Miss Universe Tachileik နှင့် ပြိုင်ပွဲတွင် စပွန်ဆာပေးသည့်ဟိုတယ်အကြောင်း ဝေဖန်သည်ဟုဆိုကာအမှုဖွင့်

06 Jul 2017 1,350 Views

Miss Universe Tachileik နှင့် ပြိုင်ပွဲတွင် စပွန်ဆာပေးသည့်ဟိုတယ်အကြောင်း ဝေဖန်သည်ဟုဆိုကာ ဆက်သွယ်ရေး ဥပဒေပုဒ်မ၆၆(ဃ)ဖြင့် တာချီလိတ်မြို့မရဲစခန်းတွင်အမှုဖွင့်ထားကြောင်းသိရှိရသည်။ဖြစ်စဉ်မှာရှမ်းပြည်နယ်(အရှေ့ပိုင်း)၊ တာချီလိတ်မြို့တွင် ဇွန်လ (၁၂)ရက်နေ့က ကျင်းပသည့် Miss Universe Tachileik ပြိုင်ပွဲအား စပွန်ဆာ ထောက်ပံ့ပေးထားသည့် ပလက်တီနမ်စတားဟိုတယ်၏ ပိုင်ရှင်ဖြစ်သူ ဒေါ်နန်းဖောင်းက Miss Universe Tachileik အကြောင်းရေးသားသည့် ဖေ့ဘုတ်အကောင့်ပိုင်ရှင်အား ဇူလိုင်လ (၅)ရက်နေ့ ညနေပိုင်းက ဆက်သွယ်ရေး ဥပဒေပုဒ်မ ၆၆(ဃ)ဖြင့် တာချီလိတ်မြို့မရဲစခန်းတွင် အမှုဖွင့်လှစ် တိုင်တန်းလိုက်ကြောင်း သိရသည်။

Miss Universe Tachileik အဖြစ် ဆုရရှိသွားသည့် ပလက်တီနမ်စတား ဟိုတယ်ပိုင်ရှင်၏ သမီးဖြစ်သူ မနန်းမွေဖောင်းလုံ ဆုရသွားခြင်းနှင့် ပတ်သက်၍ Mg Oscar အကောင့်အမည်က ဝေဖန် ပုတ်ခတ် ရေးသားထားသည့်အရေးအသားများနှင့် ဗီဒီယိုဖိုင်တစ်ခုအား တင်ထားသည်ကို ဒေါ်နန်းဖောင်းက ဇူလိုင်လ (၄)ရက်နေ့ည(၇)နာရီခန့်တွင် တွေ့ရခြင်းဖြစ်ကြောင်း ရဲမှတ်တမ်းတွင် ဖော်ပြထားသည်။

အဆိုပါ ဗီဒီယိုဖိုင်တွင် ပြောဆိုထားသည်များမှာ ဟိုတယ်၏ ဂုဏ်သိက္ခာနှင့် ပြိုင်ပွဲတွင် အမှန်တကယ် ကြိုးစားပြီး ပထမဆုရရှိခဲ့သည့် သမီးဖြစ်သူ၏ ဂုဏ်သိက္ခာတို့ကို ထိခိုက်ကျဆင်းစေမည့် အပြောအဆိုများ ပါဝင်သဖြင့် Mg Oscar အကောင့်ပိုင်ရှင်အား စုံစမ်းဖော်ထုတ် အရေးယူပေးရန် ဒေါ်နန်းဖောင်းက တိုင်တန်းထားခြင်း ဖြစ်ကြောင်း တာချီလိတ်မြို့မရဲစခန်းမှ သိရသည်။အဆိုပါ ကိစ္စနှင့် ပတ်သက်၍ တာချီလိတ်မြို့မရဲစခန်းတွင် အမှုဖွင့်လှစ်လက်ခံခြင်း၊ တရားလိုနှင့် သက်သေများ စစ်ဆေးခြင်း၊ သက်သေခံပစ္စည်း သိမ်းဆည်းခြင်းများ ဆောင်ရွက်ကာ ရဲအုပ် အောင်ကျော်စိန်မှ အမှုစစ်အဖြစ် ဆောင်ရွက်ပြီး (ပ)၁၃၉/၁၇၊ ဆက်သွယ်ရေးဥပဒေ ပုဒ်မ ၆၆(ဃ)ဖြင့် အမှုဖွင့်လှစ်ဆောင်ရွက်ထားကြောင်း သိရသည်။

Source: Tachileik News