" အမှန် ကျွန်တော်တို့ကို တရားစွဲမယ့်သူ ဘယ်သူမှရှိတာမဟုတ်ဘူး . . . ကော်ဘရာ"
----------------------------------------
ပြီးခဲ့တဲ့ရက်ပိုင်းကအကြောင်းအရာနဲ့ပတ်သက်ပြီးအာမခံနဲ့အိမ်ပြန်ရောက်လာတဲ့ကော်ဘရာနဲ့အိုအေစစ်ဂျာနယ်တို့တွေ့ဆုံးမေးမြန်းမှုကို ပြန်လည်တင်ပြလိုက်ပါတယ်။.. .

ဖြစ်စဉ်အကျဉ်းလေးကိုသိပါရစေ . . .
----------------------------
ကျွန်တော်ဖျားနေတာသုံးလေးရက်ရှိပြီ။ကျွန်တော်အဖျားပျောက်တော့သမီးလေးကဆက်ဖျားတယ်။သမီးကိုဆေးခန်းပို့တော့ လမ်းမှာကိုအယ်ကြီးတို့ မိသားစုနဲ့သွားဆုံတယ်။ ဆေးခန်းနားကဆိုင်မှာပဲ နှစ်ဖက်မိသားစုဆုံပြီး Dinnerစားဖြစ်ကြတယ်။ အပြန်စိတ်မချလို့ ကိုအယ်ကြီးမိန်းမနဲ့ကလေးကို ကျွန်တော့်ကားမှာ မြလေး(ခင်မဉ္ဇူခိုင်)ကမောင်းပြီး လိုက်ပို့တယ်။ ကျွန်တော်က ကိုအယ်ကြီးကားကို မောင်းပြီး တစ်စီးစီပေါ့။ လမ်းမှာကိုအယ်ကြီးကသူမောင်းမယ်ဆိုပြီး မောင်းခဲ့တယ်။ ကျွန်တော်လည်းဘေးကနေခုံကိုနောက်လှန်ပြီး အေးအေးဆေးဆေးလိုက်လာတယ်။ တစ်နေရာရောက်တော့ တက္ကစီတစ်စီးကကျွန်တော်တို့ကားကို ပွတ်ဆွဲပြီး မောင်းပြေးသွားတယ်။ကျွန်တော်လည်း ရုတ်တရက်လန့်သွားတယ်။
ကိုအယ်ကြီးက ဒေါသထွက်ပြီး အဲ့ဒီကားနောက်လိုက်တယ်။ သူတို့က လုံးဝမရပ်ပေးဘူး။အဲ့ဒါနဲ့ ကိုအယ်ကြီးက မီလာတော့ သူ့ရှေ့ကနေကန့်လန့်ရပ်လိုက်တယ်။ ပြီးတော့ စကားများကြတယ်။ကိုအယ်ကြီးကားပေါ်ကဆင်းတော့ ကျွန်တော်စိတ်ပူပြီးအနောက်ကလိုက်တယ်။ ဟိုဘက်ကားကမှားပြီးမတောင်းပန်တဲ့အပြင် မောင်းပြေးတော့ ကိုအယ်ကြီး
လည်း အော်တာဟစ်တာ တွေဖြစ်ကုန်တာပေါ့။ကိုအယ်ကြီးကိုလည်း ဆွဲရင်းဖျောင်းဖျ၊ ဟိုဘက်ကိုလည်း ဆက်မဖြစ် ကြဖို့တောင်းပန်နဲ့။ အဲ့ဒီအချိန်ဟိုဘက်ကားက အမျိုးသမီးတစ်ယောက် ဆင်းလာတော့ အဲ့ဒီမိန်းကလေးကိုတောင် စိတ်မပူနဲ့ကားပေါ်မှာပြန်ထိုင် နေလို့ ပြောလိုက်တယ်။အဲ့ဒီအချိန် ဘယ်ကမှန်းမသိတဲ့ လူတွေအများကြီးရောက်လာပြီး ကိုအယ်ကြီးကားကိုခဲတွေနဲ့ထု၊ဘာတွေနဲ့ရိုက်မှန်းမသိဘဲအုတ်အော်သောင်းနင်းဖြစ်ကုန်ကြတာ။ကိုအယ်ကြီးကားလည်း မှန်တွေကွဲကုန်၊ ပိန်ချိုင့်ကုန်တာပေါ့။ ကျွန်တော့်မှာ လူအုပ်ကြီးကိုလည်းပြောရ။ ဟိုဘက်တောင်းပန်၊ ဒီဘက်တောင်းပန်နဲ့ချာချာကိုလည်နေတာပဲ။ အဲ့ဒီအထိ ကိုယ့်ဘာသာကိုယ်ပြန်လာ လိုက်ရင်ဖြစ်တယ်။ အဲ့ဒီအချိန် ကျွန်တော်တို့ကားပေါ်က ကားသော့ရော ပိုက်ဆံတွေရောမရှိတော့ဘူး။ ကျွန်တော်က လိုက်ဆွဲနေတော့အဲ့ဒါကိုလည်း သတိမထားမိတော့ဘူး။အမှန်တော့ကားချင်းငြိလို့စကားများတာတွေကပြီးနေပြီ။အဲ့ဒီအချိန်မှာဘယ်ကထွက်လာမှန်းမသိတဲ့လူတွေနဲ့ အဲ့ဒီလိုဖြစ်ကုန်ကြတာ။

