လေ့ကျင့်ခန်းလုပ်သူများ အစားသင့်ဆုံးအစားအစာများ

လေ့ကျင့်ခန်း လုပ်တာကြောင့် ခန္ဓာကိုယ်အတွက် ကောင်းကျိုးတွေ များစွာရရှိနိုင်သလို ဆုံးရှုံးသွားတဲ့ အာဟာရဓာတ်တွေလည်း ရှိနေပါတယ်။  ခန္ဓာကိုယ်က ဆုံးရှုံးသွားတဲ့ အာဟာရဓာတ်တွေကို ပြန်လည် ဖြည့်တင်းဖို့အတွက် အောက်ပါတို့ကို စားသံးပေးရန်လိုအပ်ပါတယ်... 

 

 

သစ်သီးတွေ စားသုံးတာက ကျန်းမာရေးနဲ့ ညီညွတ်စေတယ်ဆိုတာ သိပြီးသား ဖြစ်ပါလိမ့်မယ်။ သစ်သီးတွေထဲမှာ ကျန်းမာရေးနဲ့ ညီညွတ်တဲ့ သကြားဓာတ်များစွာ ပါဝင်ပြီး သင့်ခန္ဓာကိုယ်တွင်းမှာ စွမ်းအင် ဖြစ်ပေါ်စေပါတယ်။ လတ်ဆတ်တဲ့ ငှက်ပျောသီး၊ ပန်းသီးတွေမှာ ဗီတာမင် စီ၊ အင်တီအောက်ဆီးဒင့်နဲ့ အမျှင်ဓာတ်တွေ ပါဝင်တာကြောင့် လေ့ကျင့်ခန်း မလုပ်ခင်စားပေးပါက လေ့ကျင့်ခန်း လုပ်ချိန်မှာ သဘာဝအတိုင်း စွမ်းအင်တွေ တိုးပွားစေပါတယ်။ အစာကြေဖို့ ခက်ခဲတဲ့ အစားအစာတွေ စားသုံးပါက လေ့ကျင့်ခန်း လုပ်တဲ့အခါ ဗိုက်နာဗိုက်အောင့်တာကို ဖြစ်စေပါတယ်။

 

 

ဒိန်ချဉ်မှာ ပရိုတင်းများစွာ ပါဝင်ပြီး ကျန်းမာရေးနဲ့ ညီညွတ်စေတဲ့ ကာဗိုဟိုက်ဒရိတ်ကို ရရှိစေတာကြောင့် လေ့ကျင့်ခန်း လုပ်ရာမှာ လိုအပ်တဲ့ စွမ်းအင်ကို ရရှိစေပါတယ်။ ပရိုတင်းနဲ့ ကာဗိုဟိုက်ဒရိတ်တွေ ပေါင်းစပ်ပါဝင်တဲ့ ဒိန်ချဉ်က ကြွက်သားကြီးထွားမှုကို အားပေးပါတယ်။ ဒိန်ချဉ်ထဲကို ဘယ်ရီသီး အနည်းငယ် ထပ်ပေါင်းထည့်ပြီး စားတာက အရသာ ပိုစေတဲ့အပြင် စွမ်းအင် ပမာဏကိုလည်း တိုးမြှင့်ရရှိစေပါတယ်။

 

 

ကွေကာက ကိုယ်လက်လှုပ်ရှားမှုတွေ လုပ်ဆောင်ရာမှာ အားပေးကူညီပါတယ်။ ကွေကာမှာ အမျှင်ဓာတ်များစွာပါဝင်ပြီး လေ့ကျင့်ခန်းလုပ်တာနဲ့ ဇီဝရုပ်ဖြစ်ပျက်မှုကို အားပေးတဲ့ ဘီတိန်းဒြပ်ပေါင်း ပါဝင်ပါတယ်။ ကွေကာက ဆဲလ်တွေရဲ့ လုပ်ငန်းဆောင်တာကို ကောင်းမွန်စေပြီး လေ့ကျင့်ခန်း လုပ်နေစဉ်အတွင်းမှာ ရေဓာတ်ခမ်းခြောက်မှု မဖြစ်အောင်လည်း ကာကွယ်ပေးနိုင်ပါတယ်။ သင်ရဲ့ မနက်စာ ဒါမှမဟုတ် လေ့ကျင့်ခန်း မလုပ်ခင်မှာ ကွေကာ သောက်ပေးတာက ပိုမိုသင့်တော်ပါတယ်။

 

 

လေ့ကျင့်ခန်းလုပ်ပြီး တစ်နာရီအတွင်းမှာ ကြွက်သားတွေကို ပုံမှန်အနေအထားအတိုင်း ရောက်အောင် ခန္ဓာကိုယ်က ပြန်လည်တည်ဆောက်ရပါတယ်။ ကြက်သား၊ ဥအမျိုးမျိုးနဲ့ ငါးတွေမှာပါတဲ့ ပရိုတင်းကနေ  ကြွက်သားတွေအတွက် လိုအပ်တဲ့ အမိုင်နိုအက်စစ်ကို ရရှိပြီး ကြွက်သားသန်မာမှုနဲ့ ကြီးထွားမှုကို အားပေးပါတယ်။ ပရိုတင်းဓာတ် ပေါကြွယ်ဝတဲ့ အစားအစာတွေက လေ့ကျင့်ခန်းလုပ်တာကို ပိုမိုထိရောက်စေပါတယ်။

 

 

လတ်ဆတ်တဲ့ သစ်သီးဖျော်ရည်တွေကို လေ့ကျင့်ခန်း လုပ်ပြီးချိန်မှာ သောက်ပေးတာက လေ့ကျင့်ခန်း လုပ်ပြီးချိန် ခန္ဓာကိုယ်ကို ပြန်လည် တည်ဆောက်ရာမှာ လိုအပ်တဲ့ အာဟာရဓာတ်တွေကို ဖြည့်စွမ်းပေးနိုင်ပါတယ်။ အများစုက လေ့ကျင့်ခန်း လုပ်ပြီးချိန်မှာ အစာများများ စားတတ်ကြပါတယ်။ တကယ်တော့ သစ်သီးဖျော်ရည် သောက်ပေးတာက ခန္ဓာကိုယ်က လိုအပ်တဲ့ အာဟာရဓာတ်တွေကို အမြန်ဆုံး စုပ်ယူပြီး ကြွက်သားတွေကို ပြန်လည် တည်ဆောက်ပေးပါတယ်။

 

 

အုတ်ဂျုံက ကြွက်သားတွေ တည်ဆောက်မှုအတွက် အသင့်တော်ဆုံး အစားအစာပါ။ အုတ်ဂျုံကနေ ကြွက်သားတွေအတွက် စွမ်းအင်အဖြစ် လိုအပ်တဲ့ သကြားဓာတ်ကို ပြောင်းလဲပေးပါတယ်။ ဒါ့အပြင် အုတ်ဂျုံက အဆီတွေကို လောင်ကျွမ်းစေပြီး ကြွက်သားအတွက် စွမ်းအင်ဖြစ်စေတာကြောင့် ကိုယ်အလေးချိန် လျှော့ချနေသူတွေ အနေနဲ့ စားသင့်တဲ့ အစားအစာ တစ်ခုပါ။ လေ့ကျင့်ခန်းမလုပ်ခင် သုံးနာရီအတွင်းမှာ အုတ်ဂျုံနဲ့ ပြုလုပ်ထားတဲ့ အစားအစာတွေ စားပေးပါ။ သကြားဓာတ်ကို တဖြည်းဖြည်းချင်း ရရှိစေပြီး လေ့ကျင့်ခန်းလုပ်ရာမှာ စွမ်းအင်ပမာဏကို မြှင့်တင်ပေးပါတယ်။

 

 

စပျစ်သီးခြောက်၊ ဆီးသီးခြောက် စတဲ့ အသီးခြောက်တွေနဲ့ အစေ့၊ အဆံတွေကနေ လေ့ကျင့်ခန်းလုပ်ရာမှာ ဆုံးရှုံးသွားတဲ့ သတ္တုဓာတ်တွေကို ပြန်လည် ဖြည့်တင်းပေးပါတယ်။ အသီးခြောက်နဲ့ အစေ့၊ အဆံတွေကနေ သတ္တုဓာတ်တွေသာမက ကြွက်သား တည်ဆောက်ပေးတဲ့ ပရိုတင်းဓာတ်ကိုပါ ရရှိစေပါတယ်။ လေ့ကျင့်ခန်း မလုပ်မီနဲ့ လုပ်ပြီးချိန်တွေမှာ စားပေးပါ။

 

(ပိုပိုလေး)