သန့်ရှင်းရေးဝန်ထမ်းဘဝကနေ စာသောက်ဆိုင်များပိုင်ရှင်ဖြစ်လာတဲ့ မာစတာရှပ်ဖ်ရဲ့ ပဲ့ကိုင်ရှင် ဦးရဲထွဋ်ဝင်း
09 Jan 2019 2,034 Views
MRTV 4 ကနေ ထုတ်လွှင့်ပြသနေပြီး လူကြိုက်များနေတဲ့ Reality Show ဖြစ်တဲ့ Master Chef Myanmar မှာ ထူးထူးခြားခြား မှတ်ချက်တွေပေးပြီး ပြိုင်ပွဲဝင်တွေကို အဆုံးအဖြတ်ပေးနေတဲ့ ဒိုင်လူကြီးမင်းတစ်ဦးကို သတိထားမိကြမယ်ထင်ပါတယ်။ သူကတော့ မြန်မာနိုင်ငံက Sharky’s (ရှာကီ) စားသောက်ဆိုင်ခွဲတွေရဲ့ ပိုင်ရှင် တစ်ဦးလည်းဖြစ်ပါတယ်။
အောင်မြင်မှုရနေကြသူတိုင်းဟာ အလကားနေရင်း ရုတ်တရက်ကြီး ထပြီး အောင်မြင်လာကြတာတော့ မဟုတ်ပါဘူး။ ဒီလိုအခြေအနေမျိုးကို မရောက်ခင်မှာ အခက်အခဲတွေကို တစ်ဆင့်ခြင်း ရင်ဆိုင်ဖြတ်ကျော်ခဲ့ရတာချည်းပါပဲ။
ဒီလိုလူတွေထဲမှာ ဦးရဲထွဋ်ဝင်း (ခ) ဦးရှာကီ လည်း တစ်ယောက်အပါအဝင်ဖြစ်ပါတယ်။ ဦးရဲထွဋ်ဝင်း က စားသောက်ဆိုင် သန့်ရှင်းရေး သမားဘဝကနေ အခုလို အောင်မြင်တဲ့ စားဖိုမှူးကြီးတစ်ယောက်ဖြစ်လာပြီး မြန်မာနိုင်ငံမှာ Sharky’s ဆိုတဲ့ စာ;သောက်ဆိုင်ခွဲတွေရဲ့ ပိုင်ရှင် ဖြစ်လာခဲ့ပုံအကြောင်းက စိတ်ဝင်စားဖွယ် လေးစားအားကျစရာ ကောင်းလှပါတယ်။
ဦးရဲထွဋ်ဝင်း ဟာ အသက် ၁၉ နှစ်အရွယ်မှာ ဆွစ်ဇာလန်နိုင်ငံ ဂျနီဗာမြို့ကို ရောက်ခဲ့ပြီး “Wendy” ဆိုတဲ့ အသင့်စားသောက်ဆိုင်ခွဲတစ်ခုမှာ သန့်ရှင်းရေးသမားအဖြစ် ဝင်ရောက်လုပ်ကိုင်ရင်း ၄ နှစ်အတွင်းမှာပဲ အဆိုပါကုမ္ပဏီရဲ့ European ဒါရိုက်တာတစ်ယောက်ဖြစ်လာခဲ့ပုံအကြောင်းကို Food Magazine နဲ့ ဖြေကြားထားတဲ့ အင်တာဗျူးမှာ အခုလို စတင် ပြောပြခဲ့ပါတယ်။
Wendy ဆိုတာက ကမ္ဘာမှာ တတိယ Fast Food Chains တစ်ခုပါ။ Wendy က သူများနဲ့ ကွာခြားမှုတစ်ခုက သူက အဆင့်မြင့် ဟမ်ဘာဂါတွေကို ထုတ်လုပ်တယ်။ သူတို့ရဲ့ ဂျနီဗာမြို့မှာ ပထမဆုံး ဆိုင်ဖွင့်တော့ အဲဒီမှာ ကျွန်တော်က သန့်ရှင်းရေးသမား စလုပ်ရင်းကနေ တဖြည်းဖြည်းနဲ့ ဆိုင် ၄ ဆိုင်ကို အုပ်ချုပ်ရတဲ့ ဒါရိုက်တာတစ်ယောက်ဖြစ်လာတယ်။
သန့်ရှင်းရေးသမားတစ်ယောက်ကနေ ဆိုင် ၄ဆိုင်ကို အုပ်ချုပ်ရတဲ့ ဒါရိုက်တာ တစ်ယောက်ဖြစ်လာပုံ အသေးစိတ်လေးကရော ဘယ်လိုမျိုးပါလဲ..?