တက္ကစီသမားနဲ့ရန်ဖြစ်ပြီး ပြန်တော့မယ်ဆိုတဲ့အချိန်မှာ ဖြစ်တာပေါ့ . . .
------------------------------------
သေသေချာချာတောင် မသိတော့ပါဘူးမဂျူလိုင်ရယ်။ထူပူပြီးပြန်ဖို့ပဲလုပ်နေတော့လေ။အဲ့ဒီအချိန်မှာပဲရဲကားရောက်လာပြီး ကျွန်တော်တို့ကို လာခေါ်သွားတယ်။ကျွန်တော်တို့စီးလာတဲ့ကားကိုတော့ ကရိန်းနဲ့ဆွဲခဲ့တာတွေ့ရတယ်။ အမှန်တော့ ကားအချင်းချင်းငြိလို့စကားများကြတာပြီးနေပါပြီ။ ကားသော့မရှိလို့ မပြန်ရရင်းနဲ့ဒီလိုတွေဆက်ဖြစ်ကုန်တာ။

ကြားထဲက ၀င်ဆွမ်းကြီးလောင်းကြတဲ့သူတွေကြောင့်အခုလိုမဖြစ်သင့်ဘဲ ဖြစ်သွားတာလို့ဆိုလိုတာပေါ့ . . .
------------------------------
အမှန် ကားသော့ရှိရင် ဒေါသထွက်ပြောဆိုပြီးပြန်လိုက်ရင်ရနေပြီ။ အခုတော့ မှန်တွေကွဲကားတွေပျက်စီးနဲ့။

အဲဒီအချိန် တစ်ဖက်တက္ကစီကားကရော . . .
-----------------------------
အမှန်က ကျွန်တော်တို့ကို တရားစွဲမယ့်သူဘယ်သူမှရှိတာမဟုတ်ဘူး။ အဲ့ဒီလိုတွေမဖြစ်သင့်ဘဲဖြစ်ကုန်တော့ Facebook ပေါ်မှာလည်းပျံ့နှံ့ပြီး ဖြစ်ခဲ့ရတာ။

ကိုထူးအယ်လင်းက ပုဆိန်နဲ့ တစ်ဖက်ကားမှန်ကိုရိုက်ခွဲတယ်ဆို . . .
--------------------------------
အွန်လိုင်းပေါ်အဲ့ဒီလိုတက်လာတယ်။အဲ့ဒီအချိန်ကျွန်တော်ကလူအုပ်ကြားထဲဟိုတောင်းပန်ဒီတောင်းပန်နဲ့ရှုပ်ယှက်ခတ်နေတော့ ဘာမှမမြင်မိဘူး။ဘယ်သူတွေ ဘာဖြစ်နေမှန်းကို သေသေချာချာမသိတာ။ လူအုပ်ကြီးက ခဲ ပေါက်ဘာပေါက်ဆိုတော့
တစ်ဖက်ကားမှာလည်း အမျိုးသမီးတွေပါတော့သူတို့ကိုလည်း ထိမှာစိုးပြီး ကျွန်တော့်မှာလူအုပ်ကြီးဘက်ကိုပဲ အာရုံရောက်နေမိတာ။

နလံထနဲ့ ရဲစခန်းမှာ တစ်ညအိပ်လိုက်ရတယ်ပေါ့ . . .
------------------------------------
ဟုတ်ပါ့ဗျာ(ရယ်လျက်)။ စခန်းရောက်တော့လည်းတရားလိုကမရှိ။ ဘာအမှုမှန်းလည်းမသိနဲ့သူတို့ကလည်း ပြောပါတယ်။ ကျွန်တော်တို့တာဝန်အရပါတဲ့။

စခန်းက ရဲအက်ဥပဒေပုဒ်မ၃၀(က) နဲ့စွဲဆိုထားတယ်ဆိုတော့ . . .
-------------------------
အဲဒါနဲ့စွဲတော့ ကျွန်တော်ကကိုအယ်ကြီးကိုမေးတယ်။ဘယ်လိုဖြစ်ပြီး ဒီလို စွဲရတာလဲလို့။ ကိုအယ်ကြီးကလည်းဟာ ငါလည်းမသိဘူး။ ငါအပ်လိုက်တဲ့ အဲဒီရဲဒင်းကငါကိုယ်တိုင်ကားဘေးမှာ ကျနေတာမြင်လို့ ရဲလက်အပ်လိုက်တာတဲ့။ ဘယ်သူဟာမှန်းလည်း မသိဘူးတဲ့။ကျွန်တော်လည်းမသိဘူးလေ။ သူကလည်းကောက်ပြီးဒီအတိုင်းပဲ ရဲကိုသွား ပေးလိုက်တာ။ ဘယ်သူ့ဟာမှန်းမသိဘဲနဲ့ သူပြဿနာဖြစ်မှာစိုးလို့တဲ့။ သူပေးမှရဲကတွေ့တာ။ အဖြစ်ကအဲ့ဒီလို။

Online မီဒီယာတစ်ခုက အင်းစိန်ထောင်သွားကြမယ့်ထူးအယ်လင်း တို့အဖွဲ့ဆိုပြီး ထူးအယ်လင်းနဲ့ ကော်ဘရာ
တို့ အလှူသွားလုပ်တဲ့သတင်း ကိုတောင် ကော်ဘရာကခေါင်းစဉ်ကြီးကတောင် ကြောက်စရာကောင်း လိုက်တာ
လို့ ပြောခဲ့သေးတယ်နော် . . .
---------------------------------
အဲဒါကြီးကနေစတာပဲ။ နိမိတ်ဖတ်သလားလို့တောင်ကျွန်တော် ထင်ခဲ့မိသေးတာ(ရယ်လျက်)။

စိတ်ပူနေကြတဲ့ ပရိသတ်အတွက် . . .
-----------------------------
ကျွန်တော်ကကြားထဲကလိုက်တောင်းပန်နေရင်းနဲ့ပဲအခုလိုစိတ်မကောင်းတာတွေဖြစ်ခဲ့ရတယ်။ပူပန်ပေးခဲ့ကြတဲ့ပရိသတ်တွေအားလုံး၊ မိတ်ဆွေသူငယ်ချင်းအားလုံးကိုလည်းကျွန်တော်ကထပ်ပြီးတောင်းပန်လိုက်ပါတယ်။ကျွန်တော်တို့ကြောင့်စိတ်အနှောင့်အယှက် ဖြစ်ခဲ့၊ စိတ်ပူပေးခဲ့တဲ့အရာတွေအားလုံးကို ကျေးဇူးလည်းတင်သလို တောင်းလည်းတောင်းပန်ပါတယ်။

ဂျူလိုင်မိုး(အိုအေစစ်ဂျာနယ်)

Source: အိုအေစစ်ဂျာနယ်