‘အောင်လအန်ဆန်’ နဲ့ အမျိုးတော်လည်း ‘ဦးရှာကီ’ က ခွင့်မလွှတ်ဘူး

MasterChef အစီစဉ်ရဲ့ ပထမဦးဆုံးနေ့မှာ ဟင်းပွဲအတော်များများ အမှိုက်ပုံးထဲ လွှင့်ပစ်ခံလိုက်ရတာကြောင့် ဒုတိယနေ့ အတွက် ပြိုင်ပွဲဝင်တွေအားလုံးရဲ့ စိုးရိမ်ရေမှတ်က ငယ်ထိပ်ကို ရောက်နေပါတယ်။ ဒိုင်လူကြီးတွေထဲမှာ သူတို့အလန့်ဆုံးက ဦးရှာကီ လို့ လူသိများတဲ့ ဦးရဲထွဋ်ဝင်း ဖြစ်ပါတယ်။

 

 

ရှာကီစားသောက်ဆိုင်လုပ်ငန်းစုရဲ့ ပဲ့ကိုင်ရှင်လည်း ဖြစ်သလို အစားအသောက်တွေရဲ့ အရသာပိုင်း၊ ပြင်ဆင်မှုအပိုင်းတွေနဲ့ ပက်သက်လာရင်လည်း ရသာရုံ၊ ရူပါရုံ ကနေတစ်ဆင့် နှလုံးသားထဲထိ နက်ရှိုင်းစွာခံစားပြီးမှ ဆုံးဖြတ်တတ်သူဖြစ်လို့ သူ့ဆီက ကွန်မန့်ကောင်းကောင်း ရဖို့ထက် ရက်ရက်စက်စက် အပြောမခံရဖို့ကိုပဲ ပြိုင်ပွဲဝင်တွေက မျှော်လင့်နေကြရတာပါ။

 

မနေ့ညက ပြိုင်ပွဲမှာတော့ ကျပ်ငွေ ၁၀ သိန်းခန့် တန်ဖိုးရှိတဲ့ တူနာငါးတွေရဲ့ တန်ဖိုးကို ထောက်ထားပြီး ဟင်းပွဲတွေ တစ်ပွဲမှ အမှိုက်ပုံးထဲ မရောက်ခဲ့ပေမယ့် သူ့ရဲ့ ဒေါသကို နှိုးဆွနေခဲ့တဲ့ ဟင်းပွဲတွေကတော့ ရှိနေဆဲဖြစ်ပါတယ်။

 

ပထမအဆင့် ယှဉ်ပြိုင်မှုမှာ နေပြည်တော်က လာရောက်ယှဉ်ပြိုင်တဲ့ ရခိုင်တိုင်းရင်းသား ‘နိုင်ဇော်’ က ပုစွန်နဲ့ ဂုံးစိမ်းတို့ကို ရခိုင်ရိုးရာနည်း ပေါင်းစပ်ပြီး နိုင်ငံတစ်ကာ အဆင့်မီ ဟင်းပွဲဖြစ်အောင် ချက်ပြုတ်နိုင်ခဲ့တာမို့ အဲဒီနေ့အတွက်  Winner ဖြစ်သွားခဲ့ပါတယ်။

 

သူက ပြိုင်ပွဲဝင် ၈ ဦးကို ပြန်လည်ချက်ပြုတ်ဖို့ ရွေးချယ်ခဲ့ပြီး တူနာငါးအပါအဝင် စည်သွပ်ဗူးတွေကိုပေးခဲ့ပါတယ်။ သူရွေးချယ်ခဲ့တဲ့ ပြိုင်ပွဲဝင်တွေထဲမှာ “ဆန်းဂျက်အောင်” လည်း တစ်ယောက်အပါအဝင်ဖြစ်ပါတယ်။

 

 

ကချင်တိုင်းရင်းသား “ဆန်းဂျက်အောင်” ဟာ ကမ္ဘာ့အသိမှတ်ပြု MMA ကစားသမား ‘အောင်လအန်ဆန်’ နဲ့ ဆွေးမျိုးတော်စပ်သူဖြစ်ပါတယ်။ ကချင်ပြည်နယ်ကနေ ရန်ကုန်ကို တစ်ယောက်ထဲ တက်လာခဲ့ပြီး အမျိုးတွေရဲ့အိမ်မှာ ခတ္တတည်းခိုကာ MasterChef ပြိုင်ပွဲကို ဝင်ရောက်ယှဉ်ပြိုင်ခဲ့သူပါတယ်။ သူ့မှာ မိဘတွေကို လုပ်ကျွေးပြုစုချင်တဲ့ အနာဂါတ်အိမ်မက်တွေ တစ်ပွေ့တစ်ပိုက်ကြီးရှိနေပါတယ်။

 

 

သူ့ရဲ့လက်ရာ ဟင်းပွဲကို ပြင်သစ်ဒိုင်လူကြီး Jean Marc Lemmery က စတင်စစ်ဆေးခဲ့ပြီး တူနာငါးရဲ့ အရိပ်အယောင်တောင် မတွေ့ရဘူးလို့ မှတ်ချက်ပေးခဲ့ပါတယ်။ ဒေါ်ဖြူဖြူတင် ကတော့ MasterChef Myanmar ဆိုတာ မြန်မာတွေ စားဖို့ချက်ခိုင်းနေတာမဟုတ်ဘူး၊ မြန်မာပြည်ကလူတွေ ဘယ်လောက်တော်လဲဆိုတာ စစ်နေတာလို့ မှတ်ချက်ပေးခဲ့ပါတယ်။

 

ဦးရဲထွဋ်ဝင်း က နောက်ဆုံးအဆုံးအဖြတ်မှာတော့ ကမ္ဘာမှာဈေးအကြီးဆုံး တူနာငါးကို ကိုယ့်လက်ထဲရောက်မှ နှစ်ခါသေအောင် သတ်လိုက်တဲ့အပြင် တန်ဖိုးကိုပါနှိမ့်လိုက်တဲ့အတွက် MasterChef Kitchen ကနေ ထွက်သွားဖို့ ‘ဆန်းဂျက်အောင်’ ကို ရွေးချယ်လိုက်ပါတယ်။

 

 

အစောပိုင်းက ‘ဆန်းဂျက်အောင်’ နဲ့ အင်တာဗျူးမှာ သူက “MasterChef ဆိုတာ professional chef တစ်ယောက်ကို ရှာနေတာဖြစ်လို့ လမ်းဘေးအဆင့်အတန်းနဲ့ ပြိုင်တဲ့သူဆိုရင် ဒီလိုပဲသွားမှာပဲ” လို့ ဖြေကြားခဲ့ပါတယ်။

မနေ့က MasterChef Myanmar ပြိုင်ပွဲကနေ ထွက်သွားခဲ့ရတဲ့ ‘ဆန်းဂျက်အောင်’ ဘယ်လိုအဆင့်အတန်းမျိုးနဲ့ ချက်ပြုတ်ယှဉ်ပြိုင်ပြသခဲ့သလဲဆိုတာ ပရိသတ်တွေ ကိုယ်တိုင် ကြည့်ရှုအကဲဖြတ်နိုင်ပါတယ်။