သန့်ရှင်းရေးသမားဖြစ်တဲ့အချိန်မှာလည်း မခိုမကပ်ဘဲ စေတနာပါပါနဲ့ ကျွန်တော်ကြိုးစားတယ်။ အဲဒီလိုအချိန်မှာ ကျွန်တော်အခွင့်အရေးရလာခဲ့တယ်။ ဒီကုမ္ပဏီခေါင်းဆောင် အုပ်ချုပ်ရေးပိုင်း၊ ဝင်ဒီစားသောက်ဆိုင်ရဲ့ အပြည်ပြည်ဆိုင်ရာ ဥရောပဌာနခွဲ (Wendy's International European Division) သူဌေးက ကျွန်တော့်ကို အရမ်းသဘောကျပြီးတော့ အလုပ်သမားအဆင့်ကို တိုးပေးလိုက်တယ်။ နောက်ပိုင်းမှာ ဂျနီဗာမြို့မှာရှိတဲ့ ပထမဆိုင်ကို ကျွန်တော့်ကို အုပ်ချုပ်ခိုင်းတယ်။ အဲဒီမှာ ကျွန်တော်အုပ်ချုပ်တာ ကောင်းမွန်လို့ ထပ်ပြီးတော့ သဘောကျပြီး နောက်ထပ်ဆိုင် ၃ ဆိုင်ကိုထပ်ပြီး အုပ်ချုပ်ရတယ်။
အဲဒီနောက်မှာ စောစောက သူဌေးနဲ့ကျွန်တော် အတူဖက်စပ်လုပ်ပြီးတော့ မက်စီကန် (Mexican) စားသောက်ဆိုင်တွေကိုဖွင့်ခဲ့ပါတယ်။ အဲဒီဆိုင်တွေကိုတော့ ဆွစ်ဇာလန်နိုင်ငံမှာရှိတဲ့ မြို့ ၃ မြို့ဖြစ်တဲ့ ဂျနီဗာမြို့၊ လောဆန်းမြို့၊ မွန်ထိုမြို့မှာ ဖွင့်လှစ်ဖြစ်ခဲ့ပါတယ်။ အဲဒီလိုဖွင့်လှစ်ခဲ့ပြီး အရမ်းအောင်မြင်လာတဲ့ အချိန်မှာ ကျွန်တော် အဲဒီ ကုမ္ပဏီကထွက်ဖြစ်ပြီး ကိုယ့်ဘာသာကိုယ် Sharky's S.A ကုမ္ပဏီတစ်ခု ထောင်ခဲ့ပါတယ်။ ကုမ္ပဏီက ဘာတွေလုပ်လဲဆိုတော့ ဂျနီဗာမြို့ဟောင်းမှာ Cocktail Bar ဆိုင်တွေ၊ ပြောရမယ်ဆိုရင်တော့ အဆင့်မြင့်အရက်ဆိုင်တွေ ဖွင့်ဖြစ်တယ်။
ပြောရမယ်ဆိုရင် နိုက်ကလပ် (Night Club) တစ်မျိုးလိုဖြစ်နေပြီး အလုပ်ချိန်က မနက် ၉ နာရီကနေ ည ၂ နာရီအထိ ဖြစ်နေတယ်။ အဲဒီအချိန်မှာ အိမ်ထောင်လည်းကျ၊ ကလေးတစ်ယောက်လည်း ရနေတော့ ဒီလို ညဘက်အလုပ်ကြီးကို မလုပ်ချင်တော့ဘူး။ အဲဒီမှာ ကျွန်တော် ၄ နှစ်လောက်အုပ်ချုပ်လိုက်ပြီးတော့ အတော် အောင်မြင်သွားပြီး ငွေလေးတွေလည်း လက်ထဲမှာရှိတော့ ကျွန်တော်အရမ်းဝါသနာပါတဲ့ စိုက်ပျိုးရေး အလုပ်ကိုလုပ်ဖို့ မြန်မာပြည်ပြန်လာခဲ့တယ်။ ပြောရမယ်ဆိုရင်တော့ မြန်မာပြည်မှာ ဟင်းသီးဟင်းရွက်တွေ စိုက်တဲ့ တောင်သူလယ်သမားတစ်ယောက် လုပ်ခဲ့တယ်။
မြန်မာပြည်ရောက်ချိန်မှာ ကျွန်တော်အသက် ၃၅ နှစ်လောက်ရှိပါပြီ။
