မဟာဗန္ဓုလပန်းခြံကို လုံခြုံရေးအရ နှစ်ရက် ပိတ်မည်

(၆၉) နှစ်မြောက် လွတ်လပ်ရေးနေ့ အလံတင် အခမ်းအနား ကျင်းပပြုလုပ်မည့် ရန်ကုန်မြို့တော် မဟာဗန္ဓုလပန်းခြံကို လုံခြုံရေးအရ ဇန်န၀ါရီ ၂ ရက်နေ့မှ ဇန်န၀ါရီ ၄ ရက်နေ့ နံနက်အထိ နှစ်ရက် ခေတ္တ ပိတ်ထားမည်ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီ ပန်းဥယျာဉ်နှင့် အားကစားကွင်းများ ဌာနမှ ဌာနမှူး ဦးကိုကိုလင်းက ပြောကြားသည်။အဆိုပါ ခေတ္တပိတ်ထားမှုကို လွတ်လပ်ရေးနေ့ အလံတင် အခမ်းအနား ပြီးဆုံးပါက ပြန်လည် ဖွင့်လှစ်ပေးမည် ဖြစ်ကြောင်း၊ ယခင်နှစ်က လွတ်လပ်ရေး အခမ်းအနားကို တိုင်းဒေသကြီး လွှတ်တော်တွင် ကျင်းပခဲ့ပြီး ယခုနှစ် (၆၉) နှစ်မြောက် လွတ်လပ်ရေးနေ့ အခမ်းအနားကို မဟာဗန္ဓုလပန်းခြံတွင် ပထမဆုံးအကြိမ် ကျင်းပမည်ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီထံမှ သိရသည်။

၂၀၁၇ ခုနှစ်၊ ဇန်န၀ါရီလ ၄ ရက်နေ့တွင် ကျရောက်မည့် ၆၉ နှစ်မြောက် လွတ်လပ်ရေးနေ့ အလံတင် အခမ်းအနားကို နံနက် ၄ နာရီ ၂၀ မိနစ်တွင် ကျင်းပမည် ဖြစ်ပြီး ရန်ကုန် တိုင်းဒေသကြီး အစိုးရ အဖွဲ့ဝင်များ၊ တိုင်းဒေသကြီး လွှတ်တော် ကိုယ်စားလှယ်များ၊ ရန်ကုန်မြို့တော် စည်ပင်သာယာရေး ကော်မတီမှ တာဝန်ရှိသူများ အစိုးရဌာနမှ တာဝန်ရှိသူများနှင့် လွတ်လပ်ရေးနေ့တွင် ပါဝင် ပတ်သက်ခဲ့သည့် ပုဂ္ဂိုလ်များလည်း တက်ရောက်မည်ဖြစ်ကြောင်း ယင်းကော်မတီထံမှ သိရသည်။ လွတ်လပ်ရေးနေ့ အလံတင် အခမ်းအနား၌ BIA/BDA တပ်မတော်သားဟောင်းများနှင့် ရဲဘော် သုံးကျိပ်ဝင်တို့၏ မိသားစုဝင်များကို ဖိတ်ကြားရန် စီစဉ်နေကြောင်း ရန်ကုန် တိုင်းဒေသကြီး အစိုးရအဖွဲ့ထံမှ သိရသည်။

Credit : thevoicemyanmar