ဦးပိန်တံတားအနီးက ရှေးဟောင်းသမိုင်း၀င် တောင်မင်းကြီးဘုရားအား ပြင်ဆင်နေ

နှစ်ပေါင်းနှစ်ရာကျော် သက်တမ်းရှိသည့် အမရပူရ တောင်မင်းကြီးဘုရားကို ကိုဗစ်အလွန်ကာလ ထူးခြားသပ္ပာယ်စွာ ဖူးတွေ့ရန်အတွက် ပြင်ဆင်မှုများပြုလုပ်နေကြောင်း တောင်မင်းကြီး ဘုရားဂေါပကအဖွဲ့က သိရသည်။ ဘုရားဘဏ္ဍာတော်ငွေနှင့် ပြင်ဆင်မှုများ ပြုလုပ်နေခြင်းဖြစ်ပြီး အမရပူရ ဂိုဏ်းပေါင်းစုံ ဆရာတော်များ၏ ဩဝါဒခံယူပြီး ဆောင်ရွက်ခြင်းဖြစ်ကြောင်း သိရသည်။

“၂၀၁၃-၂၀၁၄ လောက်က အကြီးစားပြင်တယ်၊ မျက်နှာကျက်တွေတပ်တယ်၊ မကိုဋ်တော်ကြီးထဲမှာ ဟိုတုန်းကတော့ ခိုတွေ၀င်ငှက်တွေ၀င်တဲ့ အခါကျတော့ အဲဒါကိုရှင်းယူရတာ ထော်လာဂျီ ၃ စီးတိုက်လောက်ရှိတယ်၊ အခုလည်း အဲဒါတွေကို ပြန်မွမ်းမံရတယ်၊ မြန်မာမှုထည့်ထားတာတွေ ပန်းဆွဲပန်းတောင်တွေ ထီးတော်တွေ ပြန်ပြင်တယ်၊ စောင်းတန်းဆို အရင်ကနှစ်သွယ်ပဲရှိတယ်၊ အခု ၄ သွယ်ဖြစ်လာပြီ၊ အရင်ကဆိုရင် မျက်နှာကျက်ကမလှတော့ ဘုရားနဲ့မသင့်တယ်ဘူး၊ အဲဒါကိုလည်း အခုဆေးခြယ်တာတွေ လုပ်တာပေါ့” ဟု ဘုရားဂေါပကအဖွဲ့ဥက္ကဋ္ဌ ဦသန်းမြင့်က ပြောသည်။

မန္တလေးမြို့၏ အထင်ကရ ရှေးဟောင်းသမိုင်း၀င် တောင်မင်းကြီးဘုရားသည် ဦးပိန်တံတား၏ အနောက်ဘက် တောင်သမန်အင်းဇောင်းတွင် တည်ရှိပြီး လွန်ခဲ့သည့် နှစ်ပေါင်းနှစ်ရာကျော် ခရစ်နှစ် ၁၇၈၆ ခုနှစ်က ၀န်ကြီး အသည်၀န် မဟာမင်းလှကျော်စွာ တည်ထားကိုးကွယ်ခဲ့သည့် ရှေးဟောင်းသမိုင်းဝင် ဘုရားဖြစ်သည်။

ဖြိုးအိ/MDN