အောက်တိုဘာလ ၂ ရက်နေ့ ညနေပိုင်းတွင် ဘဏ်မှထုတ်ယူလာသော ငွေထုတ်ထဲမှ ကျပ်တစ်သောင်းတန် ငွေစက္ကူအတု (၃)ရွက် ပါလာသည့်ကိစ္စအား လူမှုကွန်ယက်အွန်လိုင်းပေါ်မှ Live လွှင်ကာ ပြောဆိုခဲ့သော မနွယ်နွယ်သင်းယုဝေ အား ဆက်သွယ်ရေးပုဒ်မ ၆၆(ဃ)ဖြင့် အမှုဖွင့်တိုင်ကြားထားကြောင်း သိရှိရသည်။

 

ဖြစ်စဉ်မှာ ၂၀၁၈ ခုနှစ်၊ အောက်တိုဘာလ ၂ ရက်နေ့ ညနေ ၅ နာရီအချိန် ဘီးလင်းမြို့၊ ကန်သာယာရပ်ကွက် ရှိ ဧရာဝတီဘဏ်ခွဲသို့ ဆရာစံရပ်ကွက်နေ ဒေါ်အိသဉ္ဇာလှိုင် မှငွေကျပ်သိန်း(၂၀၀) အား ငွေစာရင်းဖွင့်လှစ် အပ်နှံစဉ်(၁၀,၀၀၀)ကျပ်တန် ငွေစက္ကူအတု(၃)ရွက်ပါရှိလာသဖြင့် ဘဏ်အကြီးတန်း(လက်ထောက်) ငွေကြေးတာဝန်ခံဖြစ်သူ ဘိုးရာဇာရပ်ကွက်နေ မအိအိကျော်(၂၇)နှစ်မှ ဘီးလင်းမြို့မရဲစခန်းသို့ လာရောက် အပ်နှံခဲ့သည်။

 

အဆိုပါကိစ္စနှင့်ပတ်သက်၍ ဒေါ်အိသဉ္ဇာလှိုင်၏ ညီမဝမ်းကွဲ ဒေါ်နွယ်နွယ်သင်းယုဝေ မှ လူမှုကွန်ရက် Facebook စာမျက်နှာပေါ်တွင် " ဧရာဝတီဘဏ်လီမိတက်(ဘီးလင်းဘဏ်ခွဲ)ရှိ ဘဏ်ဝန်ထမ်း(၁)ဦးက ငွေအတုထည့်သည်ကို ဘဏ်၏ CCTV မှတ်တမ်း၌ တွေ့မြင်ရကာ ၎င်း၏ အစ်မဖြစ်သူအား ဘဏ်မှ ခြိမ်းခြောက်ပြောဆိုသည်"ဟု Liveလွှင့်ခဲ့သောကြောင့် ဂုဏ်သိက္ခာကျ ဆင်းအောင် လူမှုကွန်ရက်ပေါ်၌ မဟုတ်မှန်ပြောဆို Live လွှင့်ခဲ့မှုအား အရေးယူပေးရန် တိုင်တန်းချက်အရ ဒေါ်နွယ်နွယ်သင်းယုဝေ အား ဘီးလင်းမြို့မရဲစခန်း(ပ)၄၆၃/ ၂၀၁၈၊ ဆက်သွယ်ရေးဥပဒေပုဒ်မ ၆၆(ဃ) ဖြင့် အရေးယူထားကြောင်း သိရှိရသည်။

 

အဆိုပါဖြစ်စဉ်နဲ့ ပက်သက်ပြီး ဧရာဝတီဘဏ်မှလည်း ရှင်းလင်းချက် တစ်စောင်ကို အောက်တိုဘာလ ၂ ရက်နေ့က အောက်ပါအတိုင်း ချက်ခြင်းထုတ်ပြန်ခဲ့သည်။

 

"ဘီးလင်းဘဏ်ခွဲတွင် (၂-၁၀-၂၀၁၈) ရက်နေ့က ဖြစ်ပွားခဲ့သည့် ဖြစ်စဉ်နှင့် ပတ်သက်ပြီး ရှင်းလင်းတင်ပြချက်"

 

ချစ်ခင်လေးစားရပါသော မိဘပြည်သူများအား လက်တလော ဧရာဝတီဘဏ် ဘီလင်းဘဏ်ခွဲမှ ကိစ္စရပ်အား သိရှိနိုင်ပါရန် လေးစားစွာ တင်ပြအပ်ပါသည်။

 

(၂-၁၀-၂၀၁၈) ရက်နေ့တွင် ဧရာဝတီဘဏ် ဘီးလင်းဘဏ်ခွဲသို့ ဘဏ်ဝန်ဆောင်မှုများအား ပုံမှန် အသုံးပြုသူ မအိသဉ္ဇာလှိုင်သည် နံနက် (၁၀) နာရီခွဲခန့်တွင် ဘဏ်သို့ လာရောက်၍ ယင်း၏ ဘဏ်အကောင့်သို့ ငွေကျပ်သိန်း (၂၀၀) တစ်သောင်းတန် (၁၀) အုပ် (၂) စည်း ငွေပေးသွင်းရာတွင် ဝန်ထမ်းများမှ ငွေ အတု/အစစ် ခွဲခြား စစ်ဆေးသည့် စက်ဖြင့် စစ်ဆေးစဉ် ငွေစက္ကူအတုဟု ယူဆရသော ၁၀,၀၀၀ ကျပ်တန် (၃) ရွက် တွေ့ရှိသဖြင့် မြန်မာနိုင်ငံတော် ဗဟိုဘဏ်၏ ညွှန်ကြားချက်များအရ ဘဏ်၏ လုပ်ထုံး လုပ်နည်းအတိုင်း ငွေစက္ကူအတုများ ဖြစ်ကြောင်း ရှင်းလင်းပြောပြခဲ့ပြီး အဆိုပါ ငွေစက္ကူအတု ၁၀,၀၀၀ ကျပ်တန် (၃) ရွက်အား မြို့နယ်ရဲစခန်းသို့ အပ်နှံ ရမည် ဖြစ်ကြောင်း အသိပေးပြောကြားခဲ့ပြီး ဘီးလင်းမြို့ ရဲတပ်ဖွဲ့ စခန်းသို့ တရားဝင် သတင်းပို့ အပ်နှံခဲ့ပါသည်။

 

ထိုကဲ့သို့ လုပ်ထုံးလုပ်နည်းအား ရှင်းလင်းပြောကြားမှုကို ငွေလာရောက် ပေးသွင်းသည့် မအိသဉ္ဇာလှိုင်မှ ကျေနပ်စွာ နားလည် လက်ခံပြီး ငွေကျပ် သုံးသောင်း ပေးအပ်ခဲ့ချိန်တွင် ဘဏ်သို့ လာရောက်သည့် အမျိုးသမီး တစ်ဦးမှ ငွေစက္ကူအတုအား လိုက်လံကြည့်ရှုပြီး ဓါတ်ပုံ ရိုက်ခြင်း ပြုလုပ်ခြင်းနှင့် ဘဏ်၏ပြင်ပတွင် ၎င်း၏ Facebook မှတဆင့် Live လွှင့်တင်ခဲ့ပါသည်။

 

ထိုသို့ Live လွှင့်တင်ခဲ့ရာတွင် ဘဏ်ခွဲမှ တာဝန်ရှိသူ ဝန်ထမ်းသည် ငွေစက္ကူအတုအား လဲလှယ်ခဲ့ သည်ဟု မဟုတ်မမှန် စွပ်စွဲပြောကြားခြင်း၊ ဘဏ်ဝန်ထမ်းများ၏ ဂုဏ်သိက္ခာကျဆင်းစေရန်နှင့် အများပြည်သူများ ယုံမှား သံသယ ဖြစ်စေရန် အကြိမ်ကြိမ် ပြောဆိုခြင်းများအား Facebook Account ပိုင်ရှင် Nwe Nwe YU Wai (YU Wai OO) မှ ဆောင်ရွက်ခဲ့ကြောင်း သိရှိခဲ့ရပါသည်။

 

ဖြစ်စဉ်များကို သိရှိချိန်တွင် ဧရာဝတီဘဏ်အား ယုံကြည်စွာဖြင့် ငွေလာရောက် အပ်နှံသည့် ဘဏ်စာရင်း ပိုင်ရှင် မအိသဉ္ဇာလှိုင်အား ပိုမိုတိကျမှန်ကန်သော အဖြေရရှိနိုင်ရန်အတွက် တာဝန်ရှိသူများ ဖြစ်သည့် ဘီးလင်း ရဲတပ်ဖွဲ့ စခန်းမှ ရဲအရာရှိများ၊ မွန်ပြည်နယ် မှုခင်းတပ်ဖွဲ့ တာဝန်ခံ ရဲအရာရှိနှင့် ဧရာဝတီဘဏ်မှ Risk and Compliance Team (Enterprise Risk Management Department) တို့မှ တာဝန်ယူ စစ်ဆေးခဲ့ပါသည်။ ထို့ပြင် ဘီးလင်း မြို့နယ် လွှတ်တော် ကိုယ်စားလှယ်ရုံးတွင် ဘဏ်၏ ဝန်ဆောင်မှုအား အသုံးပြုသည့် မအိသဉ္ဇာလှိုင်နှင့် ယင်းခင်ပွန်း ဖြစ်သူတို့အားမြို့နယ် လွှတ်တော် ကိုယ်စားလှယ်၊ ရပ်မိရပ်ဖများနှင့် ဧရာဝတီဘဏ် တာဝန်ရှိသူများမှ တွေ့ဆုံ ရှင်းလင်း ပြောကြားခဲ့ပါသည်။ ဘီးလင်း ဘဏ်ခွဲတွင် ဘဏ်ခွဲ တာဝန်ခံ၊ ငွေကိုင်မှူး နှင့် တာဝန်ရှိသူများမှ မအိသဉ္ဇာလှိုင်၊ ယင်း၏အမျိုးသားတို့နှင့်အတူ CCTV မှတ်တမ်းအား ပြန်လည် ကြည့်ရှုစစ်ဆေးခဲ့ကြပြီး ဖြစ်စဉ် အမှန်အား သိရှိခွင့်ရသည့်အတွက် ဧရာဝတီဘဏ်နှင့် တာဝန်ရှိသူများအား မအိသဉ္ဇာလှိုင် နှင့် ယင်း၏ ခင်ပွန်းတို့မှ ကျေးဇူးတင်ရှိပါကြောင်း ပြောကြားခဲ့ပါသည်။ ဧရာဝတီဘဏ်တွင် ယင်းတို့၏ ငွေစာရင်း အကောင့်များ ဆက်လက်ထားရှိပြီး ဘဏ်ဝန်ဆောင်မှုများ ဆက်လက်၍ ယုံကြည်စွာ အသုံးပြုသွားမည် ဖြစ်ကြောင်း ပြောကြားခဲ့ပါသည်။

 

ဆက်လက်၍ ဧရာဝတီဘဏ်၏ ဝန်ဆောင်မှုများ သုံးစွဲသူ မအိသဉ္ဇာလှိုင်မှ ဘဏ်သို့ Facebook တွင် Live တင်သည့် Nwe Nwe YU Wai (YU Wai OO) နှင့်အတူ လာရောက်ခြင်း မဟုတ်ပါကြောင်း၊ ရှင်းလင်းပြောပြရုံမက အဆိုပါ Nwe Nwe YU Wai (YU Wai OO) သည် Facebook မှတဆင့် Live လွှင့်တင်ခြင်းအား မိမိ လုံးဝ သဘောမတူကြောင်း၊ အခွင့်အရေးတစ်ရပ်အနေနှင့် မိမိနာမည် ရရန် မလုပ်သင့်ပါကြောင်းနှင့် ဤကိစ္စလည်းမိမိနှင့် ဧရာဝတီဘဏ်သာ သက်ဆိုင်ပါကြောင်း ပြောကြားခဲ့ ပါသည်။

 

ထို့အပြင် အဆိုပါ Live Video လွှင့်တင်ခြင်းများအား ဖျက်ပေးရန် မအိသဉ္ဇာလှိုင်မှ (၂-၁၀-၂၀၁၈) ရက်နေ့ ညတွင် Nwe Nwe YU Wai (YU Wai OO) အား သွားရောက်တွေ့ဆုံပြီး ထိုကဲ့သို့ ပြုလုပ်ခြင်း မပြုရန် တောင်းပန် ခဲ့ကြောင်း၊ မိမိ အနေဖြင့်လည်း ဧရာဝတီဘဏ်နှင့် နှစ်ဦးနှစ်ဖက် အဆင်ပြေပါကြောင်း၊ Nwe Nwe YU Wai (YU Wai OO) သည် ကြားထဲမှ မိမိနှင့် ဘဏ်ကြား ပြဿနာဖြစ်စေရန် ပုံကြီးချဲ့ခြင်း ဖြစ်ကြောင်း၊ အခွင့်အရေး တစ်ရပ် အဖြစ် ထင်ပေါ်အောင် ဤဖြစ်စဉ်အား အသုံးချကာ မိမိတို့အား အသုံးချ လုပ်ဆောင်သည်ဟု ယူဆကြောင်း၊ ဘဏ်ဘက်မှ တရားဥပဒေကြောင်းအရ လုပ်ဆောင်စရာရှိသည်များကိုလည်း လုပ်ဆောင်ရန် မိမိအနေဖြင့် လုံးဝ လက်ခံ သဘောတူကြောင်း တို့ကို ပြန်လည် ပြောကြား ခဲ့ပါသည်။

 

သို့ဖြစ်ပါ၍ Facebook ပေါ်တွင် ဧရာဝတီဘဏ် ဘီးလင်း ဘဏ်ခွဲ ဝန်ထမ်းများမှ ငွေအတု လဲလှယ်ခြင်း ပြုလုပ်ခဲ့ကြောင်း မဟုတ်မမှန် စွပ်စွဲ ပြောကြားခဲ့သည့် Facebook Account ပိုင်ရှင် Nwe Nwe YU Wai (YU Wai OO) အား နစ်နာသူ ဘီးလင်း ဘဏ်ခွဲ ဝန်ထမ်းများမှ တည်ဆဲဥပဒေများအရ ဘီးလင်းမြို့ရဲစခန်းတွင် တိုင်ချက်ဖွင့်၍ တရားဥပဒေအရ ဆက်လက် ဆောင်ရွက်မည် ဖြစ်ပါကြောင်း လေးစားစွာ အသိပေးအပ်ပါသည်။

 

ဤဖြစ်စဉ်အပေါ်တွင် စာဖြင့်သော်လည်းကောင်း၊ ဖုန်းဖြင့်သော်လည်းကောင်း၊ ဆက်သွယ် မေးမြန်း ကြပါသော၊ စိုးရိမ်ပူပန်ခဲ့ကြရပါသောမိဘ၊ ပြည်သူ၊ မိတ်သင်္ဂဟများ အားလုံးကို ဧရာဝတီဘဏ်မှ ကျေးဇူးအထူး တင်ရှိပါကြောင်းနှင့် မိမိတို့အနေဖြင့် တည်ဆဲ ဥပဒေများဖြင့် ဆက်လက် ဆောင်ရွက်သွားမည် ဖြစ်ကြောင်း မိဘပြည်သူများအား အသိပေးတင်ပြအပ်ပါသည်။

 

 

**************************