မလေးရှားတွင် မြေပြိုကျပြီး မြန်မာလုပ်သား ၃ ဦးသေဆုံး
15 Oct 2018 1,437 Views
အောက်တိုဘာလ ၁၄ ရက် တနင်္ဂနွေနေ့က မလေးရှားနိုင်ငံ ကမ်မရွန်ဟိုင်းလန်းစ် (Cameron Highlands) ဒေသတွင် မြေပြိုကျခဲ့မှုကြောင့် မြန်မာအလုပ်သမား အမျိုးသမီး ၂ ဦးနှင့် အမျိုးသားတစ်ဦးတို့ အရှင်လတ်လတ် သင်္ဂြိုလ်ခံခဲ့ရသလိုဖြစ်ကာ သေဆုံးခဲ့ကြောင်း မလေးရှားရဲတပ်ဖွဲ့က အတည်ပြုပြောကြားခဲ့သည်။
သေဆုံးခဲ့သူများမှာ မောင်အောင်ထန်းနဲ့ မနိုင်းဝါ ချင်းလူမျိုး အသက် ၂၃ နှစ် ဇနီးမောင်နှံနှင့် ဒေါ်မူမူအေး အသက် ၃၄ နှစ် ရခိုင်အမျိုးသမီးတို့ ဖြစ်ကြကြောင်း သိရှိရသည်။ သူတို့ ၃ ဦးဟာ မလေးရှားနိုင်ငံတွင် စိုက်ပျိုးရေးအလုပ်သမားများအဖြစ် လုပ်ကိုင်နေကြပြီး ကားလမ်းတစ်ခု၏ဘေး ချိုင့်ထဲတွင် တဲထိုးနေထိုင်ကြသူများ ဖြစ်သည်။
အဆိုပါနေ့က သူတို့ ၃ ဦး တဲအတွင်း၌ အိပ်မောကျနေစဉ် မိုးသည်းထန်ရွာသွန်းပြီးနောက် ကမ်းပါးပြိုကျခဲ့ရာ တဲပေါ်သို့ မြေများပြိုကျခဲ့ပြီး တဲတစ်ခုလုံး မြေကြီးအောက် ရောက်သွားခဲ့ကြောင်း ရဲအဖွဲ့က ပြောကြားခဲ့သည်။
ရဲအဖွဲ့က ရောက်လာချိန်တွင် အလောင်း ၂ လောင်းအား ၎င်းတို့၏ မိတ်ဆွေများမှ တူးဖော်ပြီးဖြစ်သည်။ ပြန်လည်တူးဖော်ရရှိသော အလောင်း ၃ လောင်းကို တာနာရာတားမြို့ဆေးရုံသို့ပိုဆောင်ခဲ့ကြသည်။