မြန်မာပြည်မှာဆိုရင်တော့ ကျွန်တော်တို့ကုမ္ပဏီကစပြီး အော်ဂဲနစ်လယ်ယာစိုက်ပျိုးရေးကို စလုပ်ခဲ့တာပါ။ စစဦးချင်း ကျွန်တော်က ပုလဲမြို့သစ်မှာရှိတဲ့ ကျွန်တော့် စိုက်ခင်းတွေမှာ စတင်ပြီး စိုက်ပျိုးပါတယ်။ဘာတွေစိုက်လဲဆိုတော့ ဆလတ်ပေါင်းစုံ၊ ပင်စိမ်းမျိုးစုံ စိုက်တယ်။ အဲဒါကလည်း တော်တော်အောင်မြင်တယ်။ ပထမဆုံး ကျွန်တော့်မှာ ကိုယ်ပိုင်ဖွင့်ထားတဲ့ဆိုင်မရှိတော့ ဟိုတယ်တွေကို ပို့တယ်။
ဥပမာ - Strand တို့၊ အင်းလျားလိတ်ဟိုတယ်တို့၊ ဆီဒိုးနားကို ပို့တယ်။ ပြည်တွင်းမှာ ကျွန်တော် ဒီလိုအောင်မြင်ပြီးတဲ့အခါမှာ ကျွန်တော် ဆွစ်ဇာလန်နိုင်ငံကို ခဏပြန်သွားပြီး ချိစ်လုပ်ငန်းကို သေချာပြန်သင်ယူတယ်။ အခုဆိုရင် မြန်မာပြည်မှာ ချိစ်အမျိုးပေါင်း (၁၈) မျိုးကို စတင်ထုတ်လာခဲ့တာ ၁၅ နှစ် ကျော်သွားပါပြီ။ ချိစ်လုပ်ငန်းကိုလုပ်ကိုင်နိုင်ပြီဆိုမှ ပေါင်မုန့်မျိုးစုံလုပ်နည်းလုပ်ငန်းကိုတတ်ကျွမ်းအောင် ထပ်ပြီးတော့လေ့လာပြီး ပေါင်မုန့် အမျိုးပေါင်း ၂၅မျိုးလောက်ထုတ်တယ်။ ပြီးမှ အသားကို စပြီးတော့ ကိုင်တယ်။
အသားဆိုတာ ဝက်ပေါင်ခြောက်တို့၊ ဝက်အူချောင်းတို့၊ ဝက်အူချောင်းအခြောက်တို့ကို ဥရောပစံချိန်မီအောင် လုပ်ပြီးတော့ ကျွန်တော် ရောင်းချတယ်။ အဲဒီလိုရောင်းချတဲ့အခါမှာ ဆိုင်တွေက တစ်ဆိုင်ကနေ ၂ ဆိုင်၊ ၂ ဆိုင်ကနေ ၃ ဆိုင်ဖြစ်လာခဲ့တယ်။
ပထမဆုံးဆိုင်လေးကတော့ ရွှေတောင်ကြားလမ်းမှာ ၁၀ နှစ်ကျော်ကြာအောင် ဖွင့်ဖြစ်ခဲ့တယ်။ အဲဒီဆိုင်က ၁၀ နှစ်လုံး ဖွင့်တဲ့အချိန်မှာ ဆိုင်းဘုတ်လည်းမရှိခဲ့ဘူး။ ဘာနာမည်မှလည်း မပေးခဲ့ဘူး။ ဒါပေမယ့် နောက်ဆုံးမှာ အဲဒီဆိုင်လေးက တစ်ဆင့်စကားနဲ့တင် နာမည်ကြီးလာတော့ မနိုင်တော့ဘူး။ ဒီတော့ အင်းလျားလမ်းမှာ Sharky's 2 ဆိုပြီး ဆိုင်လေးတစ်ဆိုင်ထပ်ဖွင့်လိုက်တယ်။ အဲဒီဆိုင်လေး ကလည်း အရမ်းအောင်မြင်ခဲ့တယ်။ အဲဒီနောက် ၅ နှစ်လောက်ကြာတော့ ဒီ Sharky's 3 ကို ထပ်ဖွင့်လိုက်တယ်။ အခုနောက်ဆုံးဆိုင်က တော့ ၄ နှစ်လောက်ရှိပါပြီ။
ကျွန်တော့်အကြောင်း အစကနေပြောရရင် ကျွန်တော့်အဖေက နိုင်ငံခြားရေးဝန်ကြီးဌာနမှာ သံမှူးကြီးတစ်ယောက်ပါ။ ကျွန်တော် ၂ နှစ်သားကနေ အသက် ၁၃ နှစ်သားအထိ ကျွန်တော့်အဖေ တာဝန်ထမ်းဆောင်ရတဲ့နိုင်ငံပေါင်းစုံကို လိုက်သွားခဲ့တယ်။ အဲဒီကနေပြီးတော့ ဆွစ်ဇာလန်ကို အဖေတာဝန်ထမ်းဆောင်တော့ လိုက်သွားတာ။ အဖေက ၃ နှစ်တာဝန်ပြီးတော့ ကျွန်တော်က ဆက်နေခဲ့တာ။
အဲဒီမှာ ကျွန်တော် သန့်ရှင်းရေးဝန်ထမ်းစလုပ်ဖြစ်ပုံက ဆွစ်ဇာလန်နိုင်ငံက ပြင်သစ်လိုပြောတဲ့ နိုင်ငံဆိုတော့ ကျွန်တော်က ပြင်သစ်လိုတစ်လုံးမှ မတတ်တော့ အလုပ်လိုက်ရှာတာ မလွယ်ဘူးဖြစ်နေတယ်။ ဒီတော့ ပြင်သစ်စာကျောင်းလည်းတက်ရင်း ရတဲ့အလုပ်ဝင်မိရာကနေ သန့်ရှင်းရေးဝင်လုပ်ဖြစ်သွားတာပါ။
အဓိကကတော့ သူများတိုင်းပြည်မှာ အလုပ်သွားလုပ်ရင် ဟိုအလုပ်ရွေး၊ ဒီအလုပ်ရွေးလို့ မရပါဘူး။ အောက်ခြေကလာတဲ့လူဆိုရင် ပိုဆိုးတယ်။ အထူးသဖြင့် သူများတိုင်းပြည်မှာ သွားပြီးအလုပ်လုပ်ရင်တော့ ဘယ်တိုင်းပြည်သွားသွား၊ ဘယ်လောက်တော်နေပါစေ သူတို့လူမျိုးကို ဦးစားပေးမှာပေါ့။
ဒီတော့ သူများရဲ့ တိုင်းပြည်မှာလုပ်ပြီး ပိုအောင်မြင်ချင်ရင်တော့ သူများထက် ၂ ဆ၊ ၃ ဆ လောက် ပိုပြီးတော့ကြိုးစားရမယ်။ ဝီရိယလည်းရှိရမယ်။ ကံလည်းကံကောင်းရမယ်။ ဆရာကောင်းလည်းရမယ်ဆိုရင်တော့ အဆင်ပြေနိုင်ပါတယ်။ ကျွန်တော်ကတော့ ကြိုးလည်းကြိုးစားတယ်။ ဆရာကောင်းလည်းရခဲ့တယ်။ သူတို့ကြောင့်လည်း ကျွန်တော် အခုဒီလိုအဆင့်လောက် ရောက်လာတာပါ။
ကျွန်တော့်အမြင်ကိုပြောရရင် အခုခေတ်က ဝီရိယရှိပြီး ကြိုးစားနေရုံနဲ့လည်းမရဘူး။ ကိုယ်လုပ်တဲ့ အလုပ်ပေါ်မှာ တီထွင်ကြံဆမှုနဲ့ အမြဲတမ်းလုပ်နေရမယ့်ခေတ်ကြီးလို့ မြင်မိပါတယ်။
အစားအသောက်တွေဖန်တီးမှုနဲ့ ပက်သက်ပြီး ဦးရဲဝင်းထွဋ်ရဲ့ အမြင်ကတော့ ‘‘အစားအသောက်က ပီတိရှိရမယ်။ အာရုံရှိရမယ်။ စိတ်ပါဝင်စားမှုရှိရမယ်။ တိကျမှုရှိရမယ်။ အဲဒါတွေ မရှိရင်တော့ အောင်မြင်နိုင်မှာမဟုတ်ဘူး’’ လို့ ယုံကြည်ထားသူတစ်ယောက်ဖြစ်ပါတယ်။
ဒါတွေကတော့ Master Chef Myanmar မှာ ထူးထူးခြားခြား စကတ်ကြီးတကားကားဝတ်ပြီး ပြိုင်ပွဲဝင်တွေကို မညှာမတာ ဝေဖန်ထောက်ပြတတ်တဲ့ ဦးရှာကီရဲ့ ကြိုးစားခဲ့ရတဲ့ ဘဝဖြတ်သန်းမှုတွေပဲဖြစ်ပါတယ်။
Master Chef Myanmar ပြိုင်ပွဲဝင်တွေအားလုံးကို မိသားစုအရင်းတွေလို တော်စေ ထက်မြက်စေချင်တဲ့ ဦးရဲဝင်းထွဋ်ရဲ့ စိတ်ခံစားမှုတွေကိုလည်း ပြိုင်ပွဲဝင်တစ်ဦး ထွက်ခွာသွားတိုင်း တွေ့မြင်ကြရပါတယ်။
မှတ်ချက်။ ။ Food Magazine Myanmar နဲ့ ဦးရဲဝင်းထွဋ် တို့ရဲ့ ၂၀၁၃ ခုနှစ်က ပြုလုပ်ခဲ့တဲ့ အင်တာဗျူးလေးကို Master Chef Myanmar ပရိသတ်တွေ သိရှိအောင် ပြန်လည် ကောက်နှုတ်ဖော်ပြရခြင်းဖြစ်ပါတယ်။
Photo: Food Magazine Myanmar, Master Chef Myanmar
