Line Walker 2 ရုပ်ရှင်ရိုက်ကွင်းကို သွားရောက်ကြည့်ရှုနေကြသည့် မြန်မာပရိသတ်များ
22 Feb 2019 1,389 Views
လတ်တလော မြန်မာ့အနုပညာလောကမှာသာမက အများပြည်သူပရိသတ်များကြားမှာပါ စိတ်ဝင်စားမှုမြင့်တက်နေတာကတော့ Line walker ရုပ်ရှင်ကားကြီးပဲဖြစ်ပါတယ်။ Shaw Brothers Pictures မှထုတ်လုပ်ရိုက်ကူးတဲ့ ဟောင်ကောင်နိုင်ငံရဲ့ နာမည်ကြီး အက်ရှင်ဒရမ်မာရုပ်ရှင်ကား Line Walker 2 ကိုတော့ လူသွားလူလာများတဲ့ ရန်ကုန်မြို့လယ်ခေါင်မှာ လာရောက်အခြေတည်ရိုက်ကူးနေတာပဲဖြစ်ပါတယ်။ ဖေဖော်ဝါရီလ ၁၈ ရက်နေ့က စတင်ခဲ့ကာ ဖေဖော်ဝါရီ ၂၆ ရက်နေ့အထိ ဆူးလေဘုရားလမ်းနဲ့ ရွှေတိဂုံဘုရားလမ်းအနီးတစ်ဝိုက်မှာ အဓိကရိုက်ကူးသွားမှာဖြစ်တယ်လို့သိရပါတယ်။
မိနစ်ပိုင်းမျှသာ ကြာမြင့်မယ့်ရုပ်ရှင်ဇတ်ဝင်ခန်းမှာတော့ သေနတ်အစစ်တွေ၊ ရဟတ်ယာဉ်တွေနဲ့ ကားတွေကိုပါ ဖောက်ခွဲပြရိုက်ကူးသွားမှာဖြစ်ပါတယ်။ နိုင်ငံခြားရုပ်ရှင်ဇာတ်ကားဖြစ်တာကြောင့်ပင် ဘယ်လိုမျိုးရိုက်ချက်တွေနဲ့ အဆင့်မြင့်မြင့်ရိုက်ကူးမှုတွေပြုသလဲဆိုတာကို အနုပညာရှင်တွေသာမက ပရိသတ်များကပါ အလွန်ကိုစိတ်ဝင်စားနေကြတာဖြစ်ပါတယ်။ ဒါ့ကြောင့် Line Walker ရုပ်ရှင်ရိုက်ကွင်းကို အနုပညာရှင်များစွာကလည်း သွားရောက်လေ့လာကြသလို စိတ်ဝင်တစားသွားရောက်ကြည့်ရှုကြတဲ့ ပရိသတ်တွေကလည်း များပြားလို့လာပါတယ်။
ဒီကနေ့မှာတော့ Line Walker 2 ရုပ်ရှင်ဇာတ်ဝင်ခန်းတစ်ချို့ကို ဆူးလေဘုရားလမ်းမပေါ်မှာ ရိုက်ကူးမှုပြုလုပ်နေတာဖြစ်ပြီး ရုပ်ရှင်ရိုက်ကွင်းကို လက်လှမ်းမှီရာအရပ်ကနေ သူ့ထက်ငါ လာရောက်ကြည့်ရှုနေကြတဲ့ ပရိသတ်တွေရဲ့ပုံရိပ်အချို့ကိုတင်ဆက်ပေးလိုက်ရပါတယ်။
Line Walker 2 ရုပ်ရှင်ဟာဆိုရင် မြန်မာပြည်အတွက် ပထမဆုံးလာရောက်ရိုက်ကူးခြင်းခံရတဲ့ နိုင်ငံတစ်ကာအဆင့်မှီ အက်ရှင်ဇာတ်ကားကြီးပဲဖြစ်ပါတယ်။ Line Walker 2 ရုပ်ရှင်ထဲတွင် မြန်မာသရုပ်ဆောင်တွေဖြစ်ကြတဲ့ အောင်မြင့်မြတ်၊ လင်းအောင်ခေတ်နဲ့ Hugo တို့က အထူးရဲတပ်ဖွဲ့ SWAT များအဖြစ် ပါဝင်သရုပ်ဆောင်နေရပြီး သရုပ်ဆောင် မင်းရာဇာကတော့ ကြေးစားသေနတ်သမား Hit Man တစ်ယောက်အဖြစ် ပါဝင်သရုပ်ဆောင်ခွင့်ရခဲ့ပါတယ်။ နိုင်ငံတစ်ကာမှာ ပြသသွားမယ့် ရုပ်ရှင်ကားကြီးထဲမှာ မြန်မာသရုပ်ဆောင်တွေအဖြစ် တစ်ထောင်တစ်နေရာကနေပါဝင်ခွင့်ရသွားတဲ့သူတို့တွေအတွက် ပရိသတ်တွေကလည်း ၀မ်းသာလို့နေကြပါတယ်။
Photos_7 Day
