ဒီနေ့ည Myanmar Idol ကနေ အရင်ဆုံး နှုတ်ဆက်ထွက်ခွာသွားရမယ့်သူ

Myanmar Idol Season 4 ရဲ့ First Live ယှဉ်ပြိုင်မှုက ပွဲဦးထွက်မှာတင် ပြင်းထန်ခဲ့ပါတယ်။ Top 11 ယောက်စလုံးက အဆိုပိုင်းမှာရော ဖျော်ဖြေတင်ဆက်မှုအပိုင်းတွေမှာပါ ပြောစရာမရှိအောင် အစွမ်းအစ ကိုယ်စီပိုင်ဆိုင်ထားတာကြောင့် အိမ်ပြန်ရမယ့်သူကို သူတို့ဆုံးဖြတ်ရွေးချယ်မှု မလုပ်ရတာ အရမ်းကံကောင်းတယ်လို့ ဒိုင်တစ်ဦးဖြစ်တဲ့ ဖြူဖြူကျော်သိန်းက ပြောခဲ့ပါတယ်။

ဟုတ်ပါတယ် First Live ကနေစပြီး Myanmar Idol Season 4 ခရီးစဉ်ကြီး ပြီးဆုံးတဲ့အထိ ပရိသတ်တွေကိုယ်တိုင်က ရာနှုန်းပြည့် voting စနစ်နဲ့ WINNER တစ်ဦးကို ရွေးချယ်ပိုင်ခွင့် ရထားကြပါတယ်။ ဒိုင်လူကြီးတွေအနေနဲ့ လုံးဝင်ရောက်စွက်ဖက်ခွင့်မရှိတော့ပဲ ပြိုင်ပွဲဝင်တွေကို အကြံပေးရုံသက်သက်မျှသာ စွမ်းနိုင်ပါတော့တယ်။

ဒီကနေ့ သောကြာညမှာတော့ Top 11 ထဲက voting ရလာဒ်အနည်းဆုံး ပြိုင်ပွဲဝင် တစ်ဦးက အိမ်ပြန်သွားရမှာ သေချာနေပါတယ်။ မိန်းကလေး ၆ ယောက် ယောကျ်ားလေး ၅ ယောက်ရှိနေတဲ့ Top 11 ပြိုင်ပွဲဝင်တွေထဲက ဒီနေ.ညမှာ ဘယ်သူအရင်ဆုံး အိမ်ပြန်ရမလဲဆိုတာ ရင်ခုန်စရာကောင်းပါတယ်။

မနေ့ညက ယှဉ်ပြိုင်မှုမှာ ပထမဆုံးပြိုင်ပွဲဝင် ၄ ယောက်လောက်ထိ ဒိုင်တွေအားလုံး ကျေနပ်အားရစွာနဲ့ မှတ်ချက်ကောင်းတွေ အားကျိုးမာန်တက် ပေးခဲ့ကြပေမယ့် နောက်ပိုင်းပြိုင်ပွဲဝင်တွေအတွက်တော့ ပြောစရာစကား သိပ်မကျန်တော့လောက်အောင် စကားလုံးတွေ ရှားပါးသွားတာကို တွေ့ခဲ့ရပါတယ်။

မိန်းကလေးပြိုင်ပွဲဝင်တွေထဲက တစ်ယောက် နှစ်ယောက်လောက်ကို ဒိုင်တွေက အားတင်းပြီး မှတ်ချက်ကောင်းကောင်းလေးတွေ ရှာကာ ပြောဆိုနှစ်သိမ့်ခဲ့ကြပေမယ့် ဒိုင်တွေဖြစ်ကြတဲ့အလျှောက် မနေနိုင်တော့တဲ့အဆုံးမှာ အားနည်းချက်တွေကိုလည်း ဝေဖန်ထောက်ပြခဲ့ကြတာကို တွေ့ခဲ့ရပါတယ်။

ဒါကြောင့်မို့ ဒီနေ့ညမှာ Myanmar Idol ကနေ ပထမဦးဆုံး နှုက်ဆက်ထွက်ခွာသွားရမယ့်သူက မိန်းကလေးပြိုင်ပွဲဝင်တွေထဲက တစ်ယောက်ယောက် ဖြစ်ကောင်း ဖြစ်နေနိုင်ပါတယ်။ ဒါပေမယ့်လည်း ပရိသတ်တွေရဲ့ SMS နဲ့ အွန်လိုင်းပေါ်က ပေးမယ့် မဲရလာဒ်တွေကြောင့်လည်း ပြိုင်ပွဲရဲ့ အဖြေက ပြောင်းလဲသွားနိုင်ပါသေးတယ်။

နောက်ထပ် Top 10 အဆင့်မှာ ယောက်ျားလေး ၅ ယောက် မိန်းကလေး ၅ ယောက်နဲ့ ဟန်ချက်ညီညီ ရှေ့ဆက်သွားနိုင်မလား ဒါမှမဟုတ် ယောက်ျားလေးတွေထဲက နောက်ထပ်တစ်ယောက် အင်အားထပ်လျော့သွားဦးမလားဆိုတာကိုတော့ ဒီနေ့ည ၉ နာရီ Channel 9 ရုပ်သံမှာ ရင်ခုန်စွာနဲ့ စောင့်မျှော်ကြည့်ရှုရမှာဖြစ်ပါတယ်။ အိမ်ပြန်ရမယ့် ပြိုင်ပွဲဝင်တစ်ဦးကို ကြိုပြီးခန့်မှန်းသိရှိထားပေမယ့် မပြောရက်လို့ ပြောမထွက်တော့ပါဘူး။

ဒီနေ့ညမှာ အိမ်ပြန်ရမယ်လို့ စိတ်ထဲမှာထင်နေတဲ့ ပြိုင်ပွဲဝင်ရဲ့အမည်ကို ကွန်မန့်မှာ ရေးပေးခဲ့ပါဦး။