သားငယ်လေးကို ထိခိုက်နစ်နာအောင်ပြောဆိုသူကို ၆၆(ဃ) နဲ့အရေးယူမယ်ဆိုတဲ့ ပိုင်ဇေရဲထွန်း

11 Oct 2018 1,807 Views

သရုပ်ဆောင်ပိုင်ဇေရဲထွန်းကတော့ ပရိသတ်တွေရဲ့အချစ်တွေကို နှစ်ပေါင်းများစွာတိုင် ရရှိပိုင်ဆိုင်ထားတဲ့ မင်းသားချောတစ်ယောက်ဖြစ်ပါတယ်။ အနုပညာအလုပ်တွေကိုနားထားပေမယ့်လဲ မင်းသမီးလေးလို ချောမောလှပပြီး အိမ်ထောင်ရှင်မကောင်းပီသတဲ့ ဇနီးသည်နဲ့အတူ ချစ်စရာကောင်းတဲ့ သားသားမီးမီးလေးတွေနဲ့ ပျော်ရွှင်သာယာတဲ့မိသားစုဘ၀လေးကို တည်ဆောက်ထားသူဖြစ်ပါတယ်။ ပျော်ရွှင်အားကျစရာကောင်းတဲ့ မိသားစုလေးမို့လဲ ပရိသတ်တွေက သဲသဲလှုပ်ချစ်နေကြရတာဖြစ်ပါတယ်။

ပိုင်ဇေရဲထွန်းတစ်ယောက် သားအငယ်ဆုံးလေးကို နစ်နာအောင်ပြောဆိုလိုက်တဲ့သူကို ၆၆ (ဃ) နဲ့အရေးယူတိုင်ကြားသွားမယ်လို့သိရပါတယ်။ မိန်းမဖြစ်သူရဲ့လူမှုကွန်ယက်ပေါ်ကနေ သားငယ်လေးရဲ့ဗီဒီယိုကို အပျော်သဘောနဲ့တင်လိုက်ရာမှ ကလေးကိုထိခိုက်နစ်နာစေမယ့်စကားကို ပြောဆိုလိုက်တဲ့အတွက်ကြောင့် ထိုသူကိုတရားစွဲဆိုဖို့ပြင်ဆင်နေတာဖြစ်တယ်လို့သိရပါတယ်။ ထိုကိစ္စနဲ့ပတ်သက်ပြီး အင်တာဗျူးတစ်ခုကနေ ယခုလိုပဲပြောကြားထားပါတယ်။

“ပြီးခဲ့တဲ့ရက်ပိုင်း မှတ်မှတ်ရရပြောရမယ်ဆို ညီလေးမင်းသွေးဆုံးသွားတဲ့နေ့ဖြစ်မယ်။ အဲ့နေ့မနက်ပိုင်းက လုပ်စရာရှိတာတွေလုပ်ပြီး ကလေးတွေကိုကျောင်းပို့မယ့်အချိန်မှာ အမျိုးသမီးကမျက်နှာသိပ်မကောင်းဖြစ်နေတယ်။ မေးလိုက်တော့ ဖေ့စ်ဘွတ်ပေါ်ကအကြောင်းကိုပြောတယ်။ အဲ့ရှေ့မတိုင်ခင်က ဘာမှမဟုတ်တဲ့ပို့စ်လေးတစ်ခုကို တင်လိုက်မိတယ်။ တင်လိုက်တဲ့အခါ တော်တော်များများရဲ့စိတ်ထဲမှာ မနှစ်မြို့တာတွေကိုလဲ အစ်ကို့ကိုပြောကြတယ်။ ပြောပေမယ့် အစ်ကိုခံနိုင်ရည်ရှိတယ်။ ဒါကတော့ လူဆိုတော့ သူတို့မကြိုက်ရင် ဝေဖန်နိုင်ခွင့်ရှိတယ်။ အစ်ကို့စိတ်ထဲမှာတော့ “ငါရေးတဲ့အဓိပ္ပာယ်ကို သူတို့မသိကြလို့ပဲ”လို့ သဘောထားလိုက်တယ်။ တစ်နိုင်ငံလုံးဆဲလဲ ဘာမှမဖြစ်ဘူး။ ဒါပေမယ့် သားလေးကအငယ်ဆုံးသားလေး၊ သူ့ကိုပြောတဲ့အခါကျတော့ စိတ်ထဲမှာနဲနဲဒေါသဖြစ်သွားတယ်။ ပြောတဲ့သူရဲ့ဖေ့စ်ဘွတ်အကောင့်ထဲဝင်ကြည့်လိုက်တဲ့အခါကျတော့လဲ ဘာဖြစ်ချင်တာလဲပေါ့။ ဒီကလေးလေးကို သူဘာပြောချင်တာလဲပေါ့ဆိုပြီး ကျွန်တော်ရေးတင်လိုက်တယ်။ ဒါပေမယ့် ဖတ်ရင်းဖတ်ရင်းနဲ့ ဒေါသထွက်လာတယ်။ ကျွန်တော်ကနှလုံးရောဂါအခံရှိတော့ လဲပါကျသွားတယ်။ တစ်ညလုံးအိပ်လို့မရတော့ဘူး”

“ပြောတဲ့ကောင်လေးကလဲ ပညာတတ်လေးဗျ။ တကယ်သာ သူသင်ကြားတဲ့ ဆရာဝန်တစ်ယောက်ရဲ့ရင့်ကျက်မှု၊ သင်ကြားထားတဲ့ ပညာဗဟုသုတတွေနဲ့ဆို သူမရေးသင့်ဘူး။ ပြီးတော့ သူကျွန်တော့်အမျိုးသမီးကို တောင်းပန်တယ်။ ကျွန်တော့်ကိုတော့ မတောင်းပန်ဘူး။ အစ်ကိုကလဲ ဘယ်လိုအနေအထားနဲ့မှ ခွင့်မလွှတ်ဘူး။ အနုပညာနဲ့မဆိုင်တဲ့ ကလေးတစ်ယောက်ကိုပြောတဲ့အတွက် ခွင့်မလွှတ်နိုင်ဘူး။ ဖြစ်တဲ့နေ့မှာပဲ ရဲစခန်းကို အချက်အလက်အစုံအလင်နဲ့ အကြောင်းကြားထားတယ်။ ခုချိန်ထိတော့ဘာမှမထူးခြားသေးဘူး။ သူ့ဘက်က စိတ်ကျေနပ်အောင် မတောင်းပန်သေးတဲ့အတွက် ကျေနပ်မှုတော့မရှိသေးဘူး။ ကျွန်တော်လုပ်လိုက်လို့ သူ့ပညာရေးနဲ့ ဘ၀တစ်ခုခုထိခိုက်သွားမှာမျိုးတော့ မလိုလားပါဘူး။ ဒါပေမယ့်လဲ ကျွန်တော့်သားသမီးအတွက်လဲ တစ်ခုခုတော့ပြန်လုပ်ပေးရလိမ့်မယ်” ဆိုကာ ပြောကြားထားတာပဲဖြစ်ပါတယ်။