ရာ ကတ်ကြေး၊ ဓား၊ အပ်ချည်တို့နဲ့အတူ စမတ်ဖုန်းတစ်လုံးကို သေဆုံးသူရဲ့ အနီးမှာ တွေ့ခဲ့ရပါတယ်။

သူမဟာ ဘေးအန္တရာယ်ကင်းကင်းနဲ့ ကိုယ်တိုင်ကလေးဘယ်လို မွေးဖွားရမလဲဆိုတဲ့ YouTube  သင်ခန်းစာ ရုပ်သံကို ကြည့်ရှုပြီး လုပ်ဆောင်ခဲ့ကြောင်း ရဲအရာရှိ Ravi Rai က ပြောကြားခဲ့ပါတယ်။ သူမဟာ အဆိုပါအခန်းမှာ ငှားနေပြီး လေးရက်မြောက်နေ့ တနင်္ဂနွေနေ့ညမှာ အကူအညီမပါပဲ ကိုယ်တိုင် ကလေးမီးဖွားဖို့ ကြိုးစားခဲ့တာဖြစ်ကြောင်း ဖြည့်စွက်ပြောကြားခဲ့ပါတယ်။

 

အမျိုးသမီးဟာ ဘဟာရိချ် ဒေသကဖြစ်ပြီး အိမ်ထောင်မရှိပဲ ကိုယ်ဝန်ရှိခဲ့တဲ့အတွက် ပတ်ဝန်းကျင်ရဲ့ ပြစ်တင်ပြောဆိုမှုကို ခံရမှာ စိုးရိမ်ပြီး အခုလို လုပ်ခဲ့တာဖြစ်တယ်လို့လည်း ဆိုပါတယ်။

 

ကမ္ဘာ့အနောက်ခြမ်း နိုင်ငံများမှာ အိမ်ထောင်မပြုပဲ ကလေးမွေးတဲ့သူများကို “Single Mother” အဖြစ် အမည်နာမတစ်မျိုး တပ်ခေါ်ကာ ဂုဏ်ယူစရာတစ်ခုသဖွယ် လက်ခံနေကြပေမယ့် အာရှတိုက်သားတွေကတော့ ရှေးအစဉ်အလာ ယဉ်ကျေးမှုအရ အခုလို လင်သားမပေါ်ပဲ ကလေးမွေးတာကို ရှက်စရာတစ်ခုအဖြစ် သတ်မှတ်ထားဆဲဖြစ်ပါတယ်၊ အိန္ဒိယနိုင်ငံလို ရှေးရိုးစွဲကြီးတဲ့ နိုင်ငံတွေမှာ အခုလိုအဖြစ်မျိုးဟာ ပတ်ဝန်းကျင်မှာ မျက်နှာမပြရဲတဲ့ ကိစ္စအဖြစ် ရှိနေပါသေးတယ်။