အိမ်အကူအမျိုးသမီးအား ရွှေဆိုင်ပိုင်ရှင်မှ လိမ်လည်မှုဖြင့် တရားစွဲဆိုအမှုဖွင့်
10 Sep 2018 1,451 Views
မွန်ပြည်နယ် မော်လမြိုင်မြို့တွင် အိန္ဒိယနွယ်ဖွား အိမ်အကူအမျိုးသမီးတစ်ဦးအား အိမ်ရှင်ဖြစ်သူ ရွှေဆိုင်ပိုင်ရှင်က ကြိုတင်လုပ်အားခငွေများ အပြည့်အဝ ပြန်လည်ရလိုမှုဖြင့် တရားစွဲအမှုဖွင်ထားကြောင်း သိရှိရသည်။
ဖြစ်စဉ်မှာ မွန်ပြည်နယ်၊ သထုံမြို့၊ နန်းခဲရပ်ကွက်နေ မသဇင်စိုး (အိန္ဒိယနွယ်ဖွား) သည် ဆင်းရဲကျပ်တည်းလွန်းသဖြင့် ပွဲစားဖြစ်သူ၏ အဆက်အသွယ်ဖြင့် မော်လမြိုင်မြို့၊ လမုတန်းဈေး၊ ရွှေစင်မင်း ရွှေဆိုင်ပိုင်ရှင်၏ အိမ်တွင် အိမ်အကူအဖြစ် ဝင်ရောက်လုပ်ကိုင်ခဲ့သည်။
မသဇင်စိုးမှာ ကလေးမိခင် အိမ်ထောင်ကွဲဖြစ်နေသော်လည်း အလုပ်မရမည်စိုးသဖြင့် အိမ်ရှင်မိသားစုအား အပျိုဟု ကနဦးတွင် လိမ်ပြောဆိုခဲ့သည်။ သိပ်မကြာမီမှာပင် သူမမှာ အပျိုမဟုတ်ကြောင်း သိသွားခဲ့ပြီးနောက် လိမ်လည်ပြောဆိုခဲ့သည့်အတွက် အိမ်ရှင်ဖြစ်သူက ကလိမ်ကျစ်ကျသည်ဟု ပြောဆိုကာ ချိုးနှိက်ဆက်ဆံမှု၊ မယုံသင်္ကာမှုများ၊ ရင့်သီးမောက်မာစွာ ပြောဆိုဆက်ဆံမှုများ ရှိခဲ့သဖြင့် အဆိုပါအိမ်တွင် ၂ ရက်သာ အလုပ်လုပ်ခဲ့ပြီး ပြန်လာခဲ့သည်။
ထို့ကြောင့် အိမ်ရှင်ဖြစ်သူက ကြိုတင်ထုတ်ပေးထားသောငွေများ ပြန်ပေးရန် မသဇင်စိုး၏ မိခင်ဖြစ်သူ ဒေါ်သင်းသင်းဦးအား မော်လမြိုင်မြို့၊ ဇေယျာသီရိရဲစခန်းတွင် ခေါ်ယူဖိအားပေးခဲ့သည်။ မသဇင်စိုး နဲ့ ဒေါ်သင်းသင်းဦး က အိမ်ရှင်ဖြစ်သူအား ကြိုတင်ငွေများ ပြန်ပေးခဲ့ရာ ပွဲစားဖြတ်ယူထားသော ငွေများကြောင့် မပြည့်သဖြင့် အိမ်ရှင်က လက်ခံခြင်းမရှိပဲ အပြည့်ပြန်ပေးရန် တောင်းဆိုခဲ့သည်။
စက်တင်ဘာလ ၆ ရက်နေ့တွင် ဦးခင်ဝင်းက တရားလိုပြုလုပ်ကာ မသဇင်စိုး နဲ့ ဒေါ်သင်းသင်းဦး တို့နှစ်ဦးအား ရာဇသတ်ကြီးပုဒ်မ ၄၂၀ (လိမ်လည်မှု)ဖြင့် မော်လမြိုင်မြို့ တရားရုံးတွင် တရားစွဲဆိုခဲ့သည်။
စက်တင်ဘာလ ၁၁ ရက်နေ့တွင် အချုပ်လွှတ်အာမခံ ရရှိရေးဆောင်ရွက်ခဲ့ပြီး တရားခံရှေ့နေအဖြစ် တရားလွှတ်တော်ရှေ့နေ ဦးဇော်ဝင်း က အမှုရင်ဆိုင်သွားမည်ဖြစ်ကြောင်း PVA အဖွဲ့မှ ထုတ်ပြန်ကြေညာထားသည်။